Millionilikkuutaat naalagaaffeqatigiinni ilisimasaqarnermik pitsanngorsaataassasut

30 millionit koruunit naalagaaffeqatigiinni ilisimasanik pitsanngorsaanissamut ukioq naanngilaartoq atortussanngortinneqarput.

Danskit naalakkersuisui naalagaaffeqatigiinni ilisimasaqarnerulernissamut ukiumut 10 millionit koruuninik 2027-p tungaanut immikkoortitsisalernissamut siorna aalajangermatali aningaasat immikkoortinneqarput. Aningaasat qanoq agguataarneqarnissaat maanna aalajangerneqarpoq.

Nunatsinni kulturikkut paarlaasseqatigiinnissaq festivalernissarlu suliniutissatut allattorsimasut akornanniipput. Aningaasalli amerlanerpaartaat nunatsinnut atassuteqarnermut oqaluttuarisaanermeersunik toqqortiterinissamut atorneqassapput, massa kulturikkut paarlaasseqatigiinnermut 8 millionit koruunit atorneqassasut.

Suliniutit assigiinngitsut sunik imaqarnersut erseqqissumik allaqqanngilaq. Folketingimut ilaasortaq Aki-Matilda Høegh-Dam Naleqqameersoq aperigaanni, siunnersuutaa suliniutini ataatsimoortuni ilaanersoq nalornissutigaa.

- Kalaallit kultureqarnermut tunngasoqarfiisa ukkatarineqarnissaat uagutsinnut pingaaruteqarpoq. Assersuutigalugu kalaallit kalaallisuui ukkataralugit imaluunniit ileqqutoqqavut pillugit ilisimasaqarnerulernissamut, nunatsinni tivasartut peqatigiiffiannut aningaasaliisoqarsinnaavoq.

- Tamatuma saniatigut kalaallit oqaluttuarisaanerinnaanngikkaluartoq kisianni aamma ullutsinni kulturitsinnut paasinninnerulersitsisussanik, ilinniarnermi atortussianik ineriartortitsinissarput ukkataraarput, Aki-Matilda Høegh-Dam oqarpoq.

Ataatsimoortitsiffiusut

IA-meersup folketingimut ilaasortap, Aaja Chemnitzimut nunatsinni kulturikkut avatangiisit pingaarnerutinnissaat pingaaruteqarsimavoq. Sisimiuni Arctic Soundimut aamma Nuummi eqqumiitsuliornermik festivalimut Suialaa Arts Festivalimut 2,5 millionit koruunit immikkoortinneqarput.  

- Kulturikkut aaqqissuussinernik ataatsimoortitsiffiusinnaasunik kalaallillu kulturiannik siammarteriffiusinnaasunik peqarnissaa pingaaruteqarpoq. Iluatsilluartunik peqareerpoq, taakkulu taperserniarpagut, folketingimut ilaasortaq oqarpoq.

Tamatuma saniatigut ataqatigiinnissap ukkatarineqarnissaa pingaaruteqartoq, Aaja Chemnitz isumaqarpoq. Taassuma oqarnera naapertorlugu tamanna Inatsisartunut qinersinermit aamma Donald Trumpip USA-p nunatsinnik aqutsilertariaqarneranik oqaaseqaqattaarneranit tatineqarpoq.

- Kalaallit inuiaqatigiit akornitsinni ataqatigiinneq tatineqarpoq. Avissaartuutsitsinertut ittumik pilersitsivoq. Ataatsimut isumaqatigiissutigisinnaasatsinnik katersuunnissarput pingaaruteqarpoq, tamannalu kalaaliusugut kulturerivarput ukkatarinerulerusullutigulu, taanna oqarpoq.

Periarfissaaraq

Folketingimit nunatsinnut ukioq manna aningaasaliissutit immikkut ittumik amerlapput. Taakku ministeriunerup, Mette Frederiksenip aamma naalakkersuisut siulittaasuata Jens-Frederik Nielsenip (D) killiussanut 1,6 milliardit koruuninik aningaasaliinissamut septembarimi isumaqatigiissuteqarneranni amerlanerpaalerpoq.

Nunatta sammineqangaatsiarnera isumaqatiginninniarnermut malunniutaangaatsiartoq, Aaja Chemnitz oqarpoq.

- Annerusunik isumaqatigiissuteqarnissamut ajornaannerutitsivoq. Ukiulli assinganik takoqqinnavianngikkipput aamma ilimagaara. Kalaallit Nunaata sammineqarnerani periarfissaarannguuvoq ullormiit ullormut matujartortoq.

- Taamaammat qinigaaffimmi matumani nunatsinnut angusarpassuaqarnissarput uagutsinnut pingaaruteqarluinnarpoq. Danskit aamma nunani allamiut nunatsinnik sammisaqarneranni immikkut ittumiippugut, tamannali tassanngaannartumik assigiinngitsorpassuarnut sangujoraalersinnaavoq.

Aki-Matilda Høegh-Damittaaq soqutiginninnerujussuaq malugaa.

- Ilumut. Isumaqatiginninniarneriniinnaanngitsoq aammali ataatsimiititaliani ataatsimiinnerni. Christiansborgimi aatsaat taama Kalaallit Nunaat pillugu oqallittoqartigaaq, taanna oqarpoq nangillunilu: 

- Folketingimut ukiut arfinillit matuma siorna qinigaaqqaarama oqaluttuunneqarpunga Kalaallit Nunaannut ataatsimiititaliami ukiumut ataasiarluni marloriarluniluunniit ataatsimiittoqartartoq. Tamatuma pisarnera allanngortipparput. Soqutigineqartorujussuuvoq, inatsisissatut siunnersuutit amerlanerupput, ukioq mannalu politikikkut pisut tunngavigalugit Kalaallit Nunaannut aningaasaliinerit.