IA meeqqat pillugit oqaaseqartartup soraarsinneqarneranut atatillugu akissutissarserusuttoq
KNR-ip Stina Sværd meeqqat pillugit oqaaseqartartutut soraarsinneqarnera tallimanngornermi allaaseraa.
MIO, meeqqanut inuusuttunullu naalakkersuisoq Mariane Paviasen Jensen (IA) taassumaluunniit naalakkersuisoqarfia KNR-imit arlaleriarlutik saaffigineqartaraluarlutik suliamut tunngatillugu oqaaseqarusussimanngillat.
Stina Sværd siorna juunimili atorfigilikkaminit soraarsinneqarsimanini Facebookikkut ullormi tassani paasissutissiissutigaa.
Meeqqat pisinnaatitaaffii pillugit sullissivimmi peqquserlussimannginnerarpoq aningaasanillu atornerluisimannginnerarluni.
Amerlasuunik atornerluisoqarsimanera misissuiffigalugu sulisimalluni aamma allappoq: ”Peqatigitillugu aningaasanik annertuumik atornerluisoqarsimanera qulaajarniarlugu sulisimavunga, isumaqarama ilumoortoq saqqummertariaqartoq, meeqqanullu akisussaaffipput tamatigut salliutinneqartariaqartoq.”
MIO-p sulisumik atorfimminik peqquserlulluni 2021-mit 2026-mut atornerluisimasumik politiinut tunniussinera aggustimi paasineqarpoq.
- Suleqat tatigisaq aningaasanik annertoorujussuarmik peqquserluuteqartarsimanera paasigatsigu MIO-mi suleqatikkalu assorujussuaq tupaallappugut. Aningaasammi meeqqat pitsaanerpaamik atugaqarnissaannut pisinnaatitaaffiisalu qulakkeernissaannut immikkoortinneqarnikuupput, Stina Sværd tassunga tunngatillugu oqarpoq.
Aningaasat peqquserluutigineqarsimasut 3,5 millionit koruunit tungaannut amerlatigipput.
Politiit suliaq misissorpaat tassungali tunngatillugu suli unnerluussaasoqanngilaq.
’Paasissutissat erseqqissut’
Inuit Ataqatigiit maanna akuliuppoq.
Partiip ’piffissaq eqqortoq nalleriarpat meeqqat oqaaseqartartuata suliunnaarsinneqarnera pillugu ammasumik Naalakkersuisuniit tunngavigineqartut inuiaqatigiinnut erseqqissaassutigineqarnissaat’ piumasaraa. - Nalunngilarput MIO aningaasaqarnikkut sakkortuumik ilungersunartumik killiffeqartoq, oqaaseqartartuusimasorlu aningaasaqarnikkut ajornartorsiutaasut qulaajarneqarnissaat pillugu sulilluarsimasoq, Mimi Karlsen partiip Inatsisartuni gruppia sinnerlugu tusagassiuutinut nalunaarummi allappoq.
- Nalunngilarput naalakkersuinikkut sulianut tunngasunik apeqqusiisarsimanera tutsuiginartumillu sulisimanera nunatsinni meeqqat atugaannut pitsanngorsaanissaq siunertaralugu ingerlassimagai.
Tusagassiuutinut nalunaarut erseqqissumik oqariartuuteqarnermik naggaserneqarpoq:
- Tamattami kissaatigaarput malitassat malillugit ingerlatsisoqarnissaa.
Meeqqat pillugit oqaaseqartartoq suliinnartussaagaluartoq
Aningaasat 3,5 millionit koruunit peqquserluutigineqarsimanerinik pasitsaassaqarneq aggustimi paasineqarmat, naalakkersuisup Mariane Paviasen Jensenip pisimasoq assuaraa MIO-lu aamma meeqqat pillugit oqaaseqartartoq suleqatigalugit suleriutsit pitsaanerusut anguniarneqarnissaannut tunngatillugu neriorsuilluni.
Oqaaseqarnermini, politiit suliamik misissuineranni, meeqqat pillugit oqaaseqartartup suliinnarnissaa erseqqissaatigigaluarpaa.
Stina Sværdip siulia Aviâja Egede Lynge, meeqqat pillugit oqaaseqartartutut 2015-imit 2025-mut atorfeqartoq, aningaasanik atornerluisimanani oqaaseqaqqissananilu Facebookikkut aggustimi allappoq.
