Aningaasaqarnermut Siunnersuisoqatigiit: Inatsisitaat atuutilernissaat utaqqitillugu ajunngitsumik ingerlasoqarpoq

Aningaasaqarnermut Siunnersuisoqatigiit nalunaarusiaminni nutaami siorna inissisimaffik naatsorsorpaat. Ukioq manna aamma aningaasaqarnikkut qanoq inissisimasoqarsinnaaneranik naliliipput.

Allattoq Markus Valentin

januaarip 25-at 2026 10:00

Nutserisoq Tabetha Kreutzmann

Aningaasaqarnermut Siunnersuisoqatigiit nalunaarusiamik nutaamik saqqummersitsipput, tassanilu 2026-mi ukiup affaa siulleq nalilersorneqarpoq.

Inerniliinerit pingasunut avinneqarsinnaapput:

Aningaasaqarneq ingerlalluarpoq, nunap karsiata aningaasaatai appasinnerpaaffimminniingajapput, ukioq mannalu aningaasanut inatsimmi pisariaqartunik sipaarniartoqalerpoq.

Aamma atuarukNunatta karsiata ajornartoornerani pilersaarusiaq - 800 millionit maanna sipaarneqassapput

Missingerneqarsimasut kingulliit decembarimi saqqummiunneqartut naapertorlugit nunap karsia 386 millionit koruuninik amigartooruteqarpoq.

Taamaattumik mianersoqqussutit suli atuupput.

- 2025-mi pisortat aningasaqarneranni ilungersunartumik ineriartornerup nunatta karsiata isertitaani aningaasartuutaanilu aningaasaqarnerup ineriartorneranik aallaaveqartumik nikeriarnernut qajannartumik inissisimasoqarnera takutippaa, taamaalillunilu aningaasaqarnikkut politikkimi mianersortumik periuseqarnissaq pisariaqartinneqarpoq, siunnersuisoqatigiit allapput.

Aningaasaqarneq ataatsimut isigalugu

Siorna aningaasarsiorneq ataatsimut isigalugu 0,5 procentimik siuariarpoq, aappaagulu aningaasaqarnerup 1 procentimik siuariarnissaa siunnersuisoqatigiit naatsorsuutigaat.

- Nunap ataatsimut tunisassiatut pilersitai 0,5 procentimik annertuseriarsimasutut nalilerneqarput, taannalu ukiumi nunarsuaq tamakkerlugu tunillaassuunnerup siaruaannerani, tassa 2020-mi, annikitsumik siuariartornermit annertunerulaaginnarpoq, Aningaasaqarnermut Siunnersuisoqatigiit allapput.

Siuariarnerulaaginnarneranut pissutaasut marluk tassaapput: Mittarfiliornerit naammassiartulernerat raajartassallu ikiliartornerat.

Aalisarnerli ataatsimut isigalugu siornamut naleqqiullugu aamma siuariartoqarluarpoq, taamaammallu annikilliartornera annikilliallassimannginneruvoq.

Aamma atuarukSulisitsisut: Politikerit aatsaat naammattumik tatineqarpata iliuuseqartoqalissaaq

Saarulliit pisassiissutigineqartut taakkununngalu akigitinneqartut qaffakkiartornerat pissutigalugu aalisakkanik tunisassiat avammut tunisat nalingat ukiup ingerlanerani qaffariarpoq.

Nunat tamalaattaaq imartaanni, aamma 2019-imiilli siullermeerluni Kalaallit Nunaata imartaani avaleraasartoorpassuit pisarineqarput.

Raajarniarnerit annikilliartuaaginnarnissaat ilimagineqartoq, 2026-mut tunngatillugu siunnersuisoqatigiit allapput.

- Aalisarnermili ingerlatat allat ilaatigut avammut tunisat appariarnerannik illuatungiliisinnaapput, Aningaasaqarnermut Siunnersuisoqatigiit allapput.

Aamma atuarukDanskit milliardinik aningaasaliinerat nunatsinni missingersuutini periarfissiissasoq – peqqinnissaqarfiulli ingerlaneranut allannguuteqartitsisinnaasoq

Siornattaaq takornariat amerlisimapput, mittarfiillu nutaat aqqutigalugit takornariaqarneq annertusiartorpoq.

Takornariaqarneq aasaanerani qaammatinut sivikitsunut eqiterussimavoq, taamaattumillu ukiup sinneranut siaartitsinissaq suliniutaalluarsinnaasoq, Aningaasaqarnermut Siunnersuisoqatigiit nassuiaassipput.

