Danskit milliardinik aningaasaliinerat nunatsinni missingersuutini periarfissiissasoq – peqqinnissaqarfiulli ingerlaneranut allannguuteqartitsisinnaasoq

Danmarkip nunattalu akornanni septembarip 16-ianni oqaluttuarisaanermut ilanngunneqartussamik isumaqatigiissuteqartoqarpoq.

Naalagaaffimmiit tapiissutit saniatigut Danmark 2026-imit 2029-mut 1,6 milliardit koruuninik aningaasaliissuteqarneruniarpoq. Tamatuma saniatigut Danmarkip kalaallit napparsimasut danskit napparsimmaviiniittut pillugit aningaasartuutit tigussavai.

Aningaasat ilaat Qaqortumi nutaamik umiarsualiviliornissamut Ittoqqortoormiinilu mittarfiliornissamut atorneqarnissaannut sakkutooqarneq eqqarsaatigineqarnersoq isumaliutigineqarpoq.

Aningaasaliissutit isumannaallisaanermut politikkimut atassuteqartutut ilaatigut takuneqarsinnaasut, ministeriunerup, Mette Frederiksenip KNR-imit apersorneqarnermini uppernarsarpaa.

Aningaasaliissutilli qanorluunniit tunngaveqaraluarpata nunatsinni aningaasaqarnermut pitsaasumik sunniuteqassapput.

Tamanna Aningaasaqarnermut Siunnersuisoqatigiit siulittaasuata, Torben M. Andersenip oqaatigaa, aamma naak isumaqatigiissummi annikitsortat tamanut saqqummiunneqanngikkaluartut.

- Aningaasammi qanorpiaq agguataarneqarnissaat ilisimaqqissaanngilarput, kisianni missingersuutini periarfissaqartitsinerussagunarpoq.

Attaveqaasersuutit aningaasanik pilersitsisut

Takornariartitsisarneq annertusineqaannarnani inuussutissarsiornermi aamma periarfissiisoqassappat, nutaamik attaveqaasersuineq pingaaruteqarpoq, aningaasaqarnermut ilisimasaqartoq oqarpoq.

- Aallartissinnaanngikkaluakkanik aallartitsinissamut periarfissiisoqassasoq oqartoqarsinnaavoq, Torben M. Andersen oqarpoq.

Naak Tunumi mittarfinnik nutaanik arlalinnik pilersitsinissaq piffissap ingerlanerani oqaluuserineqartaraluartoq, Ittoqqortoormiini nutaamik mittarfiliortoqarnissaa piffissami matumani pilersaarutaasimanngilaq.

Muminganilli naalakkersuisut inuiaqatigiit aningaasaqarnerannik nalunaajaasiuleruttorput, tassannga Namminersorlutik Oqartussat Tasiilami nutaamik mittarfiliornissamut aningaasaliisinnaatinneqassapput.

Naallu umiarsualivik mittarfillu isumannaallisaanermut tunngatillugu naliliinermik immaqa tunngaveqaraluartut, taakku sakkutuunit inuinnarnillu atorneqarsinnaanissaat piumasaqaataavoq.

- Aningaasaqarneq eqqarsaatigalugu tamanna assigiinngitsunik sunniuteqarsinnaammat attaveqaasersuutit pitsaanerulernerannut sunniuteqarsinnaavoq, Torben M. Andersen oqarpoq.

Peqqinnissamut politikki nutaaq

Danmarkip kalaallinut napparsimasunut danskit napparsimmaviiniittut aningaasartuutinik tigusisussanngornerannut atatillugu Torben M. Andersen pissangagisaqarpoq:

Peqqinnissamut politikkimi nutaaliortoqalerneranik takussustissaava?

Napparsimasunik Danmarkimukartitsisarneq akikinnerulissappat amerlanerusunik Danmarkimukartitserusuttoqalersinnaavoq – tamannalu aningaasaqarnikkut qanoq sunniuteqassanersoq siulittoruminaappoq.

- Napparsimasut amerlanerusut Danmarkimukartinneqartalissagunik nunatsinni peqqinnissaqarnermut aaqqissuussineq tamaat qanoq eqqarsaatigineqalissava?

Isumaqatigiissulli Kalaallit Nunaanni Peqqinnissaqarfimmi sulisussaaleqinermik ajornartorsiuteqarnermut aningaasatigut iluaqutaassaaq.

- Atorfinitsitsiniarnermut taartaasussarsiornermullu ajornartorsiuteqarnermut atatillugu iluaqutaassaaq. Piffissarli ungasinnerusoq eqqarsaatigalugu siunissami peqqinnissaqarfik pillugu politikkikkut taava qanoq aalajangiisoqartalissava?