Politiit ullormut nalunaarutaat: Timmisartorsuarmut siullermeerluni Ilulissanukartumut ilaalluni hashimik anngiortumik eqqussisoqartoq
Politikkikkut siuttuusut, soorlu naalakkersuisut siulittaasuat Jens-Frederik Nielsen (D) Danmarkimilu aningaasaqarnermut ministeri Peter Hummelgaard (Socialdemokratiet) timmisartorsuarmut Københavnimiik siullermeerluni sisamanngormat Ilulissanukartumut kisimik ilaanngillat.
Kalaallit Nunaanni Politiit sillimasuisa pisortaata Malik Olesenip angut 54-inik ukiulik timmisartorsuarmut ilaalluni hashimik kilop affangajaanik oqimaassusilimmik anngiortumik eqqussisimasutut pasineqarnerarpaa.
Ilulissani mittarfittaaq sisamanngornermi nalliuttorsiutigineqaraluartoq, pisarnerattut isumannaallisaanermut nakkutilliisoqarpoq, Malik Olesen oqarpoq:
- Timmisartut tikittut ukkatariuartarpagut, taanna oqarpoq.
Taassuma saniatigut, umiatsiap Paamiut kujataani Aasiaat Radioatigut kalerrisaarereersoq SAR-imik imaani sisamanngornermi annaassiniaasoqarpoq.
- Angallatit aallartippagut qulimiguulillu aamma atorlugu, Malik Olesen oqarpoq:
- Nalunaaruteqartoqarneraniilli akunnerup ataatsip missaa qaangiummat angallatinit annaassiniaasunit paasitinneqarpugut ilaasut ajunngitsut.
Inuit marluk umiatsiarlutik mallertorsuusoq aquutiminnik ajornartorsiuteqarnertik pissutigalugu kalerrisaarisimapput.
Kalaallit Nunaanni Politiit sianerfigineqarniarnikkut ajornartorsiuteqarnertik sisamanngornermi nalunaarutigaat. Tamannali aaqqinneqareerpoq.
