Naaja Nathanielsen: Naalakkersuisut erngup nukinganik nukissiorfiliornissamik suliniummut iluanaaruteqarsinnaanissaq qulakkeeraat

- Sumilluunniit pisoqassagaluarpat aningaasarsiutigineqarsinnaanissaa qulakkiissallugu, Namminersorlutik Oqartussanut Naalakkersuisunullu pingaaruteqarpoq.

Inuussutissarsiornermut, Nukissiutinut Aatsitassanullu Naalakkersuisoq Naaja Nathanielsen (IA) taamak oqarpoq.

Naalakkersuisut Tasersiami Tarsartuullu Tasiani erngup nukinganik atorluaalluni, erngup nukinganik nukissiorfiliornissamut piumasaqaatinut periutsinut tunngavissanik aalajangiipput.

Tassani suliffeqarfiit suliniummut ilanngunniarlutik qinnuteqarpata, aningaasatigut sunik piumasaqaateqartoqassanersoq politikerit aalajangiipput.

- Periutsimik toqqagaqarpugut marlunnik qulakkiigaqarluta: Siulleq suliffeqarfik sinneqartooruteqanngikkaluarpalluunniit inuiaqatigiinnut ingerlaavartumik iluanaaruteqarnissaa qulakkiissallutigu. Kisianni aamma sinneqartooruteqartillugu agguarsisarnissarput. 

Iluanaarutit suliffissallu

Erngup nukinganik nukissiorfissat qanoq amerlatigisunik suliffissanik pilersitsissanersoq oqaatigissallugu suli siusippallaartoq, Naalakkersuisoq oqaluttuarpoq.

Suliffeqarfiit assigiinngitsorpassuusinnaaneri tassani pissutaavoq. Paasissutissaasivimmiit aluminiumik aatsitsivimmut innaallagissiorfinnut power-to-x-inut.

- Suliniutit assigiinngitsut sulisussanik sunik pisariaqartitsiviussanersut assigiinngitsorujussuupput, Naaja Nathanielsen oqarpoq.

Taamaattumik Naalakkersuisut erngup nukinganik nukissiorfimmiit innaallagissamut aalajangersimasumik akileraarusiinissaq aalajangiuppaat. 

Taamaaliornikkut suliffissat qanorluunniit amerlatigissagaluarpata,  Namminersorlutik Oqartussat suliniutip aningaasarsiutiginissaa qulakkiissavaa.

- Kisianni soorunami sumiiffimmi suliffissaqalerumaarnissaa neriuutigaarput. Tamanna tamatta naatsorsuutigaarput, Naalakkersuisoq oqarpoq.

Alloriarnerup tullia

Naalakkersuisut paasissutissanik suliariumannittussarsiornissamut atugassamik ukiup affaa tulliuttoq piareersaassapput.

- Suliariumannittussarsiuussinerup inernerani suliffeqarfiit sorliit naleqquttunik piginnaaneqarnerusorisavut ingerlaqqissinnaanngornissaat naliliiffigissavagut, Naaja Nathanielsen oqarpoq.

Naak pinngoriartornera sivisusinnaagaluartoq, siumukarnera suliffeqarfiillu soqutiginninnermik takutitsinerat Naalakkersuisut ajunngitsumik isigaat.

- Pingaarnerpaasoq tassaavoq suliffeqarfiit suli soqutiginninnerat, tamannalu nuannaarutigeqaarput. Tamatumunnga suliariumannillutik neqeroortoqanngippat ingerlariaqqinnavianngilagut.