Nunatsinni syfilisertut amerliartuinnassappata inuiaqatigiinnut oqimaatsorujussuusinnaasoq
Nunatsinni syfilisertut ukiuni kingullerni qulini amerliartuinnartut KNR-imit sapaatip akunnerata siuliani oqaluttuaraarput.
Syfilisimik 2015-imi tunillatsissimasut 50-it missaat 2024-mut sanilliukkaanni tunillatsissimasut sisamariaataannik tassa 250-ingajannik amerlanerlulersimasut, peqqissutsimut siunnersuisoqatigiit ukiumoortumik nalunaarusiaanni saqqummiunneqarpoq.
Nunatsinnilu syfilisertut amerliartuinnassappata inuiaqatigiinnut akisullunilu oqimaassinnaasoq, Dronning Ingridip Napparsimmavissuani nakorsaq kinguaassiutitigut nappaatinut immikkut ilisimasalik Marie Middelfart oqarpoq:
- Pingaartorujussuuvoq syfilisip nunatsinni pinaveersaarneqarnissaa, pissutigalugu syfilisi sivisuumik atorsimagaanni ulorianartunngorsinnaagami.
- Taamaalilluni inuiaqatigiinnut oqimaattorujussuanngorsinnaavoq akisoorujussuanngorlunilu, Marie Middelfart oqarpoq.
Timikkut akuttusuumik malugineqartartoq
Syfilisimik tunillatsissimagaanni timikkut malugineqanngitsoorsinnaasarpoq tamannalu mianersorfissaavoq:
- Aallaqqaammut inuup ameraasaanut pulasarpoq taava tassani ikinnguussinnarluni ingerlaqqittarpoq, aammukarluni taava siaruaalluni.
- Inuup ameraasaanut pulaqqaaraangami, ikinnguukkaangami malunnaateqarneq ajorpoq, tassa taanna erloqinartua. Toqqoqqasinnaallunilu malunnaateqarani soorlu arnap iluani, imaluunniit angutip quisarfiani toqqusaani, taanna oqarpoq.
Atoqatigiinnikkut tunillatsereernerup kingorna aaversinnermi takuneqarsinnaanera aamma sivisusinnaasarpoq.
Inummiilli inummut assigiinngitsumik malunniuteqarsinnaasartoq Marie Middelfartip aamma oqaatigaa:
- Soorunami taanna ikeq ersissinnaavoq. Ersippat, inuup takussuaa, nakorsiassooq, nakorsaq misissugassamik tigusissaaq, nassiullugu paasiniarlugu sunaanersoq.
Kinguaassiutitigut nappaatit allat aamma tunillaassuutingaatsiartut
Nappaat syfilis sivisuumik pigisimagaanni katsorsartissimanngikkaannilu navianarsinnaavoq. Taamaammat katsorsarnissaa pingaaruteqartoq nakorsap aamma oqaatigaa:
- Pingaartupilussuuvoq syfilis katsorsarneqarnissaa, aamma katsorsaruminartorujussuuvoq.
- Inuit pingasoraarterutai katsorsarneqanngitsut, soorlu immaqa ukiut qulit qaangiuppata, kingunerluutigilersinnaavaat. Syfilis uummatikkut napparsimalertitsisinnaavoq, taavalu inuup sianiutaani, qarasaatigut napparsimalertitsisinnaavoq. Taamaalilluni syfilis ulorianartunngorsinnaavoq, taanna oqarpoq.
Nunatsinni gonorertut ukiuni kingullerni ikileriagaatsiarsimasut Peqqissutsimut Siunnersuisoqatigiit ukiumoortumik nalunaarusiaanni allaqqavoq.
Taamaakkaluartoq klamydiamik nappaateqalersartut suli amerlapput:
- Ukiumut klamydiartut 3000-t. Syfilisertut aamma taamaalissagaluarunik ernumanarsinnaavoq.
- Taamaammat pinaveersaartitsinissaq pisariaqarpoq. Aaversikulaassuusi, usuup puualu atortarlugu, Marie Middelfart oqarpoq.
