Københavnimi sumiiffik nutaaq kalaallinut inuuniarnikkut atugarliortunut inuunermik nutaamik aallartitsinissamut qulakkeerissasoq

Københavnip kommunia kalaallinut tikerlaanut inuuniarnikkut ajornartorsiuteqartunut imaluunniit inuuniarnikkut ajornartorsiuteqaleratarsinnaasunut nutaamik illuliorniarpoq.

Tamanna Enhedslistenimit, Det Konservative Folkepartimit, SF-imit, Radikale Venstremit, Alternativenit attaviitsumiillu ilaasortat siunnersuutaanni akuerineqartumi allassimavoq.

Københavnip kommuniani isumaginninnermut borgmesterip Enhedslistenimeersup, Karina Vestergård Madsenip København Kalaallit Nunaannit danskit illoqarfiisa pingaarnersaannut nuuttunik inuuniarnikkut ajornartorsiuteqartunik isumaginninniarnermut iliuuseqarluarsimanngissoraa.

- Kalaallinik 75-init 100-nut amerlassuseqartunik inuuniarnikkut ajornartorsiuteqartunik ukiut tamaasa tikittoqartartoq ilisimavarput.

- Takorluugaqarlutik neriuuteqarlutillu tikittarput, kisianni illoqarfimmut najugarisimasaminnit allaanerulluinnartumut tikittarput. Pisinnaatitaaffitik suunersut sumiillu ikiorneqarsinnaanerlutik ilisimaneq ajorpaat. Tamatuma allanngortinnissaanut aamma Naalagaaffeqatigiinni innuttaasut allat assigalugit ikiorneqarnissaanut tapersersorneqarnissaanullu pisussaaffeqartugut isumaqarpunga, taanna oqarpoq.

Naleqquttumik aallartittoq

Illoq suli pilersinneqanngitsoq Assak-mik atserneqarpoq. Tassani kalaallit kulturiannik oqaasiinillu ilisimasaqartunik atorfinitsitsisoqassaaq, inuillu inuuniarnikkut ajornartorsiuteqartut inissarsiornissamut, ilinnialernissamut sulilersnissamullu siunnersorneqarlutillu ilitsersorneqarsinnaassapput.

Karina Vestergård Madsenimmi oqarnera naapertorlugu neqeroorutit atuutereersut inuuniarnikkut ajornartorsiuteqartunut iluatsissimanngillat.

- Københavnimut nunamut, kulturimut oqaatsinullu nutaanut tikikkaanni nammineq oqaaserisanik atuisunik erngertumillu akuerineqarfiusinnaasumi aperinissaq nalinginnaalluinnarpoq. Kisianni aamma ataatsimoornerit ilarujussui imeqatigiinnerusoq avatangiisit ilaraat. Tassanngaanniillu ingerlaqqinneq ajorlutik, isumaginninnermut borgmesteri oqarpoq.

Taamaammat NGO-t aqqusinermilu pilersaarusiornermik suliaqartut kalaallinik naapitsisartut innersuussiffigisinnaasaannik sumiiffimmik neqeroorutit pioreersut ataatsimoortitsiffiusinnaasumik pilersitsinissaq kissaatigaa.

- Takorluugaannik piviusunngortitsinissarput neriuutigaara, taamaalillutik tapersersorneqarnissamut, ikiorneqarnissamut siunnersorneqarnissamullu naleqquttumik pissarsiffissaqarsinnaanerulissallutik, aamma Københavnimi inuunermik nutaamik aallartitsilluarsinnaanerussallutik, Karina Vestergård Madsen oqarpoq.

Ilisimatusarfimmi lektorip aamma Issittumi Atugarissaarnermut suliaqarfimmi aqutsisup, inuit inuuniarnikkut ajornartorsiuteqartut Danmarkimukartarnerat ajornakusoorsinnaasartoq nalilerpaa. Tamanna KNR-imit siorna apersorneqarnermini oqaatigaa.

- Danskit sullissivianni sullinneqalernissaq ajornartorujussuusinnaasarpoq, sullissinermi allaanerujussuusinnaasarmat. Ajoraluartumillu atornerluineq avatagiisillu pitsaanngittut, annertuseriarsinnaanerat suli sakkortuneruliinnarsinnaasarpoq, Steven Arnfjord oqarpoq.

Illumut nutaamut missingersuutinut isumaqatigiinniarnissami aningaasassarsiortoqassaq.