Siumut tusagassiortunik katersortitsivoq: Naalakkersuisoqatigiinni partiit assigiinngippallaarlutik ingerlaqqissinnaanngillat
Siumut tusagassiortunik maanna katersortitsivoq, tassani Siumup naalakkersuisooqatigiinnikkunnaarnera pillugu Aleqa Hammond (S) oqaaseqarluni.
Naak naalakkersuisooqatigiinnikkunnaaraluarlutik, naalakkersuisuutitarisimasartik Vivian Motzfeldt qujassuteqarfigaa.
Partiitut assigiinngitsutut ingerlasoqarnissaa tulluanngitsoq
Naalakkersuisooqatigiinni partiit tallimat assigiinngippallaarneri pillugit taassuma isornartorsiorpaa.
- Siumut sinnerlugu siulittaasutut misigisimanngilanga ataqatigiissakkamik inissisimasoq ataasiaannaq ataatsimiittoqarsimasoq, Aleqa Hammond (S) oqarpoq.
Akulikinnerusumik ataatsimiittoqartarnissaa naalakkersuisooqatigiinnit neriorsuutigineqartaraluartoq piviusunngortinneqarneq ajorpoq.
Ilaasortaatitatik paasisinnaalluarai
Inatsisartuni naalakkersuisunilu ilaasortaatitatik pakatsillutillu aalassassimaarpata paasisinnaalluarlugit Aleqa Hammond (S) oqarpoq.
Issiaviit kissalaartut issiaviginiaannarlugit ilaasortaasoqannginnissaa taassuma oqaatigaa.
Partiitut assigiinngitsutut ingerlasoqarnissaa tulluanngitsoq Aleqa Hammond (S) oqarpoq.
Naalakkersuisuuffiit marluk inuttaqanngitsut isornartorsiorai sulilu massakkumut inuttalerneqanngitsut isornartorsiorpai.
Taamaammallu partiitut assigiinngitsutut ingerlasoqarnissaa tulluutinngitsoq taassuma ilanngullugu oqaatigaa.
- Siulersuisuunerit tamarmiusut isumaqataaffigisaanit naalakkersuisooqataajunnaarniarluta ullaaq manna isumaqatigiissutigaarput, Aleqa Hammond (S) oqarpoq nangillunilu:
- Naalakkersuisut ullumikkut tamakkiisumik sulinngillat. Naalakkersuisut sanngiitsumik inissisimapput. Siuttoq erseqqissoq pisariaqartipparput.
Naak inatsisartuni naalakkersuisunilu Siumumit ilaasortaatitat ilai isumaqataanngikkaluartut, siulersuisuunerit qaffasinnerusumik aalajangiisartuusut Aleqa Hammond (S) oqarpoq.
