Siumumi siulittaasoq: Innuttaasut sakkussiaqarnerulernissamik sakkutooqarnikkullu sungiusarnissamik piumasaqarnikuunngillat
- Soorluluunniit Danmarki NATO-milu suleqataasa nunarput namminneq iluarisaminnik qanorluunniit iliorsinnaaffigisatut isigigaat. Tamanna unittariaqarpoq.
Siumup siulittaasua, Aleqa Hammond, KNR-imit apersorneqarluni taama oqarpoq.
Nunatsinni sakkutooqarnikkut sungiusartoqartussaatillugu assigisaanilluunniit pisoqartussaatillugu, innuttaasut aalajangeeqataanissaannut peqataatinneqartarnerat naammaginanngissorigamiuk pakatsivoq.
- Nunatsinni innuttaasut issittumi sakkutooqarneq pillugu isumaqatiginninniarnernut peqataasimanngillat arlaatigulluunniit tamakkununnga peqataarusunnertik ersersissimanagu, taanna oqarpoq.
Aleqa Hammondip marlunngornermi tusagassiuutinut nalunaarummi isornartorsiuinini saqqummiuppaa, tassanilu illersornissamut isumannaallisaanermullu tunngatillugu maani nunami aalajangiisarneq apeqquserpaa.
Sakkutooqarnikkut sungiusarnerit, sakkutooqarnerup annertusarneqarnera illersornissamullu tunngasunut allanut tunngatillugu innuttaasut maannamut taamaallaat ilisimatinneqartartut, Siumup siulittaasua KNR-imut oqarpoq.
- Piffissaq allaalluinnarpoq. Inuiaqatigiit kalaallit tusaaneqarusupput nunarput pineqarmat nunallu nammineq avatangiisiminut piginnittuunera atuummat, tamannalu ataqqineqassaaq isumaqatigiissutinilu tamani qitiulluni, taanna oqarpoq.
Naalakkersuisunik isornartorsiuisoq
Sakkutooqarnikkulli sungiusarnernut kiisalu illersornissamut isumannaallisaanermullu tunngasunut aalajangiinerit nunarput kalaallillu peqataatinnagit suliarineqannginnissaat naalakkersuisut arlaleriarlutik erseqqissartarpaat.
- Nunatta siunissaa uagut nunatsinniittugut aalajangissavarput, Jens-Frederik Nielsen (D) Inatsisartut septembarip 19-ani ataatsimiinneranni siullermi ammaanersiorluni oqalugiarnermini oqarpoq.
Aleqa Hammondip parteeqataa, nunanut allanut ilisimatusarnermullu naalakkersuisoq Vivian Motzfeldt (S), septembarip qiteqqunnerani sakkutooqarnikkut sungiusarnermut Arctic Lightimut atatillugu innuttaasut peqataatinnissaat pingaaruteqartoq oqarpoq:
- Illersornissaqarfiup sungiusartitsiniarluni piginnaanngorsaaniarlunilu maaniinnera Naalakkersuisullu suliniummut peqataanerat kikkut tamarmik ilisimaniassammassuk, taama oqarpoq.
Nunamili maani sakkutooqarnerulerneq innuttaasunit aalajangiiffigineqartariaqarnera Siumup siulittaasuata isumaqataaffiginngilaa.
- "Peqataatinneqarneq" "paasissutissinneqarsimanerluunniit" isumaqatiginninniarnernut peqataasimanertut paasineqarsinnaanngilaq, oqarpoq nangillunilu:
- Namminersornerup namminerlu aalajangiisinnaassuseqarnerup piviusumik atuutsinneqarnissaa kiisalu nunatta imartaani silaannaanilu tamakkiisumik kalaallit aalajangiisinnaatitaanissaat pingaaruteqartorujussuuvoq. Maannakkut periaaseq tamassumunnga naapertuutinngitsoq suli isumaqarpunga, taanna oqarpoq.
Vivian Motzfeldt (S) nunanut allanut sillimaniarnermullu akisussaavoq. Isornartorsiorpiuk?
- Naalakkersuisut ataatsimut isigalugit isornartorsiorneqarput. Inuit ataasiakkaat pineqanngillat. Siumumi naalakkersuisooqatigiinnut ilaagatta imaanngilaq isornartorsiuisinnaanngitsugut, Aleqa Hammond akivoq.
KNR-ip nunanut allanut ilisimatusarnermullu naalakkersuisoq Vivian Motzfeldt (S) saaffigalugu parteeqataata naalakkersuisunik isornartorsiuinera pillugu akissuteqarfigerusuppaa. Akissuteqarnissaa utaqqivarput.
