Aningaasanut inatsisissaq akuerigaat: Pappialatigut sinneqartoortut – tigoriaannagassaatissalli suminngaaanniissanersut akissutissartaqanngitsoq

Naalakkersuisoqatigiit ajornartorsiorfimmi sinneqartooruteqarnissaq nuannarutigigaluaraat, nunattakarsia annaanneqaqqajanngitsoq, sinneqartoornissarlu qulakkiinngitsoq, Naleraq oqarpoq.

Allattoq Markus Valentin

novembarip 14-at 2025 16:07

Nutserisoq Jens Thorin

Inatsisartut aappaagu aningaasanut inatsisissaq tallimanngornermi ukiakkut ataatsimiinnerup ulluisa kingullianni akuersissutigaat.

Inatsisartut aningaasanut inatsimmik piffisssamik eqquillutik ukiut qulit matuma siorna kingullermik akuersisimanerat, Erik Jensenip (S) periarfissaq iluatsillugu erseqqissaatigaa.

Partiit naalakkersuisoqatigiittut periarfissaq iluatsillugu suleqatigiilluarnertik oqaluuseraat.

2026-mi aningaasanut inatsit 60 milliuunit koruuninik sinneqartoorfiussasoq, aningaasaqarnermut akilerartarnermullu naalakkersuisoq Múte B. Egede (IA) oqarpoq.

Aamma atuarukNunap karsia 257 millioninik amigartoortoq

Inatsisartullu ataatsimiittarfianni nuannannerinnarsuaqanngilaq - Pele Broberg (N) oqaluttarfimmut qaqigami, aningaasanik akisusssaassuseqanngitsumik aqutsinermut taasamaminut akerlilersueqaaq.

Tassami siorna aningaasanut inatsit sinneqartoorfiusussatut aamma suliaagaluartoq, 257 milliuunit koruuninik amigartoorfiusoq ukiup aallartilaarnerani paasinarsivoq.

- Ullumi tulluusimaarpasippugut, kisianni taamaalioqqippusiaasit. Naalakkersuisut oqarput, aningaasanut inatsit akisussaasuseqartuusoq, kisianni taamaanngilaq.

Aningaasanut inatsit tamanut suli saqqummiunenqanngimmat, KNR-ip kisitsisit suli misissoqqissaarsinnaanngilai.

Taamaattumik nunap karsia amigartooruteqarpoq

Nunatta karsiata amigartooruteqarnera siorna NunaGreenimut 400 millionit koruuninik aningaasaliisoqarsimaneranik Greenland Airportsimullu 100 millioninik tunniussisoqarneranik pissuteqarnerarlugu Naalakkersuisut namminneerlutik nassuiaatigaat.

Aalisarnermi 2023-mi rekordiliisoqarpoq. Raajaqassuserli – kiisalu kiilumut akit – pisassiissutillu apparput.

Tamatuma saniatigut sanaartornerup annikilliartornera pissutigalugu aningaasaqarneq siuariartornikinneruvoq. Tamanna ilaatigut Nuummi mittarfiup nutaap sanaartorneqarnerani sanaartukkat annertuup naammassinerannik pissuteqarpoq.

Peqqinnissamut naalakkersuisoqarfiup ukioq manna aningaasartuutai 2025-mi missingersuutigineqaqqaartunut sanilliullugit 65 millionit koruuninik qaffapput. Saniatigullu soraarnerussutisiaqartunut 59 millionit koruuninik atuisoqarneruvoq.

Namminersorlutik Oqartussat ingerlatseqatigiiffiinit nunatta karsianut 107 millionit koruuninik akiliinikinnerusoqarnissaa aamma naatsorsuutigineqarpoq. Tamanna aalisakkerinerup ineriartorneranik siuariartortoqarnerata apparneranik pissuteqarpoq.

Tamatuma saniatigut Namminersorlutik Oqartussat ingerlatseqatigiiffiutaat ataasiinnarluunniit aningaasaqarnikkut siumut ilimaginngisamik ajortorujussuarmik ingerlappat tamanna nunatta karsianut annertuumik kinguneqarsinnaasoq, ukiut sisamat matuma siorna Naalagaaffiup Aningaaserivissuata siulittuutigaa.

Taamaattumik Naalagaaffiup Aningaaserivissuata aamma Aningaasaqarnermut Siunnersuisoqatigiit aningaasaqarnermut annertuumik aaqqissuusseqqittoqarnissaa innersuussutigaat. Tamatumalu saniatigut naalakkersuisoqatigiissimasut piffissanut ilungersuaffiusunut atorneqartussanut sipaarniaratik aningaasanik amerlavallaartunik atuisimanerarlugit isornartorsiorpaat.

Allisiguk

Nunatta Karsia iluatsippa?

Aningaasanut inatsit nutaaq pifffiit ilungersorfiusut, ukiuni qulini ilimasaarutaareerlutik, nalaannerannik, Aningaasaqarnermut Siunnersuisoqatigiit oqaluttuartareerneranni suliaavoq.

Nunatta karsia imakilliartorpoq, ukiorlu naappat 350 millionit koruuninik imaqarnissaa naatsorsuutigineqarpoq.

Taamaammat nunatta karsiata tigoriaannaasusaatissai toqqissumik amerlassuseqassappata politikerit 450 milliuunit koruunik missaannik ataatsimiinnerminni sipaarutissarsiortussaapput.

Aamma atuarukAningaasaqarnermut siunnersuisoqatigiit: Nunatta karsia tatineqartoq politikerillu sipaarnianngitsut

Múte B. Egede Erik Jensenilu (S) tigoriaannaasussanik aningaasassarsisimallutik ataatsimiittarfimmi oqaluttuarput, suminngaanneernerili oqaatiginagit.

Naleqqalli isumaa naapertorlugu aningaasat tigoriaannasussiat naammanngillat.

- Tigoriaannasussanik aningaasassarsinngillat. Taamaakkaluartoq i,minnut pattaateqattaarput, qanoq torrallaatiginerlutik oqaatigisarlugu. Sangusajaaqqilerpugulli. Attassisinnaassuseq akisussaassuseq oqaatsillu kusanartoq atorneqarput. Tamanna isumaqatiginngilarput, Pele Broberg oqarpoq.

Kingullerpaakkut allannguutit

Aningaasanut inatsimmi llannguutit arlaqartut tasissutigineqarput.

Marlullu immikkut maluginiagassaapput:

Siullermik arnanut akuerseqaaratik spiralilerneqarsimasunut taarsiisssutissanut aningaasaliissutit amerlineqarput. Tamanna naatsorsuutigissamit amerlanerit saaffiginnissimanerannik peqquteqarpoq.

Taava Naalakkersuisut kommuninut tamanut assigiimmik sipaarniuteqarnertik peerpaat, kommunit ingerlatsinermut aningaasaliissutaasa akit anigaasarsiallu allanngoriartorneri malinniassammatigit.

Naalakkersuisoqatigiinni partiit tamarmik aningaasanut inatsimmik akuersipput, Naleraq akerliulluni taasisoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.