Jens-Frederik Nielsen akinik akitsuineq pillugu: - Iliuuseqarusuppugut
Ukioq qaangiutilersoq imaannaanngitsuuvoq. Nunatta aningaasaqarneranuinnaanngitsoq Kalaallit Nunaannili innuttaasup nalinginnaasup aningaasivianut aamma.
Inuussutissat akisoreeqisut akitsoqqipput. Orsussanut akit maajimi 20 procentit tungaannut qaffapput. Nukissiorfiit innaallagiamut akit ukiuni tulliuttuni pingasuni 7 procentpointinik akitsortassavaat.
Nunatta karsia 347 millionit koruuninik 2024-mi amigartooruteqarnera juulimi paasinarsivoq.
Amigartoorutilli 384 millionit koruuniunissaat, naalakkersuisut kisitsisaataasa nutaat takutippaat; naatsorsuutigisamit pingasoriaammik amerlanerupput.
Aningaasaqarnermut Siunnersuisoqatigiit politikerit aningaasaqarnerup tungaatigut sammiviup allanngortinneqartariaqarnera aningaasanillu sipaarnerusariaqarnerallu pillugu ukiut qulit sinnerlugit mianersoqqussigaluarput.
Demokraatit qinersinermi ajugaarujussuarput; kalaaliunerup akisunerulinnginnissaanik ilaatigut neriorsuuteqarlutik.
KNR-ip partiimi siulittaasoq naalakkersuisunilu siulittaasoq Jens-Frederik Nielsen (D) naalakkersuisut qanoq iliorniarnersut apeqqutiginiarlugu apersorpaa.
- Aningaasaqarnerput pitsaanerusimavoq. Aaqqissuussaanerup tungaatigut nammineq aqussinnaanngisatsinnik ilungersuanartortaqarpoq. Tamakku tamaviaarutigaagut, taanna oqarpoq.
- Isumaqarpunga aalajangiiffigisassat, naak imaannaanngitsuugaluarlutik pisariaqartut, aalajangiiffigisimagigut. Sapiissuseqarpugulli.
Akinik akitsuinerit
Qinersinermi kikkulluunniit ajugaasimagaluarpata, naalakkersuisunngortunut aningaasaqarniarnerup tungaatigut ilungersunartorsiortoqassaaq.
Jens-Frederik Nielsen siulittaasutut KNR-imit apersorneqaqqaarnermini aaqqissuusseqqinnerit piffissami sivikinnerusumi imaannaanngitsitsisussat avaqqunneqarsinnaannginnerat oqaatigaa. Taamaaliornerulli inuiaqatigiinnut siunissami iluaqutaalernissaa taamanikkut oqaatigaa.
- Innuttatta inuuniarnermikkut atugaasa pitsaanerulernissaat kissaatiginerpaavara. Pisiniarfinni akit kikkunnut tamanut eqquipput, apersorneqarnermini oqarpoq.
- Pissutsilli aqussinnaanngisatta ilai pissutigalugit akigitinneqartut aqukkuminaassinnaanerat avaqqussinnaanngilarput.
Iliuuseqartoqarsinnaannginnera oqaatigiginuna?
- Iliuuseqarusuppugut. Kalaallit Nunaanni inuuniarnerup akikinnerulernissaa sulissutigerusupparput, Jens-Frederik Nielsen oqarpoq nangillunilu:
- Ingerlariaatsit ilai misissuiffigineqarsinnaapput, imaaliallaannarli aaqqiivigisassaanngilaq. Ajornakusoorneruvoq.
Qinersisartut qanoq iliortoqarnissaa naatsorsuutigisinnaavaat?
- Inuuniarnerup akikinnerulernissaa sulissutiginiarparput. Killormulli tikkuussisut arlaqarnerat nalunngilara, taanna oqarpoq.
- Assartuinermi akit ukiuni kingullerni akisoriartorput, taamaattumillu nioqqutissat akii akikilliuminaatsinneqarput.
- Taamatut ineriartortoqarnera mumisisinnaanerlugu takussavarut. Tassuuna aalajangiinissarput pisariaqarpoq. Taamaalioreerpugut sulili iliuuseqartoqartariaqaqaaq.
Qineqqusaarnermi neriorsuutit
Aalisarneq pillugu inatsit allanngortinneqarnissaa, utoqqalinersiassanik pinngitsaaliissummik katersititaanerup atorunnaarsinneqarnissaa aningaasaqarnikkullu aaqqissuusseqqinnissaq - kalaallit ataasiakkaat aamma pillugit, Demokraatit qineqqusaarutigalugit anguniagarinerarpaat.
Isorinnittut neriorsuutinnik eqquutititsinnginnerassavaatsit.
Isornartorsiuisartut oqarumaarput qineqqusaarutitit unioqqutikkitit. Naalakkersuisooqatigiit amerlanerussuteqaratik qineqqusaarutivit piviusunngortinneqarnissaannut naalakkersuisooqatigiinni amerlanerussuteqartoqannginnera akueraajuk; aamma aningaasaqarnermut tunngatillugu?
- Qineqqusaarninni neriorsuutikka puigunngilakka, Jens-Frederik Nielsen akivoq.
