Avannaata Kommuniani inatsisitigut aaliangiussat utertiinnarneqartartut
Avannaata Kommuniani politikerit inatsisitigut tunngavilersorluagaanngitsunik aalajangiisarput, aalajangiussat atorunnaarsittariaqarnerannik kinguneqartartunik. Tamanna atorfilittat politikerillu sulerulunnerannik kinguneqartarpoq.
Allattoq Jonna Enoksen Dahl
Kommunalbestyrelse sapaatip akunnera kingulleq sisamanngornermi immikkut ittumik ataatsimiikkami Avannaata Kommuniani timersortarfinni nukkassarnermut atortut akeqanngitsumik atorneqarsinnaanerinik aalajangernini atorunnaarsippaa.
Kommunip politikeriisa tamatuma siuliani atortut taama ittut kommunip timersortarfiini akeqanngitsumik atorneqarsinnaalissasut aalajangeraluarpoq.
Taamali aalajangerneq Nunamut Namminermut Naalakkersuisoqarfiup misissormagu, kommunip aningaasanik annaasaqarnissaanik kinguneqassasoq inerneruvoq.
Taamaammat kommunimi politikerit aalajangernertik atorunnaarsittariaqarpaa.
Kommunalbestyrelsimi ilaasortap, illua tungiliuttuneersup Heidi Møllerip (D) tamanna isornartorsiorpaa.
-Innuttaasunut sullissiniarnitsinnut nukik atorneqartussaagaluaq aammalu periarfissanut tamaaneereersunut periarfissanullu takkuttussanut nukik atugassaraluarput sulianik uterteqqittaqattaarinermut, misissueqqinnernut ilaatigullu sulerulunnermut kinguneqarsinnaasunik malitseqarsimavoq.
Avannaata Kommuniani kommunalbestyrelsimi ilaasortaq Heidi Møller (D)
Ukioq manna aappassaa
Avannaata Kommuniani timersortarfiit akeqanngitsumik atorneqarsinnaanerisa atorneqarsinnaajunnaarnerata saniatigut, eqalussuit aalisartunut akornutaammata, eqalussuarnik 1.000-inik toqoraanissaq kommunalbestyrelsimi ilaasortanit amerlanerussuteqartunit aaliangerneqarpoq.
Taamatullu aalajangerneq Avatangiisinik illersuiniaqatigiiffiup Oceans North Kalaallit Nunaata sakkortuumik isornartorsiorpaa.
Eqalussuarniartitsisalernissap Kalaallit Nunaata tusaamaneqarneranut eqalussuillu siunissaannut ajoqusiisinnaaneq Oceans North Kalaallit Nunaata tunngavilersuutigigai, nutaarsiassaqartitsivik Sermitsiaq apriilimi allappoq.
Eqalussuarnik piniarsinnaalernissaq inatsisitigut tunngavissaqanngitsoq, kommunalbestyrelsip marsip ulluisa 27-anni ataatsimiinnermini paasivaa.
Taamalu aalajangersimagaluarneq kommunalbestyrelsip atorunnaarsittariaqalerpaa.
Politikkikkut aalajangiinerit atorunnaarsinneqartariaqartarnerat innuttaasunut sunniuteqarsinnaasoq Heidi Møller isumaqarpoq.
-Uani aningaasat innuttaasut akileraarutaat taavalu aamma kommunip ingerlanneqarnissaanut aningaasat immikkoortinneqarsimasut taakku malillugit kivitassarput killeqalersinnaammat annertoorujussooreertorlu una kivitassaq kommune taama annertutigitillugu avinngarusimatigitillugillu.
KNR-imit Avannaata Kommuniani borgmesteri Lars Erik Gabrielsen (S) oqaaseqartinniaraluarparput, taannali oqaaseqarumanani nalunaarpoq.
Siumut Nalerarlu Avannaata Kommuniani suleqatigiinnissamik isumaqatigiissuteqartuupput.