EU piumasaqaateqassanani neriorsuivoq: Massa Kalaallit Nunaata siulittaasua Trumpi avaqqullugu oqaluttoq

Europa-Parlamentimi siulittaasoq piumasaqaateqassanani neriorsuivoq, massa Jens-Frederik Nielsen (D) Donald Trumpi naapikkusunneraa pillug akissuteqanngitsoq.

Allattoq Markus Valentin

oktobarip 09-at 2025 11:07

Nutserisoq Karla Heilmann

Jens-Frederik Nielsens (D) Europa-Parlamentimi oqalugiarnerata kingorna parlamentip siulittaasua Roberta Metsola peqatigalugu, ataatsimoorussamik tusagassiortunik katersuutsitsivoq.

Oqaluttuarisaanermi pingaarutilimmik pisoqarnerata pingaaruteqarnera erseqqissaatigaa.

- Kalaallit Nunaata EU-llu akornanni suleqatigiinnermi oqaluttuarisaanermi pingaarutilimmik pisoqarpoq, Roberta Metsola oqarpoq.

Aamma atuarukEU-Parlamentimi ersaattaattut: Kalaallit Nunaat nunat tamalaat akornanni saqqumisoq

EU Kalaallit Nunaannut piumasaqaateqarnianngitsoq aamma nammineq aalajangiinissamut pisinnaatitaanissaa pillugu tapersersorneqassasoq, taassuma aalajangersimasumik oqaatigaa.

- Kalaallit Nunaannukassaagut piumasaqaateqarnata kisianni ataqqeqatigiinnermik ikinngutigiinnermillu isumaqarluta. Nunassi killeqarfiisa innarligassaannginneranik aamma inatsisit atorlugit aaqqissuussinermi nammineerlusi aalajangiinissamut pisinnaatitaaffissinnik, Parlamentip inuiaat kalaallit suleqatigiuassavaat.

Nunarsuarmi allanngorartumi Issittup sakkutooqarnerunikkut suli pingaaruteqarneranik, Kalaallit Nunaannik suleqateqarnissap qanoq pingaaruteqartiginera erseqqissaatigaa.

- Isumannaatsuuneq patajaassuserlu siornatigut taamaattussaannartut isigisarput maanna isumannaatsuujunnartoq pillugu piffissami matumani naapippugut, Europa-Parlamentimi siulittaasoq oqarpoq nagillunilu:

- Issittup patajaannerulernissaa anguniarlugu, silap pissusaata allanngoriartornerata malitsigisaanik isertortunut siooranartunut pinaveersaartinnissaa aamma isumannaallisaanermi sunniuteqaleraluttuinnarnerisa aqunnissaannut, Kalaallit Nunaat peqatigalugu qanimut suleqatigiinneq attatiinnassavarput.

KALAALLIT NUNAATA EU-LLU SULEQATIGIINNERAT

EU nunatta aningaasaqarneranut tapiisut annerit tulliattut inissisimavoq. Aningaasaqarnermut inatsit ukioq mannamoortoq naapertorlugu 250 millionit koruunit sinneqartut EU-miit tapiissutigineqarput.

EU-p Kalaallit Nunaatalu akornanni isumaqatigiissutit aningaasaqarnermut tunngasut arlaqarput, taakku aalisarnermut ilinniartitaanermullu tunngassuteqarnerupput.

EU-p Ataatsimiititaliarsuata Kalaallit Nunaannut aningaasatigut tapiissutigisartakkatik 2028-miit 2034-mut marloriaatinngortinniarpaat. Tamannali suli akuerineqanngilaq.

Kalaallit Nunaat Issittumi nunani kisiartaalluni EU-mik suleqateqarnermik isumaqatigiissuteqarpoq.

Kalaallit Nunaat 1985-imi EU-mit, taamani EF-imik ateqartumit, ilaasortaajunnaarpoq.

Allisiguk

Donald Trump avaqqullugu oqaluttoq

EU-mut tikeraarneq kingulliunngitsoq neriuutigalugu, tusagassiortornik katersuutsitsinermi Jens-Frederik Nielsen oqarpoq.

- Apeqqummut Kalaallit Nunaat Europamut siunissami attuumassuteqarnerulissanersoq, oqarsinnaavunga neriuppunga.

Siulittaasup amerikamiut præsidentiat Donald Trump naapikkusunneraa kinguninngua tusagassiortup tyskip aperaa.

Aamma atuarukNunarput EU-mit aninermit ukiut 40-t qaangiuttut kingumut eqqarsaatiginnittoq

Jens-Frederik Nielsenilli apeqqut avaqqutiinnarlugu akivoq, USA-millu qanimut suleqateqarnissamik kissaateqarluni erseqqissaatigaa.

- USA ukiorpassuarni suleqateqatigilluarparput. Ataqqeqatigiissumik EU-mik suleqateqarnerput maanna patajaallisarparput. Kalaallit Nunaanni nunat tamalaat akornanni suleqatigiinnernut isummavut attattuaannarpagut: ataqqeqatigiinnermik tunngaveqassaaq aamma nunat tamalaat akornanni inatsisaannut ataqqinninneq.

- Ataqqinnittumik nipeqarluta USA-mik ajunnginnerusumik suleqateqarnerulernissarput kissaatigaarput. EU-mik patajaannerusumik ajunnginnerusumillu suleqateqalerneq, nunanik allanik patajaannerusumik suleqateqarnerulernissamut matusinerunngilaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.