Istak aamma Kommuneqarfik Sermersooq isumaqatigiissuteqartut – atuarfik 2026-mi ammassasoq
Islandimiut sanaartugassanik suliaqartartuisa Istakip aamma Kommuneqarfik Sermersuup Nuummi atuarfimmi nutaami ikuallattoqaratarnissaanut atatillugu sillimaniarnermi teknikkikkut ajornartorsiutit piffissami sivisuumi isumaqatigiinngissutigaat.
Illuatungeriit maanna isumaqatigiissuteqarput, taamaalilluni ikuallattoqarnerani sillimaniarnermi maanna aaqqiissuteqartoqassalluni, kommune tusagassiuutinut nalunaarummi allappoq.
Ikuallattoqarnerani sillimaniarneq atuarfiup naammassiffissarisaanit ukiup aappaata affaa qaangiuttoq suli atulinnginneranut pisortatigoortumik nassuiaatigineqartarpoq.
Pisoq illua-tungeriinnut tamanut naammaginanngilaq – minnerunngitsumik atuartunut, ilinniartitsisunut aamma angajoqqaanut atuarfiup nutaap atulernissaanut qilanaaqisunut, kommune allappoq.
-Suliaq tamanut ilungersunarlunilu unammillernarsimavoq. Maannali ataatsimoorluta aaqqiissuteqarnitsigut sanaartornerup siuariarnissaa qulakkeerneqarmat nuannaarutigaara. Ataatsimoorluta anguniagarput erseqqippoq – meeqqanut sulisunullu sinaakkutinik pitsaanerpaanik pilersitsinissarput, taamaalilluni atuarfik 2026-mi atulersinnaanngorniassammat, Kommuneqarfik Sermersuumi Sanaartornermut Avatangiisinullu Ingerlatsivimmi pisortaq, Søren Krog Pedersen oqarpoq.
2026-mi ammassasoq
Illuatungeriit isumaqatigiissuteqarnerminni ataatsimut maanna pilersaarusiorput, tamannalu Kommuneqarfik Sermersuup aamma Ístakip ataatsimoorullugulu taperserpaat. Pilersaarutip sanaartornerup nanginneqarsinnaanissaa ikuallattoqarnissaanullu sillimanermut tunngasut inissinneqarnissaat qulakkeerai, tusagassiuutinut nalunaarummi allassimavoq.
Illuatungeriit marluk akornanni isumaqatigiissuteqartoqarneratigut atuarfimmi tissaluttaatinik nutaanik ikkussuisoqartussanngorpoq.
Nutaamik isumaqatigiissuteqartoqarnera kingunerisaanik atuarfik atuartunut 2026-mi aggustimi tikilluaqqusisinnaalerluni piareersimassasoq kommunip naatsorsuutigaa.
Illuatungeriit Nuummi atuarfiup ASK-ip oqummut misissorneqaleruttornerani atuarfiullu illoqarfiup qeqqaniittup USK-ip matuneqarnerata atuartullu illoqarfimmi sumiiffinni assigiinngitsuni atuartinneqarnerisa nalaani isumaqatigiissuteqarput.
ASK-ip oqummut misissorneqarnerata inerneri sapaatip akunnerata tulliani piareernissaat kommunip naatsorsuutigaa.
