Arnat 1992-ip kingorna akuersineqaratik naartunaveersaaserneqarsimasut ajunngitsorsiassanik qinnuteqarsinnaalersut
Naalakkersuisut 1992-imi januaarip aallaqqaataata kingorna arnanut nammineq piumassuserinngisaminnik spiralilerneqarsimasunut imaluunniit allatut naartunaveersaaserneqarsimasunut ajunngitsorsiaqartitsinissamut qinnuteqarsinnaaneq ammarpaat.
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja Nathanielsen (IA) tusagassiuutinut nalunaarummi allappoq.
- Kiisami qinnuteqarnissamut ammassisinnaagatta oqiliallattorujussuuvunga. Uagut inuiaqatigiittut Naartunaveersaasersuisimanermut suliap ilaanut, Namminersornerullutik Oqartussat aamma Namminersorlutik Oqartussat ataanni ingerlanneqarsimasumut, akisussaaffimmik tigusinissarput Naalakkersuisut pingaartippaat.
- Suliaq taanna inatsisinuinnaq tunngasussatut annikillisinneqarsinnaanngilaq – inuit naleqarnerat aammalu anniartitsisimanerup nassuerutiginissaa matumani pineqarput. Ulloq septembarip 24-at Naalakkersuisut arnanut kalluarneqartunut pisortatigoortumik utoqqatserput. Naalakkersuisut oqaatsigut ullumi iliuuseqarfigaat, Naaja Nathanielsen oqarpoq.
Danskit ministeriunerat, Mette Frederiksen (Socialdemokratiet) naalakkersuisut siulittaasuata ullormi utoqqatsernerani aamma utoqqatsissuteqarpoq.
Inatsisilerinermi peqqissutsimullu immikkut ilisimasallit qinnuteqaatinik nalilersuissapput.
Sullissivik.gl aqqutigalugu qinnuteqartoqassaaq. Tassanngalu 2025-mi decembarip 31-ata tungaanut qinnuteqartoqarsinnaassalluni, qinnuteqaatillu tamarmik 2026-mi februaarip aallaqqaataat nallertinnagu aalajangiiffigineqassapput.
