Kuupik nunanut allanut ministerertaarusuppoq
Naalagaaffiit pissaanillit Nunatsinnut isiginiartupilussuupput. Nunarsuullu aatsitassaatituaannik pagganneq nunani tamalaani oqallinnermi oqaatsimik nutaamik pilersitsisimavoq: Naalagaaffiit akornanni aatsitassat pillugit pissuseqarfeqatigiinneq.
Tamatumanilu Nunarput suliassanik ulikkaarpoq. Namminersorlutik Oqartussat nunanut allanut tunngasunut allaffiat qulingiluaannarnik sulisoqarpoq, taakkualu politikikkut pissutsit unammillernarsiartuinnartut suliarisussaavaat. Kuupik Kleistilli isumaa malinneqassappat taamaattuaannassanngilaq. Taannami isumaqarpoq, Nunatta nunanut allanut tunngasuni namminersornerunissani pisariaqartikkaa.
Issittumi ilisimasassarsiorneq, Lomrog-3-ekspeditionen, Qalasersuup eqqaani killeqarfinnik aalajangersuinissami Danmarkip iluaqutiginiagaa, piffissami kingullermi eqqumaffigineqaqisoq, Kuupik Kleistip ilaatigut maluginiarsimavaa.
- Soorluuna suna tamarmi Danmarkimut tunngasoq. Kisianni Naalagaaffeqatigiit imartamik pissarsissappata, tamanna tamarmi Nunatsinnit ingerlaannavik pissarsiarineqassaaq. Danmarkip Qalasersuup eqqaani ilaqalernissaa pineqanngilaq. Eqqumaffiginninnerli ilisarnaqaaq: Nunatta inuisalu siunissaannut tunngasut eqqarsaatigineqanngillat. Nunarput Danmarkimi suliani arlaqanngitsuinnartigut eqqarsaatigineqarpoq - taavalu Nunarput Tivolimi pineqaleraangat, Kuupik Kleist aviisimut quiassuarluni oqarpoq.
- Meeqqat pisinnaatitaaffii pillugit FN-ip aalajangersagaat atuutilersikkusunerigut Danmarkip puigoraa, kingullertigut takuarput. Atuuttussanngortinneqaannarpoq. Tamanna naalagaaffeqatigiinnerup isumaanik suusupaginninneruvoq ilisarnartoq, Kuupik Kleist oqarpoq.
Tassalu taamaammat Nunatta taamaalluni nunanut allanut tunngasunut ministeriaqarfeqalernissaa pisariaqalissasoq, naalakkersuisut siulittaasuat isumaqarpoq.
- Siunissami qaninnerpaami pisariaqalissanersoq nalilersinnaanngilara, kisianni politikikkut oqallinnermi pisariaqarnera ersarissigaluttuinnarpoq, Naalakkersuisut siulittaasuat AG-imi ullumi saqqummersumi oqarpoq.
Kuupik Kleist apeqqummik tassannga oqallissutaasinnaasumik saqqummiussinissaminut periarfissaqalissaaq, statsminister Helle Thorning Schmidt naalagaaffeqatigiit siuttuisa ataatsimiinnissaanni peqataajartorluni Nunatsinnut sapaatit akunneri arlaqanngitsut qaangiuppata tikippat.
