Assammik arsarneq: Maja Motzfeldt Skovgaard Danmarkimi ligami unammerngaalerpoq

Assammik arsarnermi kalaallit arnat nunanut allanut unammisartut målmandiat Maja Motzfeldt Skovaard Håndboldligami unammisartuni Horsens Elite Håndboldimi peqataalerpoq
Maja Motzfeldt Skovgaard arnani Håndboldligami pingasunngornermi siullermeerluni unammeqataassaaq Assi © : TAAK
Allattoq Noah Mølgaard
novembarip 18-at 2026 10:35

Nunanut allanut unammisartuni måliniittuusartoq Danmarkimi Håndboldligami pingasunngornermi unnukkut unammeqataaqqaassaaq. Assammik arsartartut kattuffiat TAAK tusagassiutinut taama  nalunaarpoq.

Unammisassaat imaannaanngeqisut tassapput Nykjøbing Falster Håndbold maanna Håndboldligami pingajuattut inissisimasut.

Ukiut kingulliit arlallit kalaallimik arnamik Danmarkimi pikkorinnerni unammisartoqanngilaq.

Maja Motzfeldt Skovgaardimut periarfissaq takkuppoq Horsens Elitemi måliniittoq Zenia Hald Madsen ajoqusermat. Periarfissarlu ilimaginngisaq takkummat kalaallimut unammisartumut SAK-mi Sisimiuni unammisartumut pissutsit nalilersoqqaagassaapput.

Akinissamut periarfissaq sivikitsoq

Kalaallinut nuna tamakkerlugu sungiusaasoq Jakob Larsen Horsens Elite Håndboldimi unammisartuuvoq. Taannaavoq aamma Maja Motzfeldt Skovgaardimut ullut arlaqanngitsut matuma siorna attaveqartoq. Angalanissaq angerlarsimanngikkallartariaqalernerlu isumaliutigeqqaagassaapput.

- Jakob attaveqarmat eqqarsaatigeqqaarpara. Nunanut allanut unammisartut peqatigalugit decemberip 23-ata tungaanut aallaqqasussaavunga VM-imullu anngunniulluta Canadami unammisussaagatta nalilersueqqaarpunga. Periarfissarli unatut ittut inuuninni takkuteqqikkallarunnanngilaq, taamaattumik soorunami akuersaarpunga, Maja Motzfeldt Skovgaard oqarpoq.

Kalaallit arnat VM-imut anngunniullutik decemberimi Canadami unammeqataassapput.

Unamminermi misilittakkat pingaarutillit

Inissaq ataaseq unammissutigineqassaaq. Taamaattumik qaffasissumik unammisaqattaarnermi unammeqataasimanermi misilittakkat iluatigineqarput.

- Soorunami Maja sinnerlugu nuannaarpugut. Perarfissaq pissanganartoq akorluarpaa. Sapiissuseqarlunilu piumassuseqartariaqarpoq piffissap taama sivikitsigisup iluani Sisimiuniit aallarluni unammilligassamut nutaamut ornigutissagaanni. Neriuppugut nuannersunik misigisaqarluni misilittakkanik Horsensimiit Sisimiunut angerlaassilluarumaartoq, TAAK-mi siulittaasoq Carsten Olsen oqarpoq.

Sapaatip akunnerata naanerani Horsens Elite Håndbold aamma Maja Motzfeldt Skovgaard sakkortuumik unammeqqissapput tamatumuuna Odense Håndbold maanna Håndboldligami pingajuattut inissisimasoq unammissallugu.

Arnat Europami assammik arsarnermi nunanigasami unammisaqattaarnermi unikkallassapput Europami pissartanngorniuttoqassammat aamma VM-imut anngunniunnerusumi.

VM-ip 2027-mi naggataarneqarnissaanut anngunniullutik kalaallit decemberimi unammissapput Amerikap avannaamiut aamma Caribiamiut inissaq ataaseq pillugu unammissammata.

Kalaallit arnat VM-ip naggataarneqarnerani 2001-mi aamma 2023-mi peqataapput.