- Naalakkersuisunili maanna ilaasortaavunga, tassanilu amerlanerussuteqartut ikinnerpaamik 16-iusariaqarput. Akisussaaffimmik tigusinissaq isumaqatigiissuteqarnissarlu kiisalu ajornaraluartikkaanniluunniit naapeqatiginninniarsinnaanissaq pisariaqartarpoq.
Naalakkersuisut 'nunap aningaasaqarneranut immikkut illuinnartumik akisussaaffimmik tigusinerat', Jens-Frederik Nielsen oqaluttuarpoq.
Aningaasanut inatsisissami pisortani 600 millionit koruuninik sipaarniarnissartik erseqqissarpaa; sinerissamullu qanittumi pisassiissutinik ilasisimanertik aamma.
- Utoqqalinersiassanik pinngitsaaliissummik katersititsinermut tunngatillugu, inuit ukiumiit nutaamit amerlanerusunik akileraaruteqalinnginnissaat qulakkeerparput, taanna oqarpoq.
Atassut Nalerarlu qinersineq sioqqullugu illuatungiliuttooqatigaasi. Taakkua aamma aningaasaqarnerup allatut ingerlanneqarnissaa piumasaraat. Demokraatit Nalerarlu katillugit 18-inik ilaasortaatitaqarput. Soormi taakku peqatigalugit ingerlariaaseq nutaaq taanna atulerussiuk?
- Naalakkersuisut pilersinneqarnissaat pillugu isumaqatigiinniarnerit qanoq ingerlasimanerat oqaatigisinnaanngilara, naalakkersuisooqatigiittulli suleqatigisinnaasagut tassaasut maanna naalakkersuisuni ilaasortat, isumaqatigiinniarnerit naammassimmata erseqqippoq, naalakkersuisut siulittaasuat akivoq.
Allanngortoqanngitsoq
Naalakkersuisuni siulittaasuusimasoq, Múte B. Egede (IA) Aningaasaqarnermut Akileraartarnermullu maanna Naalakkersuisunngorpoq; atorfik ataatsimiititaliami assinganik taaguutilimmi ullumikkut siulittaasuusumit Erik Jensenimit (S) akisussaaffigilerpaa.
Naalakkersuisooqatigiit siuliisa aningaasaqarnermut politikkiannik ingerlatitseqqiisutut taaneqarnersi qanoq oqaasissaqarfigaajuk?
- Tamanna isumaqataaffiginngilara, Jens-Frederik Nielsen.
- Isumaqarpunga aningaasaqarnikkut pissutsit immikkut ittut tamatta akisussaaffigilerigut. Immikkut ittumik akisussaaffeqalerujussuarpugut, ajornartorsiullu aaqqikkumallugu pisortat aningaasaqarniarnerannut tunngatillugu angisuumik nassuerutiginnittariaqarluta.
- Anguniagaq suli taannaavoq. Kinguaagut akiligassinneqannginniassammata aningaasaqarniarnerput patajaatsuussaaq. Tamatumalu anguniarnerani imaannaanngitsunik aalajangiiffigisassaqarumaarpoq. Inuiaqatigiittut ingerlalluarnissarput akisussaaffigigatsigu, aalajangigassat imaannaanngitsut aalajangiiffigisariaqarpagut.
Demokraatit naalakkersuisooqatigiinni maanna aqutsisuunerat qanoq takuneqarsinnaava?
- Naalakkersuisooqatigiit akisussaassusilimmik politikkeqarput, taanna akivoq.
- Demokraatinut siulittaasuuvunga naalakkersuisunulli siulittaasuunissaq suliassaraara.
Taamaattumik naalakkersuisuutitatta nunap manna ingerlanneqarluarnissaanut tunngavissaqarluarnissaat siunertaralugu sulivunga. Suleqatigisartakkagut peqatigalugit taamaaliortarpunga.
2026-mut isumalluarneq
Jens-Frederik Nielsenip innuttaasut suna 2026-mi qilanaarisinnaaneraat eqqartorneqartillugu isumalluarnini arlaleriarluni oqaatigaa.
- Isumaqarpunga 2026-mut ineriartorfiulluarnissamut periarfissalik qilanaarisinnaagipput. Immikkoortortaqarfinnik siuariartortunik peqarpugut, taanna oqarpoq.
Tassani pingaartumik aalisarneq eqqaavaa qanorlu - naak aalisarneq ilaatigut ajornakusoorfiugaluartoq - aalisakkat ilaatigut akigissaarnerulersimanerat eqqaallugu.
- Taavalu nunat allat aamma suleqatigisarpagut, tamannalu periarfissanik pilersitsivoq.
Suleqatigiinneq Jens-Frederik Nielsenip eqqaasaa Danmarkimut 1,6 milliardit koruuninik nalilimmik tunngaviusumik isumaqatigiissuteqarnerannut tunngassuteqarpoq, aningaasallu taakku Qaqortumi immami itisuumi umiarsualiviliornissamut Ittoqqortoormiinilu mittarfiliornissamut ilaatigut atorneqassapput.
- EU-lu aamma suleqatigiippugut tamannalu periarfissanik angisuunik pilersitsivoq taakkualu atorluassavagut, naalakkersuisut siulittaasuat naggasiivoq.
