Israelimiit paasissutissiisut: Israelikkut Gazap illoqarfiani saassussillutik aallartipput

Israelip sakkutuui, IDF, Gazap illoqarfianukarput ataasinngornermi.

Atorfilittat Israelimeersut atersineqanngitsut tusagassiuummut Axiosimut marlunngornerup unnuaani taama ilisimatitsipput.

USA-p nunanut allanut tunngasunut ministeriat, Marco Rubio, Israelimilu ministeriuneq, Benjamin Netanyahu taassumallu naalakkersuisoqarfiani inuit nuimasut naapereersullu saassussineq aallartinneqarpoq. 

Atorfilittat Israelimeersut marluk atiminnik isertuussisut, Axiosimut oqarput, Rubio Netanyahumut oqarsimasoq, USA-p præsidentiata, Donald Trumpip, saassussineq taperseraa.

Atorfilittat naapertorlugit taassumap kissaatigaa suliaq ingerlaannaq aallartinneqassasoq piaarnerpaamillu naammassineqassasoq.

Atorfilittat taama paasissutissiisut, saassussineq pillugu aamma paasissutissiisuunersut takuneqarsinnaanngilaq.

Saassussineq annertooq

AP naapertorlugu Rubio marlunngornermi ullaakkut Qatariliarluni Israelimi illoqarfissuarmi Tel Avivimi mittarfimmit aallarami aamma oqarpoq saassussineq aallartittoq.

- Israelikkut tassani ( Gazami, aaqq.) sakkuaatilersimapput, taamaattumik isumaqarpugut (sakkussiaaruteqarnissamut) isumaqatigiissuteqarsinnaanissatsinnut piffissaq killeqartorujussuusoq. Qaammataanngitsut ulluinnaalli immaqalu sapaatit-akunneri arlaqanngitsut taamaallaat periarfissaraagut, taanna oqarpoq.

Ataasinngornermi unnukkut Israelip sakkutuui timmisartortartut illoqarfik Gaza saassuterujussuarpaat. Kinguninnguagut Israelikkut qamutaat sorsuutit illoqarfimmut pulapput, Axios naapertorlugu Palæstinami tusagassiorfik taama nalunaaruteqarsimavoq.

Marlunngornerup unnuaani illoqarfik Gaza suli timmisartunit saassunneqartoq, takunnittoq AFP-mut oqarpoq.

Mahmud Bassal, Gazami innuttaasunik illersuiniaqatigiit oqaaseqartartuat, aamma taamatut oqariartuuteqarpoq.

- Qaartartut illoqarfimmut Gazamut suli nakkaapput, toqutaasullu ikiligaasullu amerliartortuarput, Bassal AFP-mut oqarpoq.

Gazap illoqarfia sakkutuuniit saassunneqarnersoq, IDF-imiit pisortatigoortumik marlunngornerup ullaavani suli nalunaarutigineqanngilaq.  
Benjamin Netanyahup maajimi nalunaarutigaa, Israeli Gaza tamaat tiguarniarlugu pilersaaruteqartoq. Israelip sakkutuuisa illoqarfiup Gazap tiguarnissaanut pilersaarut aggustimi akueraat, tamatumalu kingorna saassussinerit siulliit aallartipput.

/ritzau/