Nillianerit, siorasaarinerit akerliussutsimillu takutitsinerit Ilulissani pisut, Kalaallit Nunaanni takornariartitsisarnerup siunissaa pillugu oqallinnermut ikummarissaapput.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Nalakkersuisoq, Naaja H. Nathanielsen (IA), takornarianut nipi peqqarniitsoq akuerineqarsinnaanngitsutut taanikuuaa, namminerli maannakkut nunaqavissunit inuussutissarsiutigalugu namminersortuniit politikeriniillu sakkortuumik isornartorsiorneqarpoq.

Avannaata Kommuniata borgmesteria, Lars Erik Gabrielsen (S), Ilulissani akerliusunut siuttutut inisseqqanerani, Ilulissat Excursionsimi pisortap, Jan Cortsenip, Naalakkersuisup tunuarnissaa piumasarivaa.

Taakkumi isumaqarput, Naaja H. Nathanielsen, Ilulissani takornariartitsisartut nunaqavissut tapersersuinngitsoq.

Naaja H. Nathanielsenimulli nalorninartoqanngilaq: Takornarialerineq sumiiffimmi patajaallisarneqassaaq – ataqqinnittumilli ineriartortineqassaaq, isumaqatigiinnginnerit nunamullu tikeraartut eqqarsaatigalugit.

- Takornarialerineq inuussutissarsiutaavoq uagutsinnut pingaarutilik, uagullu suleqatigiilluta ineriartortitsissavarput – aamma isumaqatigiinngissinnaagaluarluta. Immitsinnut nunatsinnullu tikeraartunut iluamik pissuseqarfigissaagut, taanna KNRimut oqarpoq.

Avannaata Kommuniani illuatungiliuttut Naalakkersuisoq taperserpaat. Taakku tusagassiuutitigut nalunaarummi allapput, kommunetut ammasuusussaallutik, saaffiginnikkuminartut suleqatikkuminartullu, taamaattumik Lars Erik Gabrielsen kaammattorpaat suleriaasini allanngortissagaa.

 ”Sulineq ingerlalereerpoq”

Naaja H. Nathanielsenip aamma uparuarpaa, Naalakkersuisut Ilulissani takornariaqarneq pillugu, piffissami sivitsortumi – aamma suli akerliussutsimik takutitsinerit aallartinneqanngikkallarmata isumaqatigiinnginnerullu sakkortusiartulinnginnerani.

- Maajimi Ilulissaniippunga, suliffeqarfinni peqataasut kommunalbestyrelselu ataatsimeeqatigisarlugit. Taamani arlalinnik isumaqatigiissuteqarpugut, tamakkulu suliniutigivakka, septemberimilu uterfigissamaarpakka. Taamaattumik suliaq taanna ingerlanneqalereerpoq, taanna oqarpoq.

Naaja H. Nathanielsemut isorinnittut akornanni ilagaat, Ilulissat Excursionsimi pisortaq, Jan Cortsen, Naaja H. Nathanielsenip Naalakkersuisutut peerneqarnissaanik piumasaqartoq. Taannami isumaqarpoq, Naaja H. Nathanielsenip avataaniit sulisut illersorai, Ilulissani nunaqavissut ajoqutigisaanik, taamatullu iliuuseqarnera toqqaannartumik innarliinertut taavaa. Tamanna KNRimut ippassaq oqaatigivaa.

Naaja H. Nathanielsenili naapertorlugu nunaqavissunik avataaneersunillu immikkoortitsineq eqqunngilaq:

- Nunaqavissoq Kalaallit Nunaanneersuuvoq Kalaallit Nunaanni sulisoq, Kalaallit Nunaanni suliffeqarfimmik ingerlatsisoq, taanna oqarpoq nangillunilu:

- Maani nunami inuussutissarsiornikkut inuuneq ataatsimoortuuvoq, tamannalu isumaqarpoq, Upernavimmi innaallagisserisuuguit, Ilulissanut suliaqariartorsinnaatitaavutit akerlianillu. 

Inuussutissarsiornikkut inuuneq annertuvoq maani, piffinnilu tamani sulianik naammassinnittussanik peqassaaq. Kommuneni killigititaasut peqqutigalugit immitsinnut killilersornissatsinnut ikippallaarpugut.

Malittarisassat nutaat takornarialerinerup nunaqavissunut iluanaarutaanissaanut qulakkeerinnissaaq

Naak isumaqatigiinnginnerit massakkorpiaq initugaluartut, tamannarpiaq malittarisassanik nutaanik, Naalakkersuisut ukiuni arlalinngortuni suliarisaanik, pisariaqartitsisoqarnera ersersikkaa Naaja H. Nathanielsen isumaqarpoq.

- Takornarialeinermik inuussutissarsiortuniit isorinninneq arlalitsigut paasisinnaavara. Taamaattumik takornariaqarneq pillugu inatsit pilersipparput. Taamaattumik Takornariartitsinermut immikkoortumi pilersaarut pilersipparput.

- Takornariartitsinermut inatsit 1. januar 2027 aallarnerfigalugu aatsaat atuutilissaaq. Taamanikkussamiit umiarsuit takornariartaatit angalaartitsinissaminnut taamaallaat nunaqavissunik angallassisartunik angallassisoqaqqusaalissapput.

Ilulissani Kalaallit Nunaannilu piffinni allani takornariartitsineq pillugu isumaqatigiinnginnerit, nunami ineriartornermik malinnaasinnaannginnermik ersersitsisuunera Naaja H. Nathanielsenip akerlilerpaa.

- Visit Greenlandimiit misissuinerit ersersippaat, takornariartitsinerup tapersersorneqarnera nalinginnaasuusoq. Takornariartitsisarnerup kingunerlutitsisarsimanera Islandimi, ilaatigut ilinniutigisimavarput, taamaattumik inatsimmik atuutsitsilereernikuuvugut, ajornartorsiutaasinnaasut akiorniarlugit. Takornariartitsisarneq inuiaqatigiinnut aningaasatigut annertuumik pilersueqataavoq, tassuunalu aningaasarsiortut amerliartorput.

Taamaattumik Naaja H. Nathanielsen erseqqissaaqqippoq, nunaqavissut takornariartitsisarnermiit iluanaaruteqarnissaat akerlerinagu.

Isornartorsiuininilu oqallinnerup imarisaanut tunnganngitsoq, kisiannili oqallinnerup qanoq inneranik.

-Takornariartitsisarnermik inuussutissarsiorluni suliaqartarnerup ilaa pillugu suli isumaqatigiinngittoqarpoq, qanorlu ineriartortitsissaneripput. Aamma tamanna naapertuupppoq. Tamanna oqallisiginissaa pingaaruteqartorujussuuvoq. Oqallisigaarput. Taamaallaanuna torersumik oqallisigineqartussaasoq, takornarianut tikeraanullu kingunerluutaanngitsumik, Naaja H. Nathanielsen oqarpoq.