Skattemiit utertuulersut: Aningaasat taamatut atussavagut

Innuttaasut 2024-mi 32.743-t akileraarpallaarsimasut ukioq manna akileraarutiminniit utertuussapput. Innuttaasulli 3.526-t akiliinikippallaarsimammata akiligassinneqarput.

Nuummi utertuussamaartut akiligassitsissamaartullu ilai illoqarfiup qeqqani KNR-imiit naapippavut.

Aviaja Brandtip Akileraartarnermut Aqutsisoqarfimmiit allagarsiani nuannaarutigaa:

- Ukiorpassuit utertoorneq ajorama, utertuulaarsimallunga nuannaarpunga.

Akileraartarnermut Aqutsisoqarfik akileraartartunut ukioq manna katillugu 253,1 millionit koruuninik innuttaasunut utertitsissaaq.

Aningaasat sumut atussaneraat aperineqaramik Karen Davidsen ima akivoq:

- Aappaagu 70-iliisussaagama sipaalaarniarama.

Klara Rosingillu aningaasat sumut atussallugit ima oqaatigaa:

- Pisiassaqarpunga, oqarnianngilangali suunersoq. Qanorlu naleqarnersoq. Pisariaqartinneqartorli. Sinneri aamma sumut atussallugit oqaatiginavianngilakka. Toqqortaatigeqqaarallassavakkali.

Suna tamarmi illua'tungeqartarpoq. Naak akiitsulinnik naapitaqanngikkaluarluta, 121,5 mio. koruunit siorna akiliinikippallaarsimasunut akiligassiissutigineqarput.