Futsalimi qassiiliortoqareersoq: Nagdlúnguup Super Cupimi ajugaanera atuuppoq

Arsartup Nagdlúnguami Ilulissaneersumi peqataasinnaanerata apeqquserneqarnera KAK-mi unammersuarnermi ataatsimiititaliami suliarineqarpoq.
Nagdlúnguup pokali ujammillu kuultit Super Cupimi pissarsiat pigiinnassavai Assi © : B-67
Allattoq Noah Mølgaard
novembarip 19-at 2026 15:01

Qassiiliutaaleraluarpoq Futsal Super Cupimi Nagdlúnguup ajugaanera atuuttussaanersoq. Young Guns Futsalip naammagittaalliutaa KAK-mi unammersuarnermut ataatsimiititaliamut tunniunneqarpoq. Suliaq sivisuumik suliarineqareersoq unammersuarnermi ataatsimiititaliaq naammagittaalliummut itigartitsivoq.

- Ataatsimiititaliap pissutsit tamaasa ataatsimut nalilersoreerlugit aalajangerpaa Nagdlúnguup pissartanngornini pokalilu pigiinnassagai, Kalaallit arsaattartut kattuffiat tusagassiuutinut nalunaarpoq.

Akunnattuungallutik Nagdlúnguup illersuisui sapaatiummat Futsat Super Cupimi finalemi illersuissallutik issaapput. KAK-mi unammersuarnermut ataatsimiititaliap ilisimatitsissutaa Facebookimut ikkunneqartoq siammarterneqareersimavoq.
Tassani allassimavoq Nagdlúnguak ajugaassaguni ajugaanerminik arsaagaasinnaasoq arsartoq aalajangersimasoq atussaguniuk.
 

Kukkoqqikkusunngillat
 

Angutit Super Cupimi unammineranni Nagdlúnguak finalemi 6-2-mik ajugaavoq. Finale naammassimmat naammagittaalliut unammersuarnermi ataatsimiititaliami suliaralugu aallartinneqarpoq. Suliap naammassinera aatsaat sisamanngornermi nalunaarutigineqarpoq.


- Nuannaarutigaarput suliaq maanna naammassineqarmat. Peqatigiiffik kattuffillu tamarmik kukkussuteqarsimapput. Pingaarnerpaavoq akisussaaffimmik tigusinissarput, pisimasunit ilinniarnissarput aammalu assingusumik ajornartorsiuteqartoqannginnissaata qulakkeernissaa, KAK tusagassiuutinut nalunaarummi allappoq.
 

- Malittarisassat erseqqissuutittariaqarpavut, nakkutilliinerput pitsaanerulersittariaqarparput, suliallu tamarmik sukkasuumik naapertuilluartumillu suliarineqartarnissaat qulakkeertariaqarparput. Tamanna peqatigiiffinnut unammisartunullu pisussaaffigaarput, KAK-p nalunaarunni ilavaa.
 

Suliaq aallartippoq Nagdlúnguami unammisartut allattorsimaffiini nalunaarsukkat malittarisassanut naapertuuttuunngitsut pasitsaanneqarmat. Unammisartutut inuit 18-it nalunaarsorneqarsimapput, naak malittarisassat naapertorlugit amerlanerpaamik 17-it nalunaarsorneqarsinnaagaluartut.
 

Kingorna misissuinermi paasinarsivoq, nalunaarsorneqarsimasut ilaat ataaseq unammisartuusimanani unammisartunik ikiuuttuusimasoq unamminernilu peqataasimanngitsoq. Taamaalilluni unammisartut 17-it sinnerlugit unammeqataasoqarsimanera uppernarsineqanngilaq. 


Ataatsimiititaliap naliliinermini aamma pingaartippaa, KAK-p nammineq unammisartut allattorsimaffiinik nakkutilliinera taakkuninngalu suliarinninnera naammaginarsimanngitsut. Aamma suliap kingorna suliarineqarnera sivisuallaarsimavoq.
Maanna inissippoq Nagdlúnguup Super Cupimi pokalinnattaani ujammillu kuultit angerlaassat pigiinnassagai.