Naalakkersuisut: Sakkutuut sungiusarneri nutaat ullumimiit aallartinneqarput
Piffissami qanittumi sakkutuut amerlanerulernissaannik siornatigut tusatsiagaqartareerpoq.
Illersornissaqarfiup Kalaallit Nunaanni sakkutuut piareersimanerat ullumimiit annertusilerpaat, tamanna Naalakkersuisut tusagassiuutinut nalunaaruteqarlutik uppernarsarpaat.
- Issittumi Atlantikullu avannaani najuunnerup annertusinerata ilaatut, Illersornissaqarfiup ullumimiit sungiusarnernik ingerlatanut assigiinngitsunut atatillugu naammassinnissinnaassutsini sakkutuunilu annertusassavai, tamatumalu piffissami aggersumi Kalaallit Nunaanni Kalaallillu Nunaata eqqaani timmisartunik, umiarsuarnik sakkutuunillu, sakkutuut najuunnerisa annertusinerat malitsigissavaa, tassani aamma NATO-mi iligisaneersut ilanngullugit.
Sakkutuut najuunnerulernissaat 'sungiusarnertut' taaneqarpoq, soorlu aamma siorna taama taaneqartut.
- Isumannaallisaanermi politikikkut pissanganartorsiornerit Issittumut siuaruaapput. Taamaammat NATO-mi iligisat qanimut suleqatigalugit Illersornissaqarfiup Kalaallit Nunaanni sungiusarnernik annertusisamik ingerlatai nangissallugit Naalakkersuisut Illersornissamullu ministereqarfik aalajangerput.
Illersornissaqarfiup timmisartui assartuutit marluk, C-130J-t, Nuummut Kangerlussuarmullu ullumikkut tikissasut, Arktisk Kommando Facebookikkut nalunaarpoq.
NATO pingaarnertut salliutinneqarpoq
NATO-mut ilaasortaanneq Naalakkersuisunit pingaarnertut salliutinneqartoq, Nunanut allanut tunngasunut naalakkersuisoq Vivian Motzfeldt (S) tusagassiuutinut nalunaarummi oqarpoq.
- NATO-mi iliginnerup ilaatut Kalaallit Nunaanni Kalaallillu Nunaata eqqaani illersorneqarnerup isumannaatsuunerullu nukittorsarnera, tamatumalu NATO-mi nunat iligisagut qanimut suleqatigalugit pinissaa, Naalakkersuisut qitiusumik pingaartippaat, Vivian Motzfeldt taama oqarpoq.
Donald Trumpip nuna tiguniarlugu sioorasaarineri pillugit, naalakkersuisup amerikamiut præsidentiata tullersortaa nunanullu allanut ministeriata ataatsimeeqatiginissaat ilutigalugu, sungiusarnerit aallartissasut ullumi nalunaarutigineqarpoq.
Tusagassiuutinulli nalunaarut naapertorlugu, sakkutuut piareersimanerat nutaaq tassaavoq NATO-p siorna sungiusarnerisa nanginneqarnerat.
Sungiusarnermi svenskit sakkutuui peqataassasut, Sverigep ministeriunera Ulf Kristensson inoqatinut attaveqaqatigiiffimmi X-imi allappoq. Tamatuma saniatigut sungiusarnerup aqqa paasissutissiissutigaa: Operation Arctic Endurance.
Sakkutuut najuunnerannik annertusaaneq
Kalaallit Nunaanni sakkutuut najuunnerat pillugu siorna oqallittoqangaatsiarpoq.
Sakkutuut amerlinerat pissutaalluni Kalaallit Nunaat sorsunnerup nalaani saassunneqarsinnaalernera Naleqqap ernumassutigaa, Issittumili sakkutooqarfiup tamanna tunngavissaqannginnerarpaa.
Illersornissamut ministeri Troels Lund Poulsen naapertorlugu, kunngeqarfiup issittumi sulisinnaassutsini nukittorsassagaa pingaaruteqarpoq.
– Tamanna 2025-mi aallartipparput, suliniutillu nanginneratut pissusissamisoortumik 2026-mi suleqatigiinneq ingerlateqqillugulu annertusissavarput, Troels Lund Poulsen tusagassiuutinut nalunaarummi oqarpoq.
Najuunnermik annertusaaneq qanoq isikkoqassanersoq, sapaatit akunnerini aggersuni Illersornissaqarfiup paasisaqarneruffigissagaa, tamatuma saniatigut ilanngullugu oqaatigaa.
- Illersornissaqarfiup Issittumi Europamilu nunat iligisat arlallit peqatigalugit sapaatit akunnerini aggersuni piffimmiinnerup qanoq annertusarlugulu Issittumi sungiusarnernik ingerlatat qanoq ingerlanneqarsinnaanerat qulaajaavigissavaat.
Issittumi Saakutooqarfiup kalaallit oqartussaasui attuumassutillit pingaarnertullu suleqataasut qanimut oqaloqatiginerisigut, Kalaallit Nunaanni innuttaasut ingerlaavartumik paasissutissittassagai, tusagassiuutinut nalunaarummi allassimavoq.
Issittumi sakkutooqarfiup KNR-imit ullumi apersorneqarnissani itigartitsissutigaa.
