Kangerlussuarmi mittarfiup minnerpaamik 1500 meteriunissaa Naalakkersuisut siunniukkaat
Erseqqissaat 09.00: Allaaserisami allassimagaluarpoq Kangerlussuarmi mittarfiup minnerpaamik 1500 meterinik takissuseqarnissaa Naalakkersuisut politikkerigaat. Tamannali maanna ima erseqqissarneqarpoq: minnerpaamik 1500 meteriunissaa.
Kangerlussuup siunissaa pillugu Naalakkersuisut siusinnerusukkut isumaat ersarissumik saqqummiunneqarsimanngilaq.
Kangerlussuullu siunissaa pillugu kommuunit attuumassuteqartut suleqatigineqassasut, Angallannermut Naalakkersuisup oktobarimi oqaatigaa.
Simon Simonsenillu septembarimi nassuiaatigaa, mittarfiup takissusissaa pillugu periarfissat tallimat suliarineqarsimasut, mittarfiullu siunissaa pillugu periarfissat taakkua qanoq akeqassanersut oqallinnermi atorneqassasut.
AAMMA ATUARUK Naalakkersuisut Kangerlussuup siunissaa oqaaseqarfigerusunngikkaat
Mittarfiullu siunissaa pillugu Naalakkersuisut isummerput, tassa Kangerlussuarmi mittarfik minnerpaamik 1500 miiteriussaaq, tamannalu Qeqqata Kommuniani, borgmesterip Malik Berthelsenip nuannaarutigaa.
- Kangerlussuarmi periarfissat suunerannik nammineq isiminik takunnikkumanera aammalu ineriartortitsinissamik periarfissagissaarneranik upperinninnera nuannaarutigaara mittarfiullu minnerpaamik 1500 meterimik takissuseqarnissaa Naalakkersuisunit kissaatigineqarnera iluarisimaarpara, malugeqqussavarali uagut 2810 meterisut takissuseqaannarnissaa piumasarigatsigu, borgmesteri, Malik Berthelsen oqarpoq.
Kangerlussuup siunissaa pillugu suleqatigiissitami eqqartuinerit ingerlassasut, Simon Simonsenip ilisimatitsissutigaa kommuunini aamma Namminersorlutik Oqartussani atorfillit suleqatigiissitamiipput.
AAMMA ATUARUK Kangerlussuup mittarfiata siunissaa pillugu USA oqaasissaqartitaasoq