Isiginnaagassiaq piviusuinnik tunngavilik ‘WALLS – Akinni Inuk' Oscarimut innersuunneqarsinnaasoq
Filmi sakkortuumik eqqarsalersitsivoq, kiffaanngissuserlu pillugu paasinnittaatsimik immikkuullarissumik periarfissiilluni. Qulequtaq ilungersunartoq pineqarpoq, kisiannili siunissamik pitsaanerusumik neriuuteqalersitsivoq.
Kalaallit Nunaata Oscarimut Ataatsimiititaliaanni siulittaasoq, AldaRós Olsen Rosing ataatsimiititaliap isiginnaagassiaq ’WALLS – Akinni Inuk’ International Feature Film Awardimut innersuunniarlugu aalajangernerata kingorna oqarpoq.
- Ataatsimiititaliami ilaasortat isumaqatigiipput WALLS – Akinni Inuk, 2026-mi Oscar-inik nersornaasiinermi pitsaanerpaatut Kalaallit Nunaanniit sinniisuussasoq, siulittaasoq tusagassiuutinut nalunaarummi oqarpoq.
Isiginnaagassiaq Sofie Rørdamimit aamma Nina Paninnguaq Skydsbjergimit ilitsersuisuuffigineqarpoq Emile Hertling Péronardimillu suliarineqarluni.
Isiginnaagassiami kalaallit arnat marluk – tassa Ruth Mikaelsen Jerimiassen Nuummi pineqaatissinneqarsimasunut inissiisarfimmiittoq aamma ilitsersuisoq Nina Paninnguaq Skydsbjerg malinnaaffigineqarput. Arnat taakku pineqaatissinneqarsimasunut inissiisarfiup iluani ikinngutigiillualerput.
- Iliuutsit naakkittaatsut, imaannaanngitsut ajortullu qanoq ajunngitsumut allallu immaqa ilisarisinnaasaannut saatinneqarsinnaanersut piviusulersaarummi qaqilerneqalaarput. Sanngiiffik akuerigaanni nukinngortarpoq. Pisut suliarineqarnissaat ingerlaqqinnissarlu oqaluuseriuaannarpagut. Soorliuna anniarnaveersaarneq imaluunniit misigissuseqarnaveersaarneq nukinngutigiinnarivut, Nina Paninnguaq Skydsbjerg aperivoq.
Isiginnaagassiat allat akornanni toqqagaaqqaassasoq
Isiginnaagassiaq danskit filmfestivaleqartitsineranni CPH:DOX-imi marsimi takuteqqaarneqarpoq, tassanilu Bedste Nordiske Dokumentarfilmimi ajugaalluni. Isiginnaagassiaq tamatuma kingorna Nunat Avannarliit Siunnersuisoqatigiit isiginnaagassiamik 2025-mi nersornaasiinissaannut aamma innersuunneqarpoq.
Isiginnaagassiaq nunatsinni apriilip arfineq-pingajuanni Nuummi Katuami takuteqqaarneqarpoq.
Tamatumalu saniatigut Nuuk Internationale Filmfestival 2025-eqarneranut atatillugu aamma takutinneqarluni. Nina Paninnguaq Skydsbjerg tassani ’Ukioq manna kalaallit ilitsersuisutsialaatut’ nersornaaserneqarnissamut innersuunneqarpoq.
Nunatsinnit ukiut 13-it matuma siorna Oscarimut innersuussinissamut siullermertuumik innersuussisoqarpoq. Kingullermik 2012-imi 'Inuk' Mike Magidsonimit suliarineqartoq innersuunneqarpoq. Taamatullu 'Nuummioq' Torben Bechimit aamma Otto Rosingimit suliarineqartoq 2010-mi innersuunneqarluni.
Isiginnaagassiarli ’WALLS - Akinni Inuk’ aappaagu Oscarimik nersornaasiisoqarnissaanut Bedste Internationale Filmimut innersuunneqartut tallimat ilaanniilissanersoq suli qularnarpoq. Oscarakademip nunanit tamalaanit isiginnaagassiat 15-it innersuunneqarnissamut innersuussutigineqartut allattorsimaffiat decembarip 16-ianni tamanut saqqummiutissavaa.
Isiginnaagassiat tallimat sorliit innersuunneqarnersut januaarip 22-ani saqqummiunneqassapput.
Oscarimik 2026-mi marsip 15-ianni USA-mi Los Angelesimi nersornaasiisoqassaaq.
