Narsarsuup siunissaa pillugu nalorninerujussuaq
Ukiut pingasut sinnilaarlugit Narsarsuup siunissaa pilersaarusiorlugu suleqatigiissitaq ulapippoq. Tamanna illoqarfiup sanilerisap Qaqortup mittarfiata nutaap ammannginnerani pissaaq, taassumami ullumikkut Narsarsuarmi ingerlatsineq suliassallu ilarpassui tigussavai.
Suleqatigiissitarli suli suliassaqaqaaq. Tamannalu Narsarsuarmi innuttaasunut nalorninartorsiortitsivoq. Kujallermi kommunaldirektøri Tine Pars, suleqatigiissitami ilaasortaq, taama oqaluttuarpoq.
Suleqatigiissitaq qaammat ataaseq allorlugu ataatsimiittarpoq. Tassani ilaatigut Qaqortumi mittarfissaq nutaaq ammarneqarpat Narsarsuarmi mittarfik timmisartunut suli atorneqarsinnaanersoq apeqqutigineqarnikuuvoq. Akissulli Narsarsuami innuttaasunut qiimmaallannartuunngilaq.
– Heliportitut atorneqarnissaa aalajangiunneqarnikuuvoq. Mittarfik timmisartunut ammaannarsinnaanera pillugu Kalaallit Airportsimut Air Greenlandimullu aperinikuuvugut, kisianni tamanna periarfissaanngitsutut taakkunannga oqaatigineqarnikuuvoq, Tine Pars KNR-imut oqarpoq.
Maannakkut mittarfiusoq 1830 meterisut takitigisoq qulimiguulinnut mittarfiinnanngussaaq, taamaalilluni heliportinngortinneqassalluni.
Sulisut 60-init marlunnut
Naalakkersuisut Kommuni Kujalliullu nunaqarfiup siunissaa pillugu qulaajarneqartussatut isumaqatigiissutaanni allaqqavoq, Qaqortumi mittarfik atulerpat Narsarsuarmi mittarfimmik ingerlatsinermi inuk ataaseq marlulluunniit taamaallaat sulisoralugit sulineq ingerlaqqissinnaasoq. Narsarsuarmi Mittarfeqarfinni inuit 60-it missaanniittut 2022-imi sulisorineqarput.
Mittarfimmik ingerlatsinerup saniatigut Mittarfeqarfiit nunaqarfiup ulluinnarni ingerlanneqarnerani suliarpaaloqarput. Taamaattumik Mittarfeqarfiit ataatsimik marlunnilluunniit sulisoqalerpata Mittarfeqarfiit nunaqafiup iluani maanna suliaat qanoq pineqassanersut suli aamma ilisimaneqanngillat.
- Mittarfeqarfiit ullumi suna tamaat isumagigamikku, eqqaaveqarneq, aputaajaaneq, aqquserngit suna tamaat aqukkamikku. Taamaattumik sorliit kommunip ingerlatilissagai, suliap qanoq annertussusaa tamakku tamaasa apeqqutit sukumiisumik paasissutissat suli pinikuunngilagut taamaattumik tamanna amigaataavoq, Tine Pars oqarpoq.
Aningaasat suli aamma qulaajarneqanngitsut
Tine Parsip oqarnera naapertorlugu Mittarfeqarfiit taama suliaqarnerminni kommunimut isumaqatigiissuteqarput. Suliassalli kommunip ingerlatilissagunigit, kommunimut aningaasameeqisumut, qanoq naleqassanersut suli aamma ilisimaneqanngilaq.
- Tassa tamakku aningaasartai suli pulaffiginikuunnginnatsigit, Tine Pars oqarpoq.
Suleqatigiissitamut piffissaliussaq Qaqortumi mittarfiup naammassinissaata naatsorsuutigineqarfianut tassa ukiup tullissaanut siorna sivitsorneqarpoq,
Narsarsuarmi innuttaasut ullumikkut 130-upput. Innuttaasut amerlanerpaartaat mittarfimmut tunngasumik toqqaannanngitsumik toqqaannartumillu suliffeqarput.
