Mette Frederiksen milliardilinnik aningaasaliineq pillugu: Kalaallit Nunaata qajannaannerunissaanut tapersiissaaq

Siunertanut sammivinnullu siammasinnerusunut annertuumik nukittunerusumillu aningaasaliineruvoq.

Ministeriunerup,
Mette Frederiksenip naalakkersuisut siulittaasuat, Jens-Frederik Nielsenilu (D)
isumaqatigiissutigeqqammigartik taama
nassuiaatigaa.

Danskimmi
2026-mut aningaasanut inatsisaanni 1,6 milliardit koruunit nunatsinni
aningaasaliinernut atorneqartussat 2029-p tungaanut immikkoortinneqarput. 

Isumaqatigiissummi
marlunngornermi atsiorneqartumi Ittoqqortoormiini nunap immikkoortuani
mittarfimmut nutaamut aamma Qaqortumi umiarsualivimmut nutaamut ilaatigut
atorneqassasut allassimavoq.

Qaammatini
kingullerni isumaqatigiinniarnerit inernerigaat, Mette Frederiksen oqarpoq.

- Kalaallit
inuiaqatigiivinut nukittunerusumik qajannaannerusumillu pilersitsinissamut
taperseeqataarusuppugut, ministeriuneq oqarpoq.

Sillimaniarnermi politikikkut pissutsit nutaat

Politikerit
arlallit nunanit allanit aningaasaliinerit piffissami sivisuumi
tikilluaqqusarpaat. Maannalu nunatsinni attaveqatigiinnermut annertuumut
aningaasaliisoqarnera politikkikkut aningaasaliinerunissamut siullertut
takussutissaasoq, ministeriunerup oqaatigaa.

Mette
Frederiksen, aningaasaliinerit uku danskit Kalaallit Nunaanni inuiaqatigiinnut
siornatigut aningaasaliivallaarsimannginnerannik nassuerutiginninneruppat?

-
Pingaarnertut politikkikkut aningaasaliinissamut piumasaqarnermik ersersitsivoq
aningaasaliinerunissamillu. Imaanngilarli Danmark siornatigut
aningaasaliisimanngimmat, Danmarkimi taamaalioreerpoq, kisiannili anguniagarput
suli naammassinngilarput, isumaqarpungalu unammisassarpassuaqartoq erseqqittoq.

- Aamma
isumannaallisaanermut politikkimut tunngatillugu nutaami inissisimavugut,
tamannalu ingerlanerani Issittoq pillugu isumaqatigiissummik nutaamik
suliaqarpugut, Kalaallit Nunaata nukittunerulernissaanut illersornissaanullu
iluaqutaasussaq. Taamaattumik suliassaqarfinni assigiinngitsuni arlalinni
suliaqarpugut. Tamanna nutaajuvoq isumaqatigiissut annertoorujussuummat
isumaqatigiissullu tunngaviusoq ukiuni arlalinni atuuttussaammat, tamannalu
nuannaarutigeqaara, Mette Frederiksen oqarpoq.

Naalagaaffeqatigiinnut pisussaaffik

Nunarput
amerikamiut præsidentiata, Donald Trumpip nunarput USA-mut ilaalertariaqartoq
arlaleriarlugu oqaatigereeraalu sammineqangaatsialerpoq.

Tamatuma
saniatigut amerikamiut naalakkersuisuisa  Danmark nunatta
illersorneqarnissaanut naammattumik aningaasaliisisimanngitsutut
isornartorsiorpaat.

Aningaasaliinerit
uku USA-p Kalaallit Nunaannut soqutiginnilluinnarneranut tunngassuteqarpat?

-
Qanorluunniit pisoqaraluarpat taama iliortussaavugut. Ministeriunertut
naalagaaffeqatigiinni tamarmi annertuumik pisussaaffeqartutut misigisimavunga,
aningaasaleerusussuseqarnermut takutitsinernut ilaasinnaavoq, Mette Frederiksen
oqarpoq.

Isumaqatigiissummittaaq Danmarkip kalaallit napparsimasut danskit napparsimmaviini katsorsarneqarnerannut aningaasartuutit akilertalissagai allassimavoq.

Tamanna
naalakkersuisunit kissaatigineqarsimasoq, Mette Frederiksenip oqaatigaa.

- Danskit
naalakkersuisuinit taama iliorusulluta oqarnerput pissutaanngilaq.
Naalakkersuisut kissaateqarnissaannut periarfissiiniarsimavugut. Taakkulu
misissorpagut sinaakkutitullu isumaqatigiissuteqarluta, ministeriuneq oqarpoq.

Nunatta
peqqinnissaqarfik 1992-imi akisussaaffigilerpai.