Jens-Frederik Nielsen tusagassiortunik nalunaaqutaq 11.00 katersortitsissaaq

Naalakkersuisut siulittaasuat Jens-Frederik Nielsen tusagassiortunik katersortitsinissamut ullumi nalunaaqutaq 11.00 aggersaavoq.

"Pisut killiffiat" qulequtarineqassasoq Naalakkersuisut tusagassiuutinut nalunaarummi allapput.

Tusagassiortunik katersortitsineq knr.gl-ikkut KNR TV-kkut toqqaannartumik isiginnaarneqarsinnaassaaq, radiokkullu aamma toqqaannartumik tusarnaarneqarsinnaassalluni.

Sapaatip-akunnera ulapiffioqisoq

Jens-Frederik Nielsen oqaluuserisassaqaqaaq. Siulittaasup tullersortaa Múte B. Egede (IA) tusagassiortunik pingasunngormat sapaatip-akunnera kingulleq katersortitsivoq.

Nunanut allanut tunngasunut Naalakkersuisoq Vivian Motzfeldt (S) Amerikami politikerit qullersaannik tassa nunanut allanut tunngasunut ministeri Marco Rubio præsidentip tullersortaa J.D. Vance danskillu nunanut allanut tunngasunut ministeriat Lars Løkke ataatsimeeqatigiartorlugit kingorna Washingtonimiippoq. 

Nato Bruxellesimut danskit illersornissamut ministeriat Troels Lund Poulsen peqatigalugu aamma ippassaq ataatsimeeqatigiartorpaa. Ataatsimiinneq Motzfeldtip Lund Poulsenillu Natop Kalaallit Nunaanni Issittumilu aalajangersimanerusumik suliaqartarnissaa Mark Ruttemut siunnersuuteqarfigalugu naammassineqartoq. Nunanit Natomut ilaasortaasunit arlalinnit sakkutuunik sungiusarnermut "Arctic Endurance"-imut peqataajartortunik ulluni kingullerni tikittoqarpoq, sungiusarnerli taanna danskinit aqunneqarpoq, Natomiillu aalajangersimasumik suliaqarnerunani.

Kalaallit Nunaanni Danmarkimilu inuit tuusintilikkutaat akerliussutsimik arfininngormat takutitsipput – aamma Nunavumi Canadamilu Kalaallit Nunaannut iluaqutissamik akerliussutsimik takutitsisoqarpoq.

Akerliussutsimik takutitsisoqarnerani præsident Trump akitsuusersuinikkut pillaanermik sioorasaaruteqarluni tusagassiorfiutimini Truth Socialimi allappoq. Taamaaliorpoq naak Issittumi illersornissaq annertunerusoq ujartoraluaraa – taamaattumik Kalaallit Nunaat aqulerusullugu oqartoq. Nunat sakkutooqarnerulernermut tunuliaqutaasut 10 procentimik akitsuusersuinikkut pillarniarlugit maanna sioorasaarpai. Akitsuut 25 procentinik juunip aallaqqaataani ilaneqassaaq.

- Akitsuut Amerikamiut Kalaallit Nunaannik "pissarsinissaata" tungaanut atuutissasoq, Truth Socialimi allappoq.

Davosimi ullumi ataatsimiinnissaq

Schweizimi Davosimi World Economic Forum ukiumoortumik ataatsimiittarnerat ullumi aallartippoq. Tassani Trump aqagu oqalugiassaaq, ataatsimeersuarnermi Kalaallit Nunaata pisiarinissaa pillugu oqalugiassalluni nalunaarutigereerpaa.

Danmark nunallu allat arfineq-marluk — Frankrig, Tyskland, Tuluit Nunaat, Holland, Norge, Sverige Finlandilu — Danmarkip Kalaallit Nunaatalu nammineq aalajangiisinnaassuseqarneranik tapersersuillutik nalunaaruteqarput. 

Aamma EU Danmark Kalaallit Nunaallu tapersersorlugit nalunaarpoq.

Trumpip tamatuma kingorna Kalaallit Nunaannik tiguaaniarnermi sakkutuulersortoqarnaviannginnersoq oqaatigiumanngilaa.