Jens-Frederik Nielsenip oqariartuut ilisimaneqarlualersoq ukiortaami ilasseqatigiinnermi uteqqikkaa

Naalakkersuisut siulittaasuat Københavnimi ukiortaami ilasseqatiginninnermi ippassaq oqalugiarpoq.

Oqalugiaataani piffissami matumani kikkunnit tamanit oqaluuserineqartoq – tupaallannanngitsumik – qitiuvoq, tassa USA-p nunatsinnik aqutserusunnera.

Jens-Frederik Nielsenip (D) taamaaliortoqarnavianngitsoq erseqqissaatigeqqippaa.

- Kalaallit Nunaat USA-mit pigineqarusunngilaq. Kalaallit Nunaat USA-mit aqunneqarusunngilaq. Kalaallit Nunaat USA-mut atarusunngilaq. Ullumikkut nalunngisarput Nunarput toqqarparput – tassalu kunngeqarfik Danmarkimut ilaaneq. Oqariartuut paatsoorneqarsinnaanngitsoq, naalakkersuisut siulittaasuat ukiortaami ilasseqatigiinnermi siullermi oqarpoq.

Oqaaseqarnerata kingorna inersuarmi inuit ersaattaaterujussuarput, arlaleriarlutillu avaalallutik. Ilasseqatigiinnermi peqataasut arlallit tassaasut aallartitat ministerillu Jens-Frederik Nielsenimut aamma kalaallit politikeriinut innuttaasullu sinnerinut tapersersuinerminnik takutitsiniarlutik Erfalasutsinnik tigummiaqarlutik takkupput.

Ullummi kingulliit sakkortupput – minnerunngitsumik ippassaq, tassami Amerikamiut præsidentiata USA-p sillimaniarneq pissutigalugu Kalaallit Nunaat pigisariaqaraa uteqqereeraalu Vivian Motzfeldt aamma Lars Løkke Rasmussen USA-mut ataatsimiigiarput.