Kommune Kujalliup imigassamik aalakoornartortalimmik inerteqquteqarneq atorunnaarsippaa – sukannersumilli piumasaqaateqarluni

Kommune Kujallermi imigassamik aalakoornartortalimmik pisisoqarsinnaaleqqippoq. Kommunalbestyrelsip sisamanngornermi ataatsimiinnermini tamanna aalajangerpaa. Aalajangernerli naalakkersuisunit akuerineqaqqaassaaq.
Assi © : Kommune Kujalleq
Allattoq Emil Weis
novembarip 19-at 2026 12:32
Nutserisoq Connie Fontain

Kommune Kujallermi imigassap siunissaa pillugu sisamanngornermi aalajangiisoqarpoq.

Tamanna kommunalbestyrelsip ataatsimiinnerani imigassamik aalakoornartortalimmik nioqquteqarneq ammaqqinneqassanersoq oqaluuserinninnermi tamanna aalajangerneqarpoq.

Kommunalbestyrelsip imigassamik aalakoornartortalimmik nioqquteqarneq periarfissaalerpat ammaqqinneqassasoq isumaqatigiissutigaa.

Kommune Kujallermi imigassamik aalakoornartortalimmik nioqquteqarneq tallimanngornermi, oktobarip aappaannili inerteqqutaalerpoq. Kommunimi imigassartornerup kingunerisaanik arlalinnik ilungersunartunik pisoqareernerani tamanna aalajangerneqarpoq.

Kommune Kujalleq imigassap siunissaa pillugu siunnersuutinik marlunnik sisamanngornermi ataatsimiinnissaq sioqqullugu saqqummersitsivoq.

Siunnersuutit kommunip tusarniaanera tunuliaqutaralugu suliarineqarput, tassani politiit, inuussutissarsiuteqartut, peqqinnissaqarfillu ilaatigut tusarniaaffigineqarput.

Tusarniaaneq tunngavigalugu siunnersuutip aappaa imigassamik aalakoornartortalimmik inerteqquteqarnerup ingerlateqqinnissaanut tunngassuteqarpoq. Siunnersuutip aappaa tuniniaanerup sukannersunik arlalinnik piumasaqaateqarfiusumik ammaqqinneqarnissaanut ilaatigut tunngassuteqarpoq.

Siunnersuullu kingulleq akuerineqarluni.

Imigassamik aalakoornartortalimmik nioqquteqarnermi imigassanik 22,9 procentit sinnerlugit procentitaqartunik killiliisoqarnissaa sukannersumik piumasaqaateqarnermi sisamanngornermi akuersissutigineqartumi ilaavoq.

Tamatuma saniatigut imigassamut killilersuinermik misissuisussanik aalajangiisinnaasumik ataatsimiititaliortoqassaaq.

Imigassamik aalakoornartortalimmik nioqquteqarnerup ammaqqinneqarnissaanut aalajangernerup atuutilinnginnerani aalajangerneq naalakkersuisunit akuersissutigineqaqqaassaaq.

Ammaaqqinnissaq siammasissumik isumaqatigiissutigineqartoq

Kommunalbestyrelsimi ataatsimiinnermi imigassamik aalakoornartortalimmik nioqquteqarnerup inerteqqutaaginnarnissaa arlalinnik isornartorsiorneqarpoq.

- Matoqqatitsineq sivisuallaarpoq. Innuttaasut tatigeqqullutik oqariartuuteqarput, Maaliaaraq Nielsen (S) ataatsimiinnermi oqarpoq.

- Inuit aalajangersimasut ikiorneqarnissamik pisariaqartitsisut innuttaasullu tamarmik pisariaqartitsinngitsut erserpoq, Simon Simonsen (D) nammineq isummani pillugu oqarpoq.

Inuit Ataqatigiinnit Pipaluk J. Larsenip imigassamik aalakoornartortalimmik ajornartorsiuteqarneq Kommune Kujallermi immikkuullarittutut isigineqartariaqanngissoraa.

- Imigassamik aangajaarniutinillu ajornartorsiuteqarneq Kommune Kujallermi kisimi ajornartorsiutaanngilaq.

Borgmesterip, Malene Vahl Rasmussenip (D) oqarnera naapertorlugu ammaaqqinnissaq januaarip aallaqqaataata tungaanut utaqqissunneqartariaqaraluarpoq.

- Juullingajalerpoq, amerlasuulli juullernissaanut qilanaanngillat. Decembarip 23-at politiit ulapaarfiginerpaasaraat kisitsisinik naatsorsueqqissaarnerup takutippaa, Malene Vahl oqarpoq:

- Kisianni taasineq ataqqivara.

Nioqquteqarnerup erngertumik ammaqqinneqarnissaa qulingiluanik akuersissutigineqarpoq marlullu januaarip aallaqqaataanut utaqqissukkusullugu taasillutik.

Aalajangiineq isumaqatigiinngissutaasoq

Malene Vahl Rasmussenip imigassamik aalakoornartortalimmik nioqquteqarnerup matuneqarnissaa pisariaqartoq KNR-imut siusinnerusukkut oqaatigaa.

- Imigassamik atueriaatsip nuanninngitsumik avatangiisinut sunniuteqartartut uniinnarluta isiginnaaginnarsinnaanngilagut, inuiaqatigiinnilu nuanninngitsumik pisoqaqqinnissaa utaqqiinnarlugu, taanna oqarpoq.

Qaqortumi innuttaasut ilaasa imigassamik aalakoornartortalimmik nioqquteqarnerup unitsinneqarnissaa isumaqatigigaat allat tamanna ingattarsernerusoraat.

Assersuutigalugu Qaqortumi utoqqaat illuanni Ajarsivasimmi tamanna amerlanerusut akissarsinermi kingorna suliartorneratigut pitsaasumik sunniuteqartoq maluginiarneqarpoq.

Inuussutissarsiortuniilli imigassamik aalakoornartortalimmik matusineq sakkortuumik isornartorsiorneqarpoq. Imerniartarfinnik Hinnarissuasimmik Rockhousemillu piginnittut sulisutik aqqaneq-marluk soraarsittariaqarsimavaat.

Kommunalbestyrelsip sisamanngornermi ataatsimiinnerani imigassamik nioqquteqarnerup ammaqqinneqarsinnaanissaanut piareersaateqartoqarnissaa pingaartinneqarpoq.

Carsten Olesenip (D) tassunga atatillugu imigassamik aalakoornartortalimik matoqqatitsisoqarnerata nalaani nammineq kajumissutsiminnik suliaqarsimasut aamma qujassuteqarfigai.