Putinip Donbas aamma Sortehavimi nunap immikkoortua oqaluttuarisaanermut pingaarutilik tiguarniarai

Ukrainep kangiani nunat, Ukrainep sakkutuuinit ullumikkut aqunneqartu, siusinnerusukkut kingusinnerusukkulluunniit Ruslandimit tiguarneqassapput - sakkutuut atorlugit imaluunniit Ukrainemiut sakkutuui namminneq tunuarpata.

Ruslandip præsidentia Vladimir Putin, Ruslandip nutaarsiassaqartitsiviisa naalagaaffimmut atasut Ria aamma Tass naapertorlugit, sisamanngornermi ullaakkut taama oqarpoq.

Putinip nunap immikkoortua Donbas, Ukrainep kangianiittoq pivaa, aammali Novorossija eqqaavaa.

Novorossija tassaavoq nunami immikkoortortaq Sortehav-ip avannaaniittoq, Ukrainep kujataaniit kangianut maannalu Ruslandiusumut, Sovjetunionip pilersinneqarnera sioqqullugu Ruslandip zarerisimasaata naalagaaffissuarisimasaata tungaanut isorartussusilik.

- Tamakku tamarmik ima inernilerneqarsinnaapput: Nunat immikkoortui taakku pinngitsaaliissummik aniguisissinnaavagut, imaluunniit Ukrainemiut sakkutuui nunanit taakkunannga qimaguttariaqarput sorsukkunnaarlutillu, Ruslandip præsidentia oqarpoq.

Nunap tiguarneqarniarnera pissutissaqarneraraa

Putin sapaatip-akunnerata aallartilaarnerani eqqissinissamik isumaqatigiissuteqartoqarsinnaanera pillugu Amerikamiut aallartitaat Steve Witkoff aamma Jared Kushner Moskvami ataatsimeeqatigereerlugit taama oqarpoq.

Putinip russit ikinnerussuteqarfiat, Donbas, Ruslandimut tunniunneqarnissaa Ukrainemi sorsunneq aallartimmatilli piumasaraa.

Ukrainep præsidentiata Volodymyr Zelenskyjip Donbasip tunniunnissaa itigartittuarpaa.

Putinip Ukrainemik 2022-mi tiguaaniarnini sioqqullugu taamaaliornini eqqortutut isigineqalersikkumallugu, Donbasimi russit ikinnerussuteqartut toqoragaanerarpai.

Donbassimi russit immikkoorniartut, Ruslandip tiguaaniarneranit ukiut arfineq-pingasut sioqqullugit, Ukrainep sakkutuuinut sorsulerput.

/ritzau/