Kunngeqarfik Canadalu illersornissamut nutaamik isumaqatigiissuteqarput
Ilanngutassiap saqqummersinneqarneraniit nunanut allanut tunngasunut naalakkersuisoqarfiup Kalaallit Nunaata alapernaarsuisui Kalaallit Sakkutooqatigiivilu assigiinngissuteqartut erseqqissaatigaa. Taamaattumik ilanngutassiaq februaarip 20-anni nutarterneqarpoq.
Kunngeqarfik Canadalu illersornissaq pillugu isumaqatigiissummik nutaamik atsioqatigiipput.
Tyskit illoqarfianni Münchenimi, NATO-mut ilaasortat isumannaallisaaneq pillugu ataatsimeersuarnermi naapipput.
Nunanut allanut naalakkersuisoq Vivian Motzfeldt (S), illersornissamut ministeri Troels Lund Poulsen aamma Savalimmiuni suleqatigisa Sirið Stenberg peqatigalugit, Canadami illersornissamut ministerimik David J. McGuinty-mik suleqatigiinnissamik isumaqatigiissummik atsioqateqarput.
Illersornissamut Ministeriaqarfiup tusagassiuutinut nalunaarummi tamanna ilisimatitsissutigaa.
Alaatsinaattuunermut aamma ilinniartitaanermut, sungiusarnermik sungiusaqatigiinnernillu nukittorsaanermut isumaqatigiissut tunngasuusoq, Illersornissamut Ministeriaqarfiup ilisimatitsissutigaa.
Canadalu suleqatigiinnissamik isumaqatigiissuteqarneq, NATO-p iluani suleqatigiinnermut tulluutiinnarani, sanilitut aamma pissusissamisoortuusoq, Vivian Motzfeldt oqarpoq.
- Canada tassaavoq Kalaallit Nunaata sanilerisaani qaninnerpaaq, NATO-milu qanittumik suleqatigisaq. Taamaammat illersornissaq pillugu qaninnerpaasatsinnik suleqateqarnissarput pissusissamisoorluinnarpoq, naalakkersuisoq tusagassiuutinut nalunaarummi oqarpoq.
Kalaallit Sakkutooqatigiivi
Kalaallit Sakkutooqatigiivi pillugit suleqatigiinnerup nukittorsarnissaanut isumaqatigiissut iluaqutaassaaq.
Immikkoortoq siullermik Naalakkersuisut Danmarkillu akornanni immikkut isumaqatigiissummi januaarimi 2025-imi tunngaveqartinneqarpoq.
Kajumissutsiminnik Kalaallit Nunaata alapernaarsuisuinik siornatigut aaqqissugaqarpoq. Isumaqatigiissuteqartut tamakkerlutik taamani ‘aaqqissuussinerup ineriartornissaanut ilippanaatinik misissuinissamut piareersimapput’.
Canadian Rangers aamma qissimigaarneqarput. Tassani Danmark Nunarpullu Nunatsinni assingusumik peqalersinnaanissaanut misissueqqissaarniarlutik isumaqatigiipput.
Nuna tamakkerlugu sumiiffinni upalungaarsimanermut tapertaasussanik nammineq piumassutsimik nalunaaruteqartarfeqalernissaanut, misissueqqissaaneq aallartinneqassaaq.
- Canadami 'Canadian Rangers'-it isorliunerusuni sissamilu suliassanik Canadamiut illersornissaqarfiat sinnerlugu isumaginnittarput. Kalaallit Nunaanni taamaaqataanik najoqqutassiamik ineriartortitsisinnaanermut periarfissat misissoqqissaarneqassasut, immikkut isumaqatigiissummi siullermi taama allassimavoq.
Sakkutooqatigiit immikkut isumaqatigiissutip aappaanni oktobarimeersumi atserneqarput: Kalaallit Sakkutooqatigiivi.
Canadamiut misilittagaat maanna Kalaallit Nunaannut iluaqutaalernissaat, Vivian Motzfeldtip qilanaaraa.
- Canadamiut 'Greenland Ranger'-imik suliniut pillugu suleqatiginissaat qilanaaraara, nunanut allanut naalakkersuisoq oqarpoq.
- Canadamiut illersornissamut suliassanik isumaginninnerminni nunaqavissunik peqataatitsinermik pitsaasunik misilittagaqarput, misilittagaallu taakku ilaatigut atorumaarpagut.
Ikinngutinik pisariaqartitsineq
Kunngeqarfik Danmark piffissami matumani ikinngutinik pisariaqartitsisoq, Illersornissamut ministerip aamma erseqqissaatigaa.
Isuqatigiissut nutaaq tamatumunnga ersiutaasoq taanna isumaqarpoq.
- Kunngeqarfik - Danmark, Savalimmiut Kalaallit Nunaallu - Canadamiullu illersornissakkut suleqatigiinnissamik isumaqatigiissuteqarluta ataatsimoorluta maani sassaqatigiissinnaagatta nuannaarutigaara, tamanna ataatsimoorluta isumannaallisaanissatsinnut nukittorsaaqataavoq.
- Ikinngutivut pisariaqartippavut, atassuteqaatit nukittorsarnissaannut siunissamilu suliassanik ataatsimoorluta isumaginninnissatsinnut Canadamiut piumassuseqarnerat peqataaffigaarput, illersornissamut ministeri Troels Lund Poulsen oqarpoq.
