Vivian Motzfeldt Naalagaaffiit Peqatigiit pillugit: - Aatsaat taama ullumikkut pingaaruteqartigilerput

Nunanut allanut naalakkersuisoq, Vivian Motzfeldt (S) Naalagaaffiit Peqatigiit New Yorkimi septembarip 23-anni ukiumoortumik ataatsimeersuarnissaata ammarneqarnerani peqataassaaq.

Naalakkersuisut tusagassiuutinut nalunaarummi allapput.

- Naalakkersuisunut Kalaallillu Nunaannullu piffissaq manna naleqqulluinnarpoq peqataanitsigut Naalagaaffiit Peqatigiinni nunat tamat akornanni suleqatigiinnermik tapersersuinerput takutissallugu, suleqatigullu qaninnerpaat peqatigalugit akisussaaqatigiinnermik takutitsillutalu naalagaaffiit innuttanut pisussaaffii namminerlu aalajangiisinnaatitaanerup nunat tamat akornanni aalajaatsumik tunngaviusuusut aalajangiusimallugit ersarissassavarput, Vivian Motzfeldt tusagassiuutinut nalunaarummi oqarpoq, nangillunilu:

- Piffissami nalorninartumi inuuvugut, taamaammallu peqataanissaq isumalu tamanna pillugu nunanik allanik ingerlaavartumik oqaloqateqarnissarput pingaaruteqarpoq.

Naalagaaffiit Peqatigiit tatineqartut

Naalagaaffiit Peqatigiit ukiuni kingullerni ilungersunartorsiorput - pingaartumik Israelip Hamasillu akornanni sorsunneq pissutigalugu, Naalagaaffiit Peqatigiiffiisalu eqqissisoqarnissaa sulissutigigaluarlugu aaqqiissutissamik suli iluatsitsinngillat.

Taamaammat nunat inoqqaavisa inuillu nalinginnaasunut tapersersuinermik ilaatigut takutitsinissaq pingaaruteqartoq, Vivian Motzfeldt oqarpoq.

- Naalagaaffiit Peqatigiit ilungersunartorsiorpoq, tunngaviusumilli nunat tamat akornanni inatsisinik toqqammaveqartumik ingerlatsinermi qulakkeerinnittuupput. Naalagaaffiit peqatigiit aatsaat taama ullumikkut pingaaruteqartigilerput.

Tamatuma saniatigut naalakkersuisup nunatta politikikkut siunissamut anguniagaanik oqaluttuarnissaq pingaartippaa.

Tamanna nunanik sanilerisatsinnik suleqatigisatsinnillu ilaatigut ataatsimeeqatiginninnikkut pissaaq, naalakkersuisullu tamanna sulissutigaat, tusagassiuutinut nalunaarummi allassimavoq.