Isumaqatigiissut nutaaq aalisakkat atorluarneqarnerunissaannut orniginarnerulersitsissasoq
Aalisakkat tingui, niaqui, amii, naavi timitaallu naleqangaarput.
Taamaakkaluartoq aalisakkat amiakkui amerlasuut assartornissaat arlalitsigut akisuallaassammat atorluarneqarneq ajorput.
Tamanna Royal Arctic Linep Kalaallit Nunaannilu aalisarnermik ingerlatseqatigiiffiit annerit pingasut suliniuteqarnerannit maanna allannguiffigineqassaaq.
Royal Greenland tusagassiuutinut nalunaarummi taama allappoq.
Nalingi tamarmik atorluarneqarlik
Aalisakkat amiakkui, aalisakkat tunisassiarineqarnerani sinneruttut, isumaqatigiissutip kingunerisaanik assartugassatut akikinnerulersinneqassapput.
Aalisakkat amiakkui igiinnarnagit ilaatigut aalisakkap uuliaanik pilersitsinermut qajuusiornermulluunniit atorneqarnissaat siunertarineqarpoq.
- Kalaallit Nunaanni pioreersunik iluaqutissanik qanoq iliorluta annertunerusumik naleqartitsisinnaanersugut eqqarsaatigissallugu pissusissamisoortuuvoq, Niels Clemensen, Royal Arctic Line pisortaanera oqarpoq.
Taassuma aalisakkanik tunisassiornermi atorluaanerulernerup suliassanik suliffissanillu nutaanik pilersitsinissamut tunngaviliisinnaaneri maluginiaqquai.
Najukkami tunisassiorneruneq
Akikinnerusumik assartuilerneq amiakkunik nunatta avataanut assartuineq taamaallaat akikinnerulersissanngilaat.
Aammattaaq Kalaallit Nunaanni tunitsiviit tunisassiorfiillu akornanni assartorneqarnissaannut pilerinarsaassapput.
Taamaalilluni isumaqatigiissut najukkami tunisassiornerulernissamut nalittorsaanissamullu aqqutissiuisinnaavoq.
- Tunisassiornermi amiakkut atorluarneqarsinnaanerulerpata aammalu Kalaallit Nunaanni suliarineqarsinnaappata, tamanna tunisassiornermut aammalu nalittorsaanerullu tungaatigut nunatsinni periarfissanik nutaanik pilersitsissaaq. Tamanna ineriartortitsineq inuussutissarsiuteqartut tamarmik taperserpaat, aalisakkanik tunisassiortut ataatsimoorlutik taama nalunaaruteqarput.
Aammattaaq Royal Arctic Linep umiarsuai Kalaallit Nunaanniit aallaraangata assartugassanut inissaatai isumaqatigiissut aqqutigalugu atorluarneqassapput.
Namminersorlutik Oqartussat suliniut tapersersoraat
Aalisarnermut, Piniarnermut, Nunalerinermut Imminullu Pilersornermut Naalakkersuisup, Peter Borgip suliniut nuannaarutigaa.
- Nuannaarutigaara inuussutissarsiortut aalisakkanik suliarinninnerup annertusarnissaanut aammalu aalisarnikkut pisuussutitsinnit naleqarnerulersitsinissamut annertunerusumik suliniuteqarsimanerat, taanna tusagassiuutinut nalunaarummi oqarpoq.
- Aalisakkeriviit Royal Arctic Linellu suleqatigiinnerat, aalisarnikkut pisuussutivut suleqatigiinnitsigut pitsaanerusumik qanoq atorluarsinnaanerannut, inuussutissarsiornermi periarfissanik nutaanik pilersitsisinnaanermut aammalu Kalaallit Nunaanni naleqarnerulersitsinermik annertusaasinnaanermut assersuutissaalluarpoq, Peter Borg oqarpoq.
Tamanna Naalakkersuisut aalisakkat atorluarneqarnerulernissaat siunertaralugu Iceland Ocean Cluster suleqatigalugu Greenland Ocean Clusterimik pilersitsineranut naapertuulluartuunerarpaa.
Isumaqatigiissut atuutsinneqalereerpoq Royal Arctic Linellu, Royal Greenlandip, Polar Seafoodip Halibut Greenlandillu akornanni isumaqatigiissutaalluni.
Aalisakkanik tunisassiornermi amiakkunik akikinnerusumik assartuinissamut isumaqatigiissut atuutilereerpoq.
