Ilulissani takornariaqarneq pillugu akerleriinneq tamaanga killeqanngilaq. Avannaata Kommuniani borgmesteri, Lars Erik Gabrielsen (S) umiarsuarnut takornariartaatinut ingerlatsisunullu akerliussutsimik takutitsisoqarnissaanut aggersaaleruttornerani, illuatungiliuttut kommunimi siunnerfik Lars-Erik Gabrielsenip aningaasatigut nammineq soqutigisaanit aallaaveqartuunerarpaat.  

Taakkua ilagaat Heidi Møller (D), taannalu isumaqarpoq borgmesterip nammineq soqutigisaqarfii inuussutissarsiornermut kommunillu tatiginassusaanut innarliisut.

- Innuttaasunut maligassiuinissaq pingaarutilerujussuuvoq. Siorasaaraluni suliamik tigusiniarsarineq, inatsisillu atuuttut avaqqullugit pineq, sioorasaarineq oqariartornerlu atorlugu suleriuseqarneq, innuttaasunut naliginginnaanngorsarneqassanngilaq. Inatsisit atuuttut ullumikkut tamatsinnut atuuttuutillugit malittussaavagut, Heidi Møller oqarpoq.

Illuatungiliuttut takornariaqarnerup nunaqavissunut aningaasatigut iluanaaruteqarfiunerunissaa isumaqataaffigigaat taanna erseqqissaavoq, immikkulli ittunik soqutigisaqarneq tamassuma anguniarnerani aqqutissiuisuussannginnerarlugu. 

- Avannaata Kommunia innuttaasunut tamanut sullissisussaatitaanera uani pineqarnani - partiit immaqalu suliffeqarfiit soqutigisaat aallaavigalugit suliniarsarineq - kommunimi ingerlatsinermi tulluanngitsorujussuuvoq. 

Borgmesteri nammineq soqutigisaqarfimminik aallussivoq 

Borgmester Lars Erik Gabrielseni akerleriinnerup aallartinneraniilli akerleriittuni qitusut ilagaat. 

Umiarsuarnut takornariartaatinut akerliuniarluni Ilulissani umiarsualivimmi akerliussutsimik takutitseqataanissamut aggersaasarsimavoq kalaallillu ingerlatseqatigiiffiutaannik takornarianik angallassisartunik, ilaatigut avataaneersunit suleqateqartartunik, isorinnittarsimalluni. 

Lars-Erik Gabrielsenillu taamatut pissusilersorsimanera inuussutissarsiornermut Nalakkersuisumit, Naaja H. Nathanielsenimit (IA), ”pisortani suliaqarnermik ilungersuutigisamillu ingerlatsinermik akulerussinera”-tut taaneqarpoq.

Heidi Møllerilu isumaqataavoq:

- Borgmesteri Lars Erik Gabrielsen qineqqusaarneq sioqqullugu takornariartitsinermi aningaasatigut soqutigisaqarfeqareerpoq, ilaatigut Ilulissat Excursions-imik piginneqataanermigut. Maannalu borgmesteritut atorfini atorlugu ineriartornermut sunniiniarsarivoq, taanna oqarpoq.

Heidi Møller naapertorlugu borgmesterip inuttut soqutigisaqarfii aamma illoqarfimmi takornariartitsisartunut Ilulissat Excursionsimut ilaanngitsunut, suliffeqarfinnillu allanik suleqateereersunut niuernerminnillu ineriartortitsiniaraluartunut, eqquipput.

- Lars Erik Gabrielsenip inuttut soqutigisai pissutigalugit maanna tatineqarput, taanna oqarpoq.

Taamaattumik aamma nunat allamiut umiarsuaataat nunatsinneersullu takornarialerisut nunatsinni kiffartuussinissamik isumaqatigiissuteqartut immikkoortinnissaat pingaaruteqartoq erseqqissarpaa – oqallinneq tamanna aamma oqallisigineqarsimaqisoq, Lars Erik Gabrielsenillu nammineq ingerlatseqatigiiffiata tamanna aaqqiiaginngissuteqarfigisimagaa, Heidi Møllerip aamma erseqqissarpaa.

- Ilulissat Excursionsip takornariartaatinut, umiarsuarnut tunngatillugu akerleriissuteqarnera aamma nammineerlutik quppersagaanni takuneqareersinnaapput, aamma oqariartortarneranni taanna ersarittorujussuuvoq, ilaatigut Sermitsiami innuttaasut Ilulissat Excursionimut piginneqataanissaannik kaammattornerisigut. Tassuuna borgmesterip nammineerluni, nammineq soqutigisaqarfimminik aallussinera, suliffeqarfimmillu aalajangersimasumik siunertaanik anguniagaqartuunera, uani ersarittorujussuuvoq.

Kommunimut tatiginnikkunnaartoqarsinnaasoq

Heidi Møllerip aaqqiagiinnginneq kommunip innuttaasunik tamanik kiffartuussinissamik pisussaaffianik sumiginnaasutut isigaa.

Aammali borgmesterip inuttut soqutigisaqarfeqangaarnera tamanullu ammasumik oqaaseqarnera kommunimut tatiginnikkunnaarsitsisinnaasoq ernummatigaa.

- Avannaata Kommuniata siunissami naalakkersuinikkut avataaniillu suleqatiginninnissaa ineriartornissaalu pingaaruteqarluinnarpoq – tamatumanilu Avannaata Kommunia apeqqusersorneqarsinnaalerpat uagutsinnut tatiginninneq ineriartornerup ingerlaqqinnissaanut aporfiusinnaanera illuatungiliuttutut ernummatigaarput, taanna oqarpoq.

Takornariaqarnerpaaffiup nalaani akerleriinnerup sakkortusiartornerani, takornariartitsinerup siuariartornerani Ilulissanilu aappaagu mittarfissuup nutaap ammarneqartussaanerani – tamannalu malitsigalugu takornarianik suli amerlanerusunik tikittoqartalertussaanerani – iliuuseqartoqartariaqartoq Heidi Møller isumaqarpoq.

- Takornariaqarneq nunatsinni inuussutissarsiutit pingaarnerpaat ilagaat, Ilulissallu avammut nittarsaanneqarnerani qitiulluinnarpoq. Taamaattumik Ilulissat kisimi pinnani nuna tamakkerlugu avammut nittarsaanneqartarpugut, taamaattumillu taamatut pissusilersorneq eqqumaffigisariaqaripput isumaqarpunga.

Heidi Møller naapertorlugu ajornartorsiummut aaqqiissutissaq ajornanngilaq, tassami torersumik oqaloqatigiinneq, paaseqatigiinneq, ersarissunik piviusunillu tunngaveqartunik paasissutissiineq pisariaqarput.

- Naalakkersuisup Naaja H. Nathanielsenip taassumalu ersarissumik oqariartuutaa, tassa borgmesteri pissuserissaarnissaanik attaveqaqatigiinnerullu pitsaanerusumik ingerlanneqarnissaanik oqariartuuteqarnera taperserparput. Aamma borgmesterip innuttaasunut eqqortumik paasissutissiisariaqarneranik ersarissumik piumasaqaataa tapersersorparput – tatiginissutsitta innarlinnginnissaa pillugu. Taamaattumik Naaja H. Nathanielsenip oqariartuutaa tapersersorparput.