Kalaallit piviusulersaarusiaat Bodilimik nersornaasigassatut innersuussaasoq
Piviusulersaarut WALLS – Akinni Inuk nersornaasigassatut innersuunneqaqqippoq.
Tamatumuuna 2026-mi Bodilimik nersornaat pineqarpoq, piviusulersaarut "Piviusulersaarut pitsaanerpaaq"-tut innersuunneqartut akornanniilluni.
Piviusulersaarut, marsimi ukioq kingulleq takuteqqaarneqartoq, Sofie Rørdamimit aamma Nina Paninnguaq Skydsbjergimit ilitsersuisuuffigineqarpoq Emile Hertling Péronardimillu suliarineqarluni.
Nuummi pineqaatissinneqarsimasunut inissiisarfimmiittup Ruth Jeremiassenip ilitsersuisullu Nina Paninnguaq Skydsbjergip piviusulersaarutip immiunneqarnerata nalaani ikinngutigiillualeriartuaarnerat piviusulersaarummi takutinneqarpoq. Aammali pineqaatissinneqarsimasunut inissiisarfiup iluani inuuneq qanoq ittuunersoq takutinneqarpoq.
- Iliuutsit naakkittaatsut, imaannaanngitsut ajortullu qanoq ajunngitsumut allallu immaqa ilisarisinnaasaannut saatinneqarsinnaanersut piviusulersaarummi saqqummiunneqalaarput, Nina Paninnguaq Skydsbjerg KNR-imit marsimi apersorneqarnermini oqarpoq.
Kalaallit Nunaannit Oscarinnattussatut innersuussaq
Kalaallit Nunaanni Oscar komitép piviusulersaarut Oscarinnanniuttuni International Feature Film Award-imi toqqagassat akornaniittussatut siorna septembarimi innersuussutigaa.
- Filmi sakkortuumik eqqarsalersitsivoq, kiffaanngissuserlu pillugu paasinnittaatsimik immikkuullarissumik periarfissiilluni. Qulequtaq ilungersunartoq pineqarpoq, kisiannili siunissamik pitsaanerusumik neriuuteqalersitsivoq, Oscar Komitémi siulittaasoq AldaRós Olsen Rosing oqarpoq.
Piviusulersaarulli Oscarimik nuimasumik nersornaaserneqartussatut innersuussanut, sapaatip-akunnera kingulleq saqqummiunneqartunut, ilanngutinngilaq.
Walls – Akinni Inuk CPH:DOX-imi marsimi siorna takuteqqaarneqarmat Nunani Avannarlerni piviusulersaarusiat pitsaanerpaattut nersornaaserneqarpoq.
Aamma Nuuk International Filmfestivalimi 2025-mi takutinneqarpoq, tassanilu Nina Paninnguaq Skydsbjerg ‘Kalaallit 2025-mi ilitsersuisuattut' innersuunneqarpoq.
