Innuttaasut pisortanut 1.5 milliardinik akiitsoqartut
Nunatsinni innuttaasut pisortanut akiitsui 38 millionit koruunit sinnerlugit 2024-p 2025-llu akornanni qaffariaateqarsimapput.
Taamak Aningaasaqarnermut Akileraartarnermullu Naalakkersuisoqarfiup aningaasaqarnermut nassuiaatani aggustusimi saqqummersinneqartumi takuneqarsinaavoq.
Akileraarutissat sinnerinik akiligassanut akilersuineq allattukkani qullersaaqqippoq. Tassani Aningaasaqarnermut Akileraartarnermullu Naalakkersuisoqarfiup innuttaasut pisortanut akileraartarnermut akiliinissaminnut amigaataat 594.289,676 koruuniusut naatsorsorpaat.
Meeqqanut akilersuutit qaffariaateqangaatsiarsimapputtaaq. Meeqqanummi akilersuutinut akiitsut siornarniit 26 procentimik qaffariaateqarsimapput. Innuttaasut akiliinissamut amigaataat, maanna akiitsuusut 407.762.996 koruuniupput.
Ilinniarnermut atasumik taarsigassarsianut akiitsut marloriaatit sinnerpaat. ilinniarnermilu taarsigassarsianit akiligassat 11.117.735 koruuniniit 27.356.949 koruuninut qaffariaateqarput.
- Namminersorlutik Oqartussat modulikkaartumik ilinniarnermi taarsigassanut nutaamik pilersitsilernerannik nassuiaatissartaqarpoq, tassungalu atatillugu ilinniarnermi taarsigassarsianut suliat torersarneqarlutik.
Taamak ilinniarnermut atasumik taarsigassarsiat qaffariaateqangaatsiarnerat pillugu, Aningaasaqarnermut Akileraartarnermullu Naalakkersuisoqarfimmiit aningaasaqarnermut nassuiaammi allaqqavoq.
KNR-i akileraarutissat sinnerinik akiligassat qanoq ilillutik taamak qaffariaateqarujussuaqqinneri paaserusullugu Akileraartarnermut Aqutsisoqarfimmut attaveqarpoq.
