Meeqqanut inuusuttunullu suliniut nutaaq: Issittumi inuusinnaanissaq uani pineqarpoq

Issittumi Sakkutooqarfiup suliniut nutaaq "Juniorvogterne"-mik taaguutilik aallartippaa. Meeqqat inuusuttullu aqqaneq-marluk 17-illu akornanni ukiullit Issittumi inuusinnaanissamut piginnaasaqalernissaat matumani qulakkeerniarneqarpoq.
Flotilleadmiral og vicechef i Arktisk Kommando Lars Nielsen og konstabel og projektkoordinator for Juniorvogterne i Arktisk Kommando Ivalu Hansen Zeeb Assi © : KNR/Anne Sofie Porsmose
Allattoq Mads Lynge
novembarip 18-at 2026 11:22

Sinerissami sumiiffiit ilaanni ajutoortoqassagaluarpat ikiuisoqartariaqalissappallu tamanna meeqqanit inuusuttuniilluunniillu aamma pisinnaalissaaq.

Meeqqat inuusuttullu aqqaneq-marluk 17-illu akornanni ukiullit suliniummut nutaamut peqataasinnaalissapput, Issittumi inuusinnaanissamut assigiinngitsutigut pikkoriffeqalerlutillu piginnaasaqarfeqalersinnaassallutik.

Issittumi Sakkutooqarfiup suliniut "Juniorvogterne" aallartippaa.

Suliniut taanna Qaqortumi ukioq manna aallartinneqarpoq, meeqqat inuusuttullu arfineq-pingasut tassani peqataallutik.

Inuusuttut assigiinngitsunik tassani ilinniartinneqartarput.

Ivalu Hansen Zeeb, Issittumi Sakkutooqarfimmi konstabeli, Juniorvogternemillu ataqatigiissaarisoq. Assi © : KNR/Anne Sofie Porsmose

Ivalu Hansen Zeeb, Issittumi Sakkutooqarfimmi konstabeli, "Juniorvogterne"-millu ataqatigiissaarisoq, taama oqaluttuarpoq:

- Kingullermik Qaqortumiikkatta ikiueqqaarnermik ilinniartitsivugut. Uummarsaanermik aallutaqarpugut, suleqatigiilluta uummarsaanermik ilinniartitsilluta, ikiueqqaarnikkut isumannaallisaanermik ilinniartitsilluta.

Issittumi Sakkutooqarfiup decembarimi Qaqortuliaqqinnissaa pilersaarutaavoq tassani ilinniartitseqqissalluni. Issittumilu Sakkutooqarfiup aappaagumiit atuutilersumik qaammatit allortarlugit siunissami Qaqortumiittalernissaa taassuma saniatigut pilersaarutaavoq.

Suliniutip sinerissap sinneranut kingorna siammarterneqarnissaa aamma pilersaarutaavoq.

Isorliunerusunut pingaaruteqassaqisoq

Meeqqat inuusuttullu Kalaallit Nunaanni sumiiffinni assigiinngitsuni inuuneq pillugu paasisimasaqarnerulernissaat suliniummi siunertaasoq, sakkutuut imarsiortut naalagaasa ilaat, Issittumilu Sakkutooqarfimmi qullersap tulliata Lars Nielsenip oqaatigaa.

Inuusuttut sumiiffinni innuttakinnerusuni taassuma saniatigut piginnaasaqarnerulissasut taanna nassuiaavoq:

- Piginnaasaqalissapput, pingaartumik ikiueqqaarnermi, sumiiffimmi atorsinnaasassaminnik. Inuusuttut (Juniorvogterne, aaqq.) siunissaq eqqarsaatigalugu nukittunerulissapput, Issittumi inuunissamut nukissaqartinnerulerlugit. Piginnaasaqalerfigisatillu aqqutigalugit sumiiffimmi ikiuisinnaalissallutik, taanna oqaluttuarpoq. 

Piginnaasat tamakku amigaatigineqaramik? 

- Ikiueqqaarnermi piginnaasat asimilu angalasinnaaneq, pingaartumik Kalaallit Nunaanni, nunarsuullumi sinnerani, piginnaaniupput kikkut tamarmik pigisariaqagaat. Inoqatinik ikiuisoqarsinnaaniassammat, Lars Nielsen nassuiaavoq.

Sumiiffiit ilaanni ikiuisinnaasut ungasissumiissinnaammata ilinniartitsineq pingaaruteqartoq taassuma erseqqissaatigaa.

- Illoqarfiimmi nunaqarfiillu nunami isorartuumi sumiiffinni assigiinngitsuni inissisimapput. Ajutoortoqassagaluarpat, arlaatigulluunniit ajunaarnersuaqalissappat assigisaannilluunniit, sumiiffinni assigiinngitsuni ikiueqqaartoqarsinnaanissaa taamaammat pingaaruteqarpoq, ikuiartortussat takkunnissaasa tungaannut.

Piffissami ajornartoorfiusumi piginnaasaqarneq 

Meeqqat inuusuttullu amerlanerusut "Juniorvogterne"-nut siunissami peqataarusussinnaanissaat, Ivalu Hansenip Zeeb Lars Nielsenillu neriuutigaat.

- Inuusuttut arfineq-pingasut Qaqortumi ilinniartinneqartut peqataanissaminnut soqutiginnittorujussuupput. Amerlanerusullu tulliani peqataanissaat neriuutigaarput, Ivalu Hansen Zeeb oqarpoq.

Lars Nielsen, flotilleadmiral og vicechef i Arktisk Kommando  Assi © : KNR/Anne Sofie Porsmose

Inuusuttut "Juniorvogterne"-mi piginnaasaqalerfigisimasatik siunissami aamma eqqaamajumaaraat taassuma aamma neriuutigaa:

- Meeqqat inuusuttullu piginnaasaminnik sumiiffinni atorsinnaassagaat neriuutigaara, inersimasunngorunillu piginnaasat taakku suli atorsinnaassagaat aamma.

Upalungaarsimanissap pingaaruteqassusaa, tamannalu pillugu ilisimasat, Issittumi Sakkutooqarfiup taassuma saniatigut pingaartippaa. Suliniut una tamanna pillugu pilersinneqarpoq. Ullumikkut pisut aamma eqqqarsaatigalugit:

- Upalungaarsimanissamut tamanna soorunami attuumassuteqarpoq. Ullumikkut pisut eqqarsaatigalugit iluaqutaasinnaanissaa soorunami aamma pineqarpoq, Lars Nielsen oqarpoq, nangillunilu:

- "Juiniorvogterne"-miittut toqqaannartumik sulisorineqarnissaat eqqarsaataanngilaq. Issittumili Sakkutooqarfiup annaassiniartarnermi aamma akisussaaffia tassuuna oqilisaanneqalaassaaq, inuusuttummi sumiiffinni assigiinngitsuni ikiuagasuarsinnaanerat, ajutoortoqarnissaanullu pinaveersaartitsisinnaanerat pingaaruteqarpoq. Sumiiffinni ataasiakkaani ikiuagasuartoqarsinnaalissaaq, ikiuartortussat takkunnissaasa tungaannut, taanna oqarpoq.