Ataatsimut isigalugu: Nunatta Washingtonimi ippassaq ataatsimeeqateqarnerani uku ilisimavagut

USA-mik siooranartoqaannarpoq, Trumpimmi nunarput suli perusuppaa. Suleqatigiissitap tunngaviusumik isumaqatigiinngissutaasumi ajornartorsiutaasut aaqqiivigineqartussanngorpai.

Allattoq Christine Hyldal

januaarip 15-at 2026 16:01

Nutserisoq Connie Fontain

Ippassaq pisut ataatsimut takujuminaatsippigit taava kisimiinngilatit. Nutaarsiassammi ippassaq saqqummiunneqartut Issittumi sakkussiornermut, suleqatigiissitamut Danmarkip nunattalu USA-p pissaanilissuup Issittumi sillimaniarnerorusunneranik qanoq suleqatiginnissinnaaneranik misissuisussamut ilaatigut tunngassuteqarput. Politikerit nuiumasut ataatsimiinnerup kingorna pujortarnerat allaat nutaarsiassarineqarpoq.

KNR-ip ippassaq pisut ataatsimoortillugit annikitsukkaartumilli paasiuminarsarpai::

Nunanut allanut naalakkersuisup, Vivian Motzfeldtip (S) aamma nunanut allanut ministerip Lars Løkkep Amerikamiut nunanut allanut ministeriat Marco Rubio aamma Amerikamiut præsidentiata tullersortaa J.D. Vance ataatsimeeqatigiartorpaat.
J.D. Vance ataatsimiinnermi, Præsidentip Illorsuata qanittuani illorsuarmi Eisenhowerimi aaqqissuunneqartumut qaaqqusisuuvoq. Præsidentip Trumpip Kalaallit Nunaannik tiguserusunnera pissutigalugu ataatsimiittoqarpoq. Taassuma pisiariniarluta, tiguarniarluta sakkortooqarnermillu atuisinnaaneq ilaatigut oqaatigisarpaa.

Løkkep oqarnera naapertorlugu ataatsimiinnermi Donald Trumpip USA-p Kalaallit Nunaannik aqutsisariaqarneranik tunngavilersuutigisaata unitsinneqarnissaa anguniagaavoq. Taamaammat Motzfeldtip Løkkellu Rubiomut Vancemullu nunamik allamik inuinillu pisisoqarsinnaannginnermik nassuiaasussaanerat suliassarujussuuvoq.

Assi © : Scanpix
Ataatsimiinneq akunnerup ataatsip missaanik sivisussuseqarpoq.
Motzfeldt Løkkelu ataatsimiinnerup kingorna tusaamaneqarlualertumik pujortareerlutik danskit Washingtonimi aallartitaqarfiata saani tusagassiortunut katersortitsipput. Taakku ataatsimiinnermi oqaloqatigiinnertik “toqqaannartuunerarpaat, kisianni kinguneqartussamik isumaliuteqarfiunerarlugu”.
Tamannali Trumpimit siooranartoqarneranut allannguinngilaq. Unitsinneqanngilaq. “Isumaqatigiinngissuteqarnerput isumaqatigiissutigaarput”, Lars Løkke oqarpoq.
Taamaakkaluartorli Vivian Motzfeldtip “ataqqinnittumik” ataatsimiittoqarnerarpaa.
Suleqatigiissitamik pilersitsisoqarnissaa isumaqatigiissutigineqartoq naggataatigut saqqummiunneqarpoq. Tassa eqimattap Nunatsinni, Danmarkimit USA-miillu qaffasissumik atorfilinnik inuttaqartup tunngaviusumik isumaqatigiinngissutaasuni ajornartorsiutit erseqqissarniassavaat.
Assi © : KNR
Vivian Motzfeldt tusagassiortunik katersortitsinerup kingorna kalaallit tusagassiorfiinit apersorneqarpoq. Uanilu politikerip nalinginnaasumik imminut aqullaqqissumik suliaminillu ilisimasaqarluartutut suliaqartaraluartup inuppalaassutsiminik paasinarluinnartumik takutitsilluni attortippoq isaalu immatserlutik, taassumalu Amerikamiunik politikerinik qaffasissunik ataatsimeeqateqarnissamut ullut sakkortusimasut aamma Vancemut Rubiomullu tatineqarneq nunatsinnut qanoq sakkortutigisoq oqaatigaa. Tamatuma kingorna Vivian Motzfeldtimut uummatinik tigusilluarnermillu Facebookikkut nassiussuisoqarpoq.
Inatsisartuni partiinit allanit politikerit aamma qisuariaateqarput. Partii kisiartaalluni illuatungiliuttuusoq, Naleraq Vivian Motzfeldtip ullormi suliaqarneranut aamma qujassuteqarpoq: “Nunarput, Kalaallit Nunaat USA-mut peqataaninnut qujamasuppoq”, tusagassiuutinut nalunaarummi oqarpoq.

Nunat sakkutuunik Kalallit Nunaannukartitsilersut aaku:

Sverige: Sakkutuut naalagai arlallit Kalaallit Nunaannut inissippai.
Norge: Sakkutuut naalagai marluk Kalaallit Nunaannut inissippai.
Tyskland: Inuit 13-it alapernaarsuisartut Kalallit Nunaannukartippai.
Tuluit Nunaat: Sakkutuut naalagaat ataaseq Kalaallit Nunaannukartippaa.
Frankrig: Sakkutuut 15-it Kalaallit Nunaanniitippai. Frankrigimiillu imaatigut, silaannakkut nunamilu ulluni tulliuttuni sakkutuuliinerussapput.
Holland: sakkutuut imarsiortut umiarsuaanniit sakkutuut naalagaat ataaseq Kalaallit Nunaannukartippaa.
USA: Pituffik Space Basemi inunnik 150-it missaanniitunik Kalaallit Nunaanniittuuteqareerpoq. Kalaallit Nunaannut illersornissamut isumaqatigiissut 1951-imeersoq naapertorlugu, USA-p sakkutuui sukkulluunniit Kalaallit Nunaannukariaannaapput.

Naalakkersuisut siulittaasuata tullersortaa, Inuit Ataqatigiinnut siulittaasoq Múte B. Egede tusagassiortunik ippassaq unnukkut katersortitsivoq. Taassuma sakkussiorneq nunatsinni pisoq oqaluuseraa: Nunatsinni sakkutuut umiarsui amerlasuut takuneqassapput, tamanna sakkutooqarnikkut sungiusartoqarnissaanik pissuteqarpoq. Taakku sungiusarnermut taamaallaat attuumassuteqarnerat erseqqissaatigerusupparput, Múte B. Egede oqarpoq.
Naalakkersuisut siulittaasuata, Jens-Frederik Nielsenip (D) Vivian Motzfeldt ullaap tungaani aamma nersualaarpaa. Taanna Facebookikkut allappoq: Maanna eqimattaq illuatungeriinni isumaqatigiinngissutaasunik naaperiaasitsisussanik suleqatigiissitaq pilersinneqarnissaanut isumaqatigiittoqarpoq, oqaloqatigiinnerillu ingerlaqqissapput. Alloriarneq pingaarutilik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.