Naja Lyberth kalaallit arnartaat pillugit ilungersuuteqarnerminut Nersornaaserneqartoq
Inatsisartut siulittaasuata Kim Kielsenip Nersornaat sølviusoq Naja Lyberthimut Hans Egedep illuani Nuummiittumi ataasinngornermi novembarip 16-ianni tunniuppaa.
Kalaallit niviarsiarartaannut arnartaannullu angisoorujussuarmik suliniuteqarnini pillugu nersornaaserneqarpoq.
Naja Lyberthip suliniuteqarnermini oqaluttuaq naak arnanut, taakkulu ilaqutaannut minnerunngitsumillu inuiaqatigiinni inunnut amerlasoorpassuarnut angisoorujussuarmik kinguneqarsimagaluartoq sivisuumik nipangiusimaneqarsimasoq ukkatarineqartileraa, Kim Kielsenip oqaaseqarnermini erseqqissarpaa.
- Suliniuteqarnivit arnat eqqugaasimasut nipaat tusaaneqalersippaa. Tamatumalu peqatigisaanik akisussaaffik, akuersaarneq naapertuilluarnerlu pillugit inuiaqatigiinni pingaarutilimmik oqallinnermut aqqutissiuussivutit, Inatsisartut siulittaasuat oqaaseqarnermini ilaatigut oqarpoq.
Naartunaveersaammik spiralilersorneqartut
Naja Lyberth tarnip pissusaanik ilisimatuujuvoq kingunerlutsitsisimasunullu katsorsaasuulluni taannalu akuersitinneqaqqaarani spiralilertinneq pillugu siulliulluni saqqummertuulluni.
Attaveqatigiittarfimmi Facebookimi tamanna saqqummiuppaa, kingornalu aviisimi Sermitsiami apersorneqarluni.
Naja Lyberth 1970-ikkunni 14-inik ukioqalerluni akuersitinneqaqqaarnani naartunaveersaammik spiralilerneqarpoq.
Niviarsiaqqat allat hundredelikkaat aamma taama misigisaqarsimapput
Spiralilersuineq tarnikkut timikkullu kingunerlutsitsisoq Naja Lyberth oqarpoq.
Sakkortuumik anniartarsimalluni aaqarnerliortarsimallunilu oqaluttuarpoq. Kingunerlutsitsinini ukiut qulikkaat qaangiummata aatsaat suliaraa.
Kingunerluutit pillugit katsorsaasutut 2017-mi ilinniarnermini spiralilersorneqarnermini pisut eqqarsaataanilerput. Taamanili taamani pisimasut suliarilerpai.
Oqaasissaqarnerusutut nipi
Naartunaveersaaserneqartut oqaluttuaasa tamanut saqqummiunneqarnissaannut peqataavoq, nalaataqarsimasullu ataatsimoortillugillu imminnut tapersersoqatigiitsillugit akuerineqarnissaminnut taarsiiffigitinnissaminnillu ilungersuuteqaqatigai.
Nammineq naartunaveersaaserneqarnini pillugu tamanut saqqummiussisarpoq, arnallu naartunaveersaaserneqarsimasut naapertuilluarnermik pineqarnissaanik aaqqissuiffeqatigisarpai.
Anguniarneqartoq pingaaruteqartoq ministeriuneq Mette Frederiksen aamma Naalakkersuisut siulittaasuat, Jens-Frederik Nielsen pisortatigoortumik arnanut 2025-mi utoqqatsermata pivoq.
Naja Lyberthip suliniuteqarnera arnanut pineqartunut taamaallaat pingaaruteqartuunnginnera Kim Kielsenip erseqqissarpaa, inuiaqatigiinnulli tamanut kinguaanngortussanullu aamma pingaaruteqarnerarlugu.
- Eqqortuusup tusarneqarnissaa ilungersuutigalugu saqqummerniarneq sapiissuseqarfiusariaqarpoq. Suliniuteqarnerit arnanut eqqugaasunuinnaq pingaaruteqanngilaq, aammali inuiaqatigiinnut tamanut kinguaariinnullu aggersunut pingaaruteqarpoq, Kim Kielsen oqarpoq.
- Oqaluttuarisaanitsinni pisimasut toqqorterneqarsimasut qaqilerneqarnissaasa, eqqugaasimasut tusaaniarnissaasa siunissamillu pitsaanerusumik sulissutiginninnissap qanoq pingaaruteqartiginerat takutippat, Kim Kielsen Naja Lyberthip nersornaaseqarnerani oqarpoq.