Qeqqani Ilinniarnertuunngorniarfik ammaqqippoq

Qeqqani Ilinniarnertuunngorniarfik GUX pingasunngornermi ullaakkut nalunaaqutaq 8.10 ammaqqissaaq.

- Skiima naliginnaasoq ilinniartunut tamanut atuutilerpoq, Qeqqani Ilinniarnertuunngorniarfimmi rektori Mikael Enggaard oqarpoq.

AAMMA ATUARUK Tamaat isigalugu: Coronavirus pillugu killiffik

Naalakkersuisut Nuummi ilinniarfiit coronavirus siammatsaaliorniarlugu marsip 18-iani matuaat. Ilinniarnertuunngorniarfillu qaammat ataasingajak matoqqareerluni ullumikkumiit apriilip 15-ianit ammaqqippoq.

Ilinniartunulli ullut suli nalinginnaasunngussanngillat.

Ilinniarfeqarfik avinneqarpoq

Ilinniarfeqarfimmi marlunnut avinneqarpoq.

- Ilinniarnertuunngorniarfik nutaamik nutaanngitsumillu immikkioortortaqarpoq, Ilinniarnertuunngorniallu klassemi amerlassusaat apeqqutaatillugu aalajangersimasumik inissaqartinneqassapput, Mikael Enggaard oqarpoq.

GUX Nuummi ilinniartut 475-it missaanniipput, inimilu atuartitsivimmi ataatsimi ilinniartut 15-20-llu akornanniillutik.

AAMMA ATUARUK Nuummi aqagu quliniit imigassarsisinnaaleqqissaatit

Nuummi inuit ataatsimoortut amerlanerpaamik quliusinnaasut, oqartussat inassutigaat. Tamannali ilinniarfeqarfinnut atuutinngilaq.

GUX-imi init atuartitsiviit allaanerusumik aaqqissuunneqarput. Nalinginnaasumik nerriviit 'hestip aloqutaatut' ilusilerlugit inissinneqartarput. Massakkulli nerriviit ataasiakkaarlugit avissaangatillugillu inissinneqarput.

- Ilinniartut sungiusimasaannit allaanerusssaaq. Tamanna unammillernarnerpaassaaq. Tassami ilinniartut pisarnermissut ataatsimoorsinnaanngillat.

Rektori ernumanngilaq

Ilinniarfik marlunnik kantiinaqassaaq. Klassit marlukkaarlutik ulloqeqqasiortassasut, rektori oqarpoq.

- Imaassinnaasoq ilinniartut ilaat inertigassaassasut, ernumanngilangali. Ataatsimuunnginnissarput malittarisassallu allat malinnissaat pingaaruteqartorujussuuvoq, tamannalu ilinniarnertuunngornianit paasineqassasoq malinneqassasorlu qularutiginngilluinnarpara, rektori oqarpoq.

AAMMA ATUARUK Nuummi coronamik tunillatsissimasunik nutaanik ullut qulissaanni paasisaqartoqanngitsoq

Ilinniarnertuunngorniat ilaasa rektori attavigisimavaat.

- Ilaasa meeqqatik paarsissussaqartinngilaat. Ilinniartut taakku attavigaagut atuartitsinermilu malinnaanissaat qulakkeerneqarumaarpoq.

Misilitsinnissat assigiinngitsut pilersaarutit malillugit ingerlassasut, rektorip ilanngullugu oqaatigaa.