Arsaanneq: Kalaallit Sloveniamut ajorsaqqarput
Unammersuarnermi Amateur Nations Cupimi Østrigimi pisumi kalaallit peqataanerat pingasunngornermi naammassimmat Sloveniap akissarsiutiginagu nunanut allanut unammisartunut 4-5-mik ajorsaqqalaarput.
Ajorsarneq annernarseriaannarpoq piffissami dommerip ilassutani Sloveniamut ajugaassutigisartik isertimmassuk naak kalaallit siuaqqasaraluartut.
- Assorsuaq uggornarpoq aammali uatsinnut assut ilikkagaqarfiulluni, kalaallit nuna tamakkerlugu sungiusaasuat Morten Rutkjær KNR-mut oqarpoq.
Rene Eriksen Petersen tulleriiginnarnik marloriarluni isertitsimmat kalaallit 2-0-mut siuarput. Sloveniamiulli sukariarput angummallutillu. Sulili pipput. Tassami Slovenia 3-2-mut siuarpoq kingornalu Mathias Christensen kalaallini isertitsimmat kalaallit 3-3-mut anngupput.
Kinguussaaqqalaarput
Nemo Thomsenip aamma kalaallit 4-3-mut siuartippai kingornali Slovenia angummateqqippoq eqqaaneqareersutullu dommerit sivitsuissutaa ingerlalereersoq ajugaassutigisaminnik isertitsillutik.
- Oqartariaqarpunga unamminermi matumani kalaallit arsaattarnerisa inissisimanera ersarissisinneqartoq takuneqarsinnaammat silami arsaannermi ukiumut qaammatit marluk pingasut taamaallaat sungiusartartut. Pikkunartumik misigisaqareerluni isumaliutiginngitsuugassaanngilaq qulisamik timersortarfeqartuuppat sumut killissimassagaluarnersut, Morten Rutkjær oqarpoq.
Kalaallit arsaattartut maanna angerlamut ingerlaarput aatsaallu aappaagu silami arsaannermi pisoqaqqissalluni. Maanna misilittakkatigut Østrigimi katersat isumaliutigineqarput.
- Uani arsaattartut eqeersarneqarput taama pikkoritsigisut akornanni arsaannermi suut piumasaqaataanersut. Tassani arsalerillaqqinneq eqqarsaatsikkullu piareersimaneq piumasaqataapput. Aammali unammersuarnermi peqataaffigisatsitut ittumi peqataassagaanni timikkut piareersimalluarnissaq takuneqarpoq, Morten Rutkjær oqarpoq.
- Uku unammisavut Østrigimi Sloveniamilu pingaartinneqarlutik pisoqarfiunerusartumik ingerlasuupput uagullu oqartariaqarpugut tassani katataaqqalaarluta aalaakkaasumik sungiusarneq Kalaallit Nunaanni ingerlanngimmat. Taamaattumik una angalaneq assut ilikkagaqarfiuvoq, Morten Rutkjær oqarpoq.
Siunissaq ungasinnerusoq eqqarsaatigalugu piareersarfigineqartoq tassaavoq 2027-mi qeqertarmiut unamminissaat Savalimmiuni pisussaq.
