Naalakkersuisuni arlallit tupaallaataapput
Siumup siulittaasuata, Kim Kielsenip, Naalakkersuisuulersussat tallimanngornermi ullup qqqata siorna ilisaritippai, naalakkersunngortussallu allallit tupaallatissaapput.
Immikkut maluginiagassaavoq. Kim Kielsenip Siumup siulittaasuata tullia Karl Kristian Kruse Naalakkersuisunut ilaatinngimmagu.
Kim Kielsen naapertorlugu Karl Kristian Krusep tamanna nammineq kissaatigaa.
AAMMA ATUARUK Naalakkersuisut nutaat takukkit
Karl Kristian Kruse Naalakkersuisoqatigiit siuliini aalisarnermut naalakkersuisuuvoq malunnaateqarluartoq. Taanna aalisarneq pillugu Naalakkersuisut inatsisissatut siunnersuutaannik saqqummiussisuuvoq.
Kim Kielsenilli Naalakkersuisut nutaat tassanga suliaqarneranni Erik Jensen siuttuussasoq qinerpaa.
Pele Broberg pissaaneqarfiusumik inissittoq
- Naalakkersuisut siulittaasuat aamma pinngortitamut avatangiisinullu naalakkersuisoq Kim Kielsen
- Ineqarnermut attaveqatigiinnermullu naalakkersuisoq Simon Simonsen, siulittaasup tullia
- Aningaasaqarnermut, sulisoqarnermut akileraarutinut akitsuutinullu naalakkersuisoq, Pele Broberg
- Isumaginninermut, ilaqutariinermut inatsisinullu naalakkersuisoq Anthon Frederiksen
- Inuussutissarsiornermut niuernermut nukissiuuteqarnermullu naalakkersuisoq Aqqalu Jerimiassen
- Aatsitassanut suliffeqarnermut nunamut namminermut aamma inatsimmut tunngaviusussamut tunngasunut naalakkersuisoq Vittus Qujaukitsoq
- Peqqissutsimut ilisimatusarnermullu naalakkersuisoq Doris Jakobsen Jensen
- Ilinniartitaarnermut, kultureqarnermut ilageqarnermut aamma nunanut allanut naalakkersusoq Vivian Motzfeldt
- Aalisarnermut piniarnermut nunalerinermullu naalakkersuisoq Erik Jensen
Aamma maluginiagassaavoq Partii Naleqqameersoq, Pele Broberg, politikkimik suliaqarnermi nutaarluinnaasoq, taavalu aamma nammineq oqarneratut qinersinissaq sioqqutilaarlugu aatsaat sassarniarluni aalajangertoq.
Taannalu natsinni pissaaneqarnerpaat ilaattut inissippoq, tassalu aningaasaqarnermut naalakkersuisutut.
Naalakkersuisoqatigiit Atassutip Siumullu saniatigut aamma Partii naleqqamik Nunatta Qitornaanillu ilaqarput.
Aamma partiiarannguup Nunatta Qitornaasa siulittaasuat, Vittus Qujaukitsoq, naalakkersuisoqatigiilersussanut aalajangiisussaasumik tunuliaqutsiinerminut akilerluarneqarpasippoq.
Qujaukitsoq namminersulivinnissamik suliaqassaaq
Suliassaqarfiit agguataarneqarnerat qiviariarutsigu, taava Qujaukitsup namminersulivinnissamik tunngaviusumillu inatsisiliornissamik suliat siuttuuffigissavai.
Taakkua Qujaukitsup qineqqusaarneranut qitiulluinnarput. Taava aamma apeqqutit taakkunga tunngasut tamanit sammineqassaqaat, Qujaukitsorlu siunnerfimminik ersitsitsinissaminut periarfissaqarluassaaq.
Aamma Qujaukitsup Kielsenillu naalakkersuisuni suleqatigiinnissaannut tunngatillugu eqqaamasassaavoq, Kielsip Qujaukitsoq nunanut allanut tunngasunut ukioq ataaseq naalakkersuisooreersoq soraarsimmagu, taanna kisermaassilluni Danmark FN-imut maalaarutigimmagu.
Kim Kielsenip Naalakkersuisussai Inatsisartunit akuerineqaqqaartussaapput, tamanna inissititerluni marlunngornermi maajip 15-ani aamma pingasunngornermi maajip 16-ani ataatsimiinermi, pissaaq.
