Vivian Motzfeldt: Sakkuaattoqannginnissaanut sakkussiortoqartariaqarpoq
Nunanut allanut naalakkersuisup, Vivian Motzfeldtip islandimi, Danmarkimi Norgemilu illersornissamut ministerit fregattimi Niels Juelimi ippassaq tusagassiortunik katersortitseqatigai.
Tusagassiortunik katersortitsinermi nunat qulaani taaneqartut aamma Sverigep, Tysklandip Frankrigillu akornanni sakkutooqarnikkut sapaatip akunnerani matumani sungiusarneq Arctic Light pissutaavoq.
Nunanut allanut naalakkersuisup, Vivian Motzfeldtip (S) oqarnera naapertorlugu sakkussiorneruneq Issittup sakkuaaffiunnginnissaanut - aamma siunissami qulakkeerutaassaaq.
- Sakkuaaffiunnginnera pingaarutilimmik salliukkipput pingaarutilerujussuusoq oqaatigisariaqarparput. Uagulli salliussatsitut sakkuaaffiunnginnera atatiinnarneqassappat, sakkutuuliinerunissaq ullutsinni pisariaqarpoq.
- Sakkuaattoqannginnerata uagutsinnut pingaarutilimmik salliunneqarnera oqaatigissallugu pingaaruteqarluinnarpoq. Sakkuaattoqannginneratali attatiinnarnissaanut sakkussiornissaq ullumikkut pisariaqarpoq.
Nunanut allanut politikkikkut periusissiamut unioqqutitsinerusoq?
Inatsisartut nunanut allanut politikikkut periusissiaq 2024-2033 naalakkersuisut malitassaat akuerinikuuaat. Tassanilu Issittumi sakkuaattoqannginneq eqqissinerlu arlaleriarlugit eqqaaneqarput – tassanilu sakkussiorneq sakkutooqarnerunerlu eqqartorneqaratik.
Tamanna pissutigalugu Pele Brobergip sakkussiuleruttorneq neriorsuutinik unioqqutitsinerusutut ilaatigut taavaa. Aamma Pipaluk Lyngep (IA) periusissiaq isumaqatigiinniutigineqaqqittariaqartoq KNR-imut oqaatigaa.
Pipaluk Lynge aamma Pele Broberg nunanut allanut sillimaniarnermullu ataatsimiititaliami siulittaasutut siulittaasullu tulliattut atuupput.
Vivian Motzfeldt tusagassiortunik katersortitsisoqarnerani isornartorsiuineq pillugu paasitinneqarpoq.
Sakkussiorneq sakkuaattoqannginnissaanut nunanut allanut periusissiamut akerliliisoraajuk aamma periusissiaq isumaqatigiinniutigeqqinniarpiuk?
- Sakkuaattoqannginnissaa pingaaruteqarluinnarpoq, attanneqarnissaanulli sakkussiortoqartariqarpoq. Pissutsit pissutigalugit siusinnerusukkut sungiusimasatsinnit nutaanik aalajangiikulanerusariaqarpugut. Periusissiatsinnut atatillugu pissutsinut maanna atuuttuni naleqqussaasoqartariaqartoq eqqumaffigilluinnarparput, Vivian Motzfeldt oqarpoq.
Pipaluk Lyngep aamm Pele Brobergip naalakkersuisut KNR-ikkut isornartorsiorpaat. Ataatsimiititaliaq nalaagaaffimmit tikeraartoqarnissaa soorlu tyskit illersornissamut ministeriata tullersortaata tikinnissaa pillugu ilisimatinneqarsimanngitsoq oqaatigaat.
Qanqo paasissutissiissuteqarfigineqarnerulernissaa qulakkeerniarpiuk, aamma naalakkersuisut ataatsimiititaliamik avaqqutsiinnarniarpat?
- Ataatsimiititaliaq pisut annertuut pillugit sapinngisamik ilisimatinneqartarnissaata ersarissarnissaa pingaaruteqarluinnarpoq. Tyskit tikeraarneranni aamma taama iliorpugut. Nunarujussuarmi najugaqarpugut, ilaasortallu tamarmik Nuummiittuaannanngillat. Aaqqissuussinerni annertuuni ilisimatitsisarpugut.
Toqqissisimavit?
Kalaallit sakkutooqarnerulernera toqqissisimaffigineraat isumannaannissamullu pisariaqarnersoq nunanit allanit tusagassiortup tusagassiortunik katersortitsinermi apeqqutigaa.
- Nunatsinni innuttaasut pissutsini qanoq pisariaqartitsisoqarnerani qanoq akuunerulersinneqarnissaat ukkataringaatsiarparput, Vivian Motzfeldt oqarpoq, nangillunilu:
- Nunavit illersornissaa qulakkeerniarukku taava iliuuseqarfigisariaqarpat. Kalaallit Nunaata illersorsinnaanissaanut qanoq iliuuseqartoqarnissaa ilisimaneqassaaq.
