Vivian Motzfeldt KNR-imit apersorneqarnermini attortittoq
Nunatta oqaluttuarisaanerani ullumi ulloq pingaaruteqarpoq. Nunatsinnit nunanut allanut naalakkersuisumik aamma danskit nunanut allanut ministeriannik Amerikamiut nunanut allanut ministeriannik aamma præsidentip tullersortaanik ataatsimeeqateqarluni Kalaallit Nunaata tuniniagaannginnera siornatigut nassuiaatigineqarnikuunngilaq.
Vivian Motzfeldt aamma Lars Løkke ataatsimiinnerup nunarsuarmi tamarmit tusagassiorfippassuarnit nakkutigineqartup kingorna danskit Washingtonimi aallartitaqarfianni tusagassiortunik katersortitsipput. Vivian Motzfeldt KNR-ikkut toqqaannartumik kingunitsianngua oqaloqatigineqarpoq – misigissusaalu uani qaffakaapput.
Naalakkersuisoq Amerikamiunik ataatsimeeqateqarnermi nalaani eqqissisimasinnaasimanersoq aperineqarpoq, tassanilu attortittoq nipaatigut tusaaneqarsinnaavoq.
- Ullut kingulliit sakkortusimapput, piareersarpugut, aamma sakkortusiartortumik tatineqarneq sakkortusimavoq. Naalakkersuisoqarfimmi nukittuvugut. Nunatsinni toqqissilluta inooqqissinnaalernissarput anguniarlugu nukiit tamaasa atorlugit sulivugut, taanna oqarpoq, sakianilu attorlugu.
Taanna Sermitsiaq.AG-mut oqarpoq:
- Ataatsimiinnermi uanga kalaaliullunga, nunatsinniillu aggerlunga, nunatsinni misigissutsit aqqusaakkagut aamma ukiup ataatsip iluani tatineqaraluttuinnarnerup inuiaqatigiit akornanni ersinermik toqqissisimannginnermillu pilersitsisoq nalaassimanerata ataatsimeeqatigisatsinnut paasitinnissaa pingaartissimaqaara.
Tatigineqarneq sakkortusoq
Amerikamiut nunatsinnut sakkortuumik tatisimanninnerat ukiup ataatsip matuma siorna aallartippoq. Inoqatinut attaveqaatitigut qaammatini arlalinni eqqissisimakannertoqareersoq suna tamarmi januaarip aallartinnerani aallarteqqipput. Nunanullu allanut naalakkersuisoqarfiup aamma ministereqarfiup qaammatisiutaannut ataatsimiinnissaq pingaaruteqartoq kiisami sapaatip akunnerata siuliani inissinneqarpoq. Præsidentip tullersortaata J.D. Vancep ataatsimiinnermut aamma peqataarusunnini ullullu marluk matuma siorna nalunaarutigaa.
Motzfeldtip Løkkellu ataatsimiinnissamut qanoq piareersaateqarsinnaanerannik isumaliutersuuteqarnerit hunnorulikkaanik – imaluunniit tusindilikkaanik kisinneqarsinnaapput.
- Siullertut ataatsimiinneq peqataaffigisarput assorujussuaq piareersarfigivarput, Vivian Motzfeldt KNR-imut oqarpoq.
- Piareersarneq nunatsinniit aamma Danmarkimiit ataqatigiissarnikuuarput. Anersaaq qanoq issanersoq nalunikuuarput, suut tamaasalu piareersimaffiginiarnikuullugit.
Taassuma ataatsimiinneq illugiissumik ataqqeqatigiiffiusimasoq aamma paasissutissiissutigaa.
- Qujanartumik ini ataqqeqatigiiffiusoq isersimaffigaarput. Nunatsinniit qanoq inissisimanerluta ersarissumik oqaaseqarfigaarput. Suleqatigiikkusunnermik ammalluta oqaatigaarput. Tamatta inooqataaffigisinnaasatsinnik isumaqatigiinnissaq neriuutigaarput.
Trumpip nunarput suli perusukkaa
Tamanna iluatsikkumaarnersoq piffissap takutikkumaarpaa. Trumpimmi Kalaallit Nunaannik tiguserusunnini attatiinnarpaa. Lars Løkke Rasmussenip danskit kalaallillu sinniisuisa Amerikamiut aalajangersimanerat allanngortissinnaasimanngikkaat tusagassiortunik katersortitsinermi oqaatigaat.
- Tamannali naatsorsuutigisimanngilara. Præsidentip tiguaarusunnera ersarippoq, taanna oqarpoq.
Suleqatigiissitap qaffasinnerusumik eqimattamik Løkkemit taaneqartup tamanna sulissutigeqqissagaa isumaqatigiissutigineqarpoq.
Lars Løkkelli eqimattap suliaqarnera qanoq inerneqarumaarnersoq nalunartoq nassuerutigaa.
- Qaffasissumik ataatsimoorluta præsidentip ernumassutaanik misissuinissarput isumassaqarluartoq isumaqatigiissutigaarput, taanna oqarpoq.
