Arnat piffissami nutaanerusumi nammineq piumassuserinngisaminnik naartunaveersaaserneqarsimasut naalakkersuisunit utoqqatserfigineqarnissartik naatsorsuutigisinnaavaat. Inatsiseqarnermut naligiissitaanermullu naalakkersuisoq, Naaja H. Nathanielsen (IA) oqarpoq.

- Arnanut pisortatigoortumik utoqqatsissuteqartoqarnissaa ilimagilluinnarpara. Maannakkorpiaq utoqqatsertoqassanngilaq, pissutigalugu arnat qanoq amerlatigisut pineqarnersut, qanga pisimanersut, sumut ataqatigiissumik pisimanersoq suli misissuleruttoratsigu, Naaja H. Nathanielsen oqarpoq.

Arnat piffissami nutaanerusumi nammineq piumassuserinngisaminnik naartunaveersaasiinermik eqqugaasimasut arlallit Namminersorlutik Oqartussanit pisortatigoortumik utoqqatsissuteqartoqarnissaa kissaatigaat.

Siumumiillu Doris J. Jensenip aamma Demokraatinit Anna Wangenheimip tamarmik Inatsisartuni Ilaqutariinnut Peqqinnissamullu ataatsimiititaliami ilaasortaasut naalakkersuisut arnanut utoqqatsertariaqarsoraat.

Naalakkersuisulli spiralilersuisoqarsimaneranik qulaajaaneq maanna ilisimatusartunit arlaannaanut attuumassuteqanngitsunit suliarineqaleruttortoq utaqqeqqaarniarpaat. Qulaajaanermi 1960-imit 1991-mut pisut qulaajaarneqarput. Nunatta peqqinnissamut oqartussaaffik Danmarkimit 1992-imi januaarimi tiguaa.

Naalakkersuisut tamatuma saniatigut qulaajaanermik aamma aallartitsiniarput, tassani spiralilersuisoqarnerani inuit pisinnaatitaaffiinik sunik unioqqutitsisoqarsimanersoq qulaajarneqassaaq. Qulaajaanermilu tassani piffissaq ullumikkut tungaanut misissorniarneqarpoq. Qulaajaanertit tamarmik 2025-mi maajimi naammassinissaat naatsorsuutigineqarput.

- Immikkut ilisimasallit naalakkersuisut pilersinniagaat ukiunut aalajangersimasunut killilerneqassanngillat. Taamaammat 1992-ip kingorna sulianik paasissutissanillu nutaanik takkuttoqarsinnaanera ammaffigaarput, Naaja H. Nathanielsen oqarpoq.

Isumakkeerfiginnissinnaajumaarpunga?

Nakorsaaneqarfik naapertorlugu arnat 15-it piffissami kingusinnerusumi nammineq piumassuserinngisaminnik naartunaveersaaserneqarsimapput. Tamanna nakorsaaneqarfiup nalunaarusiami maajimi saqqummiussaani atuarneqarsinnaavoq.

Suliat ilaat 1990-ikkunni pisimapput, suliallu sinneri 2000-ikkunnit 2014-imut pisimallutik.

KNR-ip arnat pingasut piffissami nutaanerusumi nammineq piumassuserinngisaminnik naartunaveersaaserneqarsimasut oqaloqatiginikuuai.

Emma Kuko, nammineerluni ikkussivigineqarnerminik eqqaamasaqanngitsoq, spiraleqarsimanerminillu 2019-imi paasisaqarsimasoq taakku ilagaat.

Spirali Emma Kukop Tasiilami napparsimmavimmi 2010-mi pilatsilluni naartuversinneranut atatillugu ikkunneqarsimassangatinneqarpoq. Taamaalillunilu ilisimanagu ukiuni qulingiluani spiraleqarsimavoq.

- Artornaqaaq qanoq pisoqarsimanera kingumut eqqarsaatigalugu. Naluara isumakkeeriffiginngisaannassanerlugu, Emma Kuko oqarpoq.

Taamaammat aamma arnat eqqugaasimasut Namminersorlutik Oqartussanit pisortatigoortumik utoqqatserfigineqarnissaminnik kissaateqartut ilagaat.

Sulialli misissorluaqqaarnissaa pingaaruteqartoq, Naaja H. Nathanielsen isumaqarpoq.

- Suliap amerlanerusunngoratarsinnaanissaa ilimasuutigaarput. Suliat nutaanerusut 15-it Nakorsaaneqarfiup ilimasaasa saniatigut allanik takkuttoqarsinnaanissaa eqqarsaatigineqanngitsoorsinnaanngilaq.

- Taamaammat eqqortunut eqqortumillu utoqqatsernissarput qulakkeerniarlugu nalunaarusiat uku aappaagu maajimi piareertussat utaqqeqqaarniarpagut, taanna oqarpoq.

Naaja H. Nathanielsenip qulaajaanerit nutaat naalakkersuisut aallartitaasa imarisaat qaammatialuit tulluittut ingerlaneranni saqqummiussinnaanissaat naatsorsuutigaa.