Kalaallit inuuniarnikkut ajornartorsiuteqartut Københavnimut tikerlaat sumiffissaqalernissaat maanna aningaasaliiffigineqartoq

Kalaallit Københavnimut tikerlaat inuuniarnermikkut ajornartorsiuteqartut, inuuniarnikkulluunniit ajornartorsiuteqaleratarsinnaasut illussaat "Assak" maanna piviusunngortussanngorpoq.

2026-mit 2029-p tungaanut missingersuutissat pillugit Københavnip rådhusiani kingullermik isumaqatigiinniarnermi 11,3 millionit koruunit immikkoortinneqarput.

Københavnip kommunia tusagassiorfinnut nalunaarummi taama allappoq:

- Kalaallit tikerlaat piffissaagallartillugu siunnersorneqarlutillu ikorfartorneqarnissaat Assak aqqutigalugu qulakkeerniarneqarpoq, Naalagaaffeqatigiinnimi tamanna pisinnaatitaaffigaat, tusagassiorfinnut nalunaarummi allassimavoq.

KNR-ip siunnersuut sapaatit akunnerit marluk matuma siornatigut akuersissutigineqartoq allaaseraa.

Kalaallit Københavnimut tikerlaat inuuniarnikkullu ajornartorsiutillit Københavnimi sumiiffissaat avataaneersumit, sullinniakkallu pillugit immikkut ilisimasalimmit, kalaallillu kulturiannik, Danmarkimullu nuunnermi unammilligassanik ilisimasalimmit ingerlanneqassaaq.

Oqalutsinut atugassanik aningaasanik aamma immikkoortitsisoqarpoq. Købehavnip kommunia illuliornissamut piaarnerpaamik suliariumannittussarsiorniarpoq, illu taamaasilluni 2027-mi ammarsinnaaniassammat.

Pilertortumik sullissisoqartariaqartoq

Kalaallit Københavnimut tikerlaat, inuuniarnermikkullu ajornartorsiuteqartut illussaannik pilersitsisoqarnissaanut siunnersuuteqartoq, Københavnip kommuniani isumaginninnermut borgmesteria Karina Vestergård Madsen, Enhedslistenimeersoq, naapertorlugu kalaallit Københavnimut tikittut, inuuniarnermillu ajornartorsiuteqartut, inuuniarnermikkuulluunniit ajornartorsiuteqalerataannaasut sullinneqarnissaat kommunip pikkoriffigivallaarsimanngilaa. KNR-imit siusinnerusukkut apersorneqarluni taama oqarpoq. 

Taanna tusagassiorfinnut nalunaarummi ima oqarpoq:

- Kalaallit Københavnimut nuuttut amerlanersaat ajornartorsiuteqarneq ajorput. Kalaallilli akornanni ilaqarpoq inuuniarnikkut ajornartorsiutilinnik, tarnimikkulluunniit unammilligassaqartunik. Taakku tikinneranniit pilertortumik sullitarilissavagut, Københavnimi najugaqalernerminni siunnersorneqarlutillu ikorfartorneqarnissaat qulakkeersinnaaniassagatsigu, Karina Vestergård Madsen oqarpoq, nangillunilu:

- Kalaallit inuuniarnikkut ajornartorsiuteqartut ajornartorsiornerulernissaat pinngitsoortittariaqarparput, Danmarkimi suleriaatsinut akunnattoortinnaveersaarlugillu danskit kulturiannik paatsuuinnginniassammata. Assak tassani inissisimalluassaaq iluaqutaassaqalunilu, taanna oqarpoq.

Kalaallit meerartaasa ilitsoqqussaralugu oqaatsinik ilinnniartinneqarsinnaanissaat pillugu aamma aningaasaliisoqarsinnaanissaa missingersuutit pillugit isumaqatigiinniarnerni aamma qulakkeerneqarpoq, kalaallit savalimmiormiullu meeraat angerlarsimaffiup avataanut inissinneqarsimasut matumani aamma ilaatinneqarlutik.