GUX-Aasianni ilinniagaq nutaaq: Ilinniagasserinermut ikiuunneq siunnersuinerlu ukkanneqassapput

Soraarummeerutit amerlanerit, ilinniagasserinermik ikiuunneruneq, ilinniartunik siunnersuineruneq inuttullu ineriartornermik ukkassineq. GUX-Aasianni ilinniakkami pilersinneqaqqammertumi immikkut sammisassat ilaat tamakkuupput.

Allattoq Anne Meisner Synnestvedt

juunip 08-at 2020 11:56

Nutserisoq Hanne Petersen

Inuusuttut ilinniakkatigut inuttullu immikkut pisariaqartitsisut immikkut ilinniarnertuunngorniarsinnaanngorput.

Ilinniartitaanermut, Kultureqarnermut Ilageeqarnermullu Naalakkersuisoqarfiummi GUX Aasiaat suleqatigalugu ilinniarnertuunngorniarfimmi ilinniakkamik immikkut pilersitsivoq, taannalu ilinniarnertuunngornianut aalajangersimasunut immikkut naleqqussagaavoq.

Naalakkersuisoqarfik tusagassiorfinnut nalunaarummini taama allappoq.

Ilinniagaq nutaaq "ingerlatsineq immikkut inissaqartitsiffiusoq"-mik tusagassiorfinnut nalunaarummi taaneqarpoq. Ilinniartitsissutinulli tamanut soraarummeerfiusartussaanera pissutigalugu nalinginnaasumik ilinniarnertuunngorniarnermut sanilliullugu immikkuullarippoq.

Ilinniartitsinerup saniatigut ilinniakkatigut aallussinerunissamut ilinniagasserinermillu ikiuunnermut immikkut aamma piffissaliisoqartassaaq. Aamma ilinniartunik siunnersuinerusoqartassallunilu inuttut ineriartorneq ukkanneqassaaq.

Ilinniagarli nutaaq ilinniartitsissutinik ingerlaqqiffiusumik ilinniakkanut arlalinnut ingerlatsinissamut pinngitsoorani angusinissamik piumasaqaateqarfiusunik aamma ilaqarpoq - nalinginnaasumik ilinniarnertuunngorniarnermi soorlu aamma taammattoq.

Bagger: Inuusuttut katataannginnissaat pingaaruteqarpoq

Ilinniartitaanermut, Kultureqarnermut Ilageeqarnermullu Naalakkersuisup, Ane Lone Baggerip (S) Aasianni ilinnikkamik nutaamik pilersitsisoqarnera nuannaarutigaa.

- Inuusuttut ilaasa katataannginnissaat ilinniarnernerminnilu ingerlariaqqinnissaannut suliatigut piumasarineqartunik naammassinninniarnissaannut tapersersornissaat pisariaqarpoq.

- Inuusuttut Covid-19-ip ajornartoortitsinera pissutigalugu ukioq manna ilinniarnertuunngorniarsinnaanngikkaluit sullinnissaat kissaatigineqarmat piaartumik pilersitsisoqarniarpoq, Ane Lone Bagger allappoq.

AAMMA ATUARUK Qeqqani Ilinniarnertuunngorniarfik ammaqqippoq

Ilinniagaq nutaaq GUX-P-mik ateqarpoq, P-lu Periarfissaq-mut naalisaataavoq. Ilinniakkamut tassunga kingusinnerpaamik juunip ulluisa 30-anni qinnuteqartoqarsinnaavoq, qinnuteqartullu naammassappata ilinniakkamik taassuminnga aallartitsisussat siulliit aggustimi ilinniarnertuunngornialissapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.