Sisoraatinik oqilaniunneq: Marika Magnussen aamma Sasja Joelsen Henriksen inuusuttuaqqani VM-imut anngupput
Sisoraatinik oqilaniunnermi piukkunnaatilinnik Nunatsinni inerisaaneq inerititaqarlualerpoq.
Taakku tassaapput Marika Magnussen Nuummi NSP-meersoq aamma Sasja Joelsen Henriksen SSP Sisimiuneersoq inuusuttuaqqat Norgemi 2026-mi marsip aallartilaarnerani VM-ernissaannut annguttut.
VM-imi peqataanissaq qanittukkut qulakkeerneqarpoq norskit toqqagaaniullutik unammineranni tassanilu kalaallit unammisaat tassaapput sisoraatinik oqilaniunnermi inuusuttuaqqat nunarsuarmi kakkannerpaat ilaat.
Sisorartartut nunarsuarmi kattuffissuanni FIS-imi Nunarput immikkut ilaasortaanngilaq. Taamaattumik nunarsuarmi pissartanngorniuttoqartillugu qallunaat erfalasuat atorlugu kalaallit unammisarput. Maannalu VM-ertoqarnissaanut qallunaat sisorartartut kattuffiata piumasaqaatigaa anngunniulluni unamminermi ajugaasumiit 20 procenti sinnerlugu arriinnerusoqassanngitsoq.
Marika Magnussen ajugaasumiit 9,9 procentimik arriinneruvoq Sasja Joelsen Henriksen 15,9 procentimik arriinnerusoq.
- Assorujussuaq nuannerpoq sisorartartuutitta naatsumut unamminermi anngunnissamut piumasaqaat 20 procent ataatingaatsiarmassuk. Isorartuumut aqaguani unamminermi aamma taama pisoqarpoq. Taamaattumik oqartariaqarpoq ajaappiariarnermiit siullermiit iluatsilluartumik ingerlasoqartoq, sisoraatinik oqilaniunnermi nuna tamakkerlugu sungiusaasoq Martin Møller KNR-imut oqarpoq.
Puullaaqinarsinnaasoq
Ajaappiariarneq siulleq maluginiagassaavoq. Tassami sisorartartut ukiumut unammiffiusumut pilersaaruteqarput misiliinerit arlallit aqqusaarneranni inuusuttuaqqat VM-ernissaannut annguteriartoqassasoq. Tamannalu misiliinermi siullermi maanna iluatsippoq. Asulu unammisaat tassaallutik piukkunnaateqarluartut Norgemeersut ukioqatiminni nunarsuarmi kakkannerpaanut ilaasut.
- Ilimasoreerpunga iluatsissinnaassagaat. Kisianni piginnaasatigut sapinnginneraniit naammassiniarnissaanut aqqut takisinnaavoq. Sorpassuusinnaappummi puullaaqinarsinnaasut. Pitsaasumilli pilersaaruteqarpugut assullu nuannerpoq tamanna iluatsimmat, Martin Møller oqarpoq.
Eqqissillutik piareersarsinnaapput
Pilersaarut Martin Møllerip eqqaasaa malillugu sisorartartut Sverigemeersut toqqagaaniullutik unamminissaanni kalaallit aamma peqataassapput. Tamanna aamma naammassineqassaaq, taamaattoq siusissukkut marsimi VM-ertoqarnissaanut anngunneq eqqissilluni sungiusarsinnaanermik nassataqartussanngorpoq.
- Eqqissilluni sungiusartoqarsinnaalerpoq unamminerni angusassat pivallaarnagit. Puullaaqinarsinnaasut, sungiusarneq pilersaarusiornerlu eqqarsaatigalugit siusissukkut annguttoqarnera assut pitsaavoq. Tamanna qularutissaanngilaq, Martin Møller oqarpoq.
Marika Magnussen Nuummeersuuvoq sulilu ukioqqortunani inersimasut Nunatsinni pissartanngorniunneranni angusarissaartalerluni.
Sasja Joelsen Henriksen Sisimiuneersuuvoq Danmarkimili ukiut arlallit najugaqarluni ukiut kingulliit timersuummini siuariartorluarpoq.