- Piffissap takornariarfiusartup aasaanerani qaammatinit sivisuninngorlugu siaarnissaa kiisalu takornariaqarnerup nuna tamakkerlugu aningaasaqarnermut suli annertunerusumik ilapittuisinnaaneranut timmisartunik, akunnittarfinnik angallassisarnermillu naammassinnissinnassutsip annertusarnissaa pisariaqartinneqarpoq.

Taamaattumik nunap karsia amigartooruteqarpoq

Nunatta karsiata amigartooruteqarnera siorna NunaGreenimut 400 millionit koruuninik aningaasaliisoqarsimaneranik Greenland Airportsimullu 100 millioninik tunniussisoqarneranik pissuteqarnerarlugu Naalakkersuisut namminneerlutik nassuiaatigaat.

Aalisarnermi 2023-mi rekordiliisoqarpoq. Raajaqassuserli – kiisalu kiilumut akit – pisassiissutillu apparput.

Tamatuma saniatigut sanaartornerup annikilliartornera pissutigalugu aningaasaqarneq siuariartornikinneruvoq. Tamanna ilaatigut Nuummi mittarfiup nutaap sanaartorneqarnerani sanaartukkat annertuup naammassinerannik pissuteqarpoq.

Peqqinnissamut naalakkersuisoqarfiup ukioq manna aningaasartuutai 2025-mi missingersuutigineqaqqaartunut sanilliullugit 65 millionit koruuninik qaffapput. Saniatigullu soraarnerussutisiaqartunut 59 millionit koruuninik atuisoqarneruvoq.

Namminersorlutik Oqartussat ingerlatseqatigiiffiinit nunatta karsianut 107 millionit koruuninik akiliinikinnerusoqarnissaa aamma naatsorsuutigineqarpoq. Tamanna aalisakkerinerup ineriartorneranik siuariartortoqarnerata apparneranik pissuteqarpoq.

Tamatuma saniatigut Namminersorlutik Oqartussat ingerlatseqatigiiffiutaat ataasiinnarluunniit aningaasaqarnikkut siumut ilimaginngisamik ajortorujussuarmik ingerlappat tamanna nunatta karsianut annertuumik kinguneqarsinnaasoq, ukiut sisamat matuma siorna Naalagaaffiup Aningaaserivissuata siulittuutigaa.

Taamaattumik Naalagaaffiup Aningaaserivissuata aamma Aningaasaqarnermut Siunnersuisoqatigiit aningaasaqarnermut annertuumik aaqqissuusseqqittoqarnissaa innersuussutigaat. Tamatumalu saniatigut naalakkersuisoqatigiissimasut piffissanut ilungersuaffiusunut atorneqartussanut sipaarniaratik aningaasanik amerlavallaartunik atuisimanerarlugit isornartorsiorpaat.

Allisiguk

Nunatta karsia

- Nunatta karsiata inissisimanera 2025-mi annertuumik ajorseriarpoq.

Taama Aningaasaqarnermut Siunnersuisoqatigiit pissutsit oqaluttuaralugit aallarniuteqarput.

Misissuinerit kingulliit naapertorlugit nunatta karsia 2025-mi 386 millionit koruuninik amigartooruteqarnissaa naatsorsuutigineqarpoq.

Naak siunnersuisoqatigiit mianersoqquseqattaartaraluartut, aningaasat uninngasuutit ikiliartupiloorsimanerat siusinnerusukkut KNR-imi allaaserineqarpoq.

- Tamatuma kinguneranik nunatta karsiata uninngasuutai annertoorujussuarmik ajorseriarput, 2025-milu ukiup affaani kingullermi 0 tikingajallugu aarlerinartumik appasitsigilerlutik, Aningaasaqarnermut Siunnersuisoqatigiit allapput.

Aamma atuarukAningaasaqarnermut Siunnersuisoqatigiit sinneqartoorutinut nutaamik malittarisassioqqusisut

Nalunaarusiarli aamma ajunngitsortaqarpoq. 2026-mummi aningaasanut inatsimmik isumaqatigiissut isertitat aningaasartuutillu akornanni oqimaaqatigiissitsineq pilerseqqinniarlugu annertuunik pisariaqartunillu sukaterinermik imaqartoq, siunnersuisoqatigiit allapput.

Taamaakkaluartoq aningaasanut tunngatillugu naalakkersuisut mianersornissaannik, siunnersuisoqatigiit suli kajumissaaruteqarput.

KNR-ip septembarimi allaaserisaatut nunatta karsiata sinneqartoorutaata minnerpaaffissaa pillugu Inatsisartut inatsisiliornissaat, Aningaasaqarnermut Siunnersuisoqatigiit aamma kaammattuutigaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.