Vivian Motzfeldt Siumup naalakkersuisoqatigiinnit aninissamik aalajangerneranut isumaqataanngitsoq

Siumup naalakkersuisoqatigiinnit aninera inuiaqatigiit pisariaqartitaannik salliussinerunngilaq. 

Nunanut allanut tunngasunut maanna naalakkersuisuujunnaartoq, Vivian Motzfeldt, taama isumaqarpoq.

Taassuma naalakkersuisoqatigiinnit aninissamik aalajangernermut peqataatinneqarnani isumaqataananilu paasissutissiissutigaa.

- Uani misigisimavunga inuiaqatigiit salliutinneqanngitsut, kisiannilu soqutigisat allallu immaqa partiip pitsaanerusumik inissisimanissaanut sammiveqarsimasinnaapput. Naluara, uanga oqallinnermi peqataatinneqanngilanga, kisianni pingaarnerpaatut inuiaqatigiit salliutinneqartutut isiginngilakka, Vivian Motzfeldt oqarpoq.

Taanna USA-p nunatsinnik tatisineqaruttorfiani nunanut allanut tunngasunut naalakkersuisuuvoq. Sulianilu maanna qimattariaqalerlugit ugguarpoq. Partiiatalu aalajangernera Siumup partiitut politikkerneratut isikkoqartoq isumaqarpoq.

- Uanga qineqqusaartarpunga inuiaqatigiinnik sullissiniarlunga. Qineqqusaartanngilanga oqara kisiat sulisinniarlugu. Qineqqusaartarpunga, oqaatikka tamatumalu malitsigisaanik assakka sulisissallugit. Taakku imminnut ataqatigiilluinnaqqissaarput. Taamaammat aalajangernermut tassunga isumaqataanngilanga.

Partiip politikkernissaanut maanna piffissaasorinngikkaa

Nunatta maanna inissisimanera tunngavigalugu partiitut politikkernissaq piffissaanngitsoq taanna oqarproq.

- Nunarsuarmi pissutsit imaannaanngitsorujussuit killiffigaagut, taakkulu pisariaqartitsipput, nukiit tamarmik kattullutik suleqatigiillutik anigorniarnissaannut. Isornartitanik tikkuartuineq oqaasertalersuinerlu ajornanngitsuaraarakasiuvoq. Ajornarneruvoq suleqatigiinnermi aaqqiissutissarsioqatigiinneq.

Vivian Motzfeldtip isumaqataanani erseqqissaatigaa. Aalajangeeqataasimananilu aamma erseqqissaatigaa.

- Suliat ingerlanneqarsimaneranni aamma uagut Inatsisartuni ilaasugut tamakkerluta ilisimatinneqanngilagut. Uanga killinneq, partiimi Siumumi tunuliaqutaasugut tamattaalluta peqataatinneqanngilagut taamaammat tassunga killiffeqarneq ajuusaarnartutut isigaara, maanna naalakkersuisuusimasoq oqarpoq, nangillunilu. 

- Naalakkersuisoqatigiinnit tunuarneq inuiaqatigiinnut qanoq iluaqutaasinnaanera takusinnaanngilara.

Siunissaminut nalilersuisoq

Tassalu Vivian Motzfeldtip partiimi aalajangerneranut naammaginninnani isertuutinngilaa. Siunissaminulli oqaaseqarnissaq maanna siusippallaarsoralugu oqarpoq.

- Soorunami nalilersuivunga uanga naleqartitakka tarrarsorfigisinnaasariaqarakkit